عتیق آسکوہ بلوچ نے نا مٹ کروک کتاب “کاغذی پُھل آک” شینک مس۔ کتاب صباء انسٹی ٹیوٹ آف ریسرچ اینڈ پبلیکیشنز نا پارہ غان شینک کننگانے۔
کتاب ‘کاغذی پُھل آک’ 182 نا کچ پنہ غاتیا مسہ بشخ جہانی ادب آن مٹ کروک افسانہ، نوشت و شخصیت آتیا تالان ءِ۔ کتاب ئٹ چانڑدہ افسانہ، ہفت نوشتانک و ہفت شخصیت آتا بابت مَٹ آک اوار ءُ۔
عتیق آسکوہ بلوچ نا داکان مُست ڈاکٹر عنبرین مینگل نا کتاب پہاڑی عقاب نا مٹ ‘مشی آ بانز’، جہانی ادب آن مٹ کروک افسانہ و نوشت آتا کتاب ‘ندارہ’ و ڈاکٹر شاہ محمد مری نا عشاق کے قافلے نوشت کتاب “میر گل خان نصیر” شینک مسونو۔
کتاب ءِ تینا سنگت آتا پِن آ کریسہ عتیق آسکوہ بلوچ نوشتہ کیک؛ پِن آ ہمو سنگت آتا ہرا کنے تینا ہمراداری نا شرف تسر۔ ہرافک ہر گام آ کنے حوصلہ بشخار، و چھپ انگا کسر آ تمنگ آن توریر۔
کتاب نا سر لوز ئٹ میرین بلوچ نوشتہ کیک ہر ہمو جُہد دیہاڑ اٹ جاگہ خَنک ہرا جہد شعوری و فکری پڑا مرے …… نوشتہ کننگ ہم اسہ شعوری جہداسے کہ داٹی نا نیت و ارادہ تینا راج ءِ شعوری پڑا ہتنگ و علمی، فکری، راجی، ربیدگی، نفسیاتی، سیاسی سرپدی تننگ نا ءِ…
میرین بلوچ نوشتہ کیک کہ کنے ہر اسہ ہمو جہدکار دوست بریک دا خاطر کہ تینا ذات آن پیشن تینے ونڈ کیک بشخک، تینے راج اٹ تینا مخلوق ٹی تالان کیک و بھازا جہد کار آک دُن ہم مسنو ہرافتا شعوری فکری جہد اوفتے اونا جند ئنا راج آن پیشن ایلو راج آتون ولدا جہانی پڑا درستی راستی کرفسہ اونا کڑد اونا گشاد ءِ جہد ئسے نا چیدہ کرینے۔ داڑکن پاش انگا مثیال “چی گویرا” نا ءِ ہراکہ نہ بیرہ سلہہ بند جہد کار اس ئس بلکن او گچینو خوانوکو فکر و شعوری سوچ تخوک عظیم ءُ انسان اس ئس۔
میرین بلوچ نوشتہ کیک کہ پاننگ نا مسخت دادے کہ اسہ جہد کار اس اگہ علم و فکر نا گشاد ءِ تخک ولدا نوشت ہم کیک تو ہر گڑا ءِ شابیت ءُ پِڑ ئسے آ سرپدی کن تینا نوشت نا جہد اٹ تالان کننگ کیک۔
او نوشتہ کیک کہ عتیق نا دا کتاب ہم اونا مالو نا کتاب آتا وڑ اونا نوشتہ ئی جہد نا اسہ گچینو ٹیکی ئسے ہراٹی ننے جہانی ادب نا گچین آ افسانہ، نوشت آک و ایلو کڑد و سرحال تے آ چاہنداری و سرپدی آن پُر زباد آ نوشت آک دو بریرہ۔
شینک کار ادارہ، صباء انسٹی ٹیوٹ آف ریسرچ اینڈ پبلیکیشنز داکان مالو بشیر زیب بلوچ نا کتاب مہر گہوش، سلام صابر نا شون تروک نواب خیر بخش مری نا انٹرویو تا کتاب، عتیق آسکوہ بلوچ نا جہانی ادب آن مَٹ ندارہ و سمو راج نا پِن ئٹ رسالہ ءِ شینک کرینے۔