پاکستانی لشکر بولان فوجی آپریشن ئٹ چُنا نیاڑی تے پلویڑ کرسا اُرا و جنگل آتے بُن تس۔
بلوچستان نا علاقہ بولان ئٹ اینو مسٹمیکو دے پاکستانی لشکر نا کنڈ آن آپریشن برجاء ءِ۔ گن شپ ہیلی کاپٹر و جاسوس جہاز آک چرجوئی ئٹ علاقہ ئٹ بال کننگ نا خننگ مسنو۔
ٹی بی پی ءِ ہندی بندغ آک حوال تسنو کہ بولان نا علاقہ ڈھاڈر نا ایب کیب ئنا علاقہ ٹی پاکستانی لشکر مالئے و اونا سیال آتا اُرا تے پلویڑ کرسا ہشانے۔
ہندی حوال تا رد ئٹ مالئے و اونا سیال تا اُراک درو آن تیبہ پاکستانی لشکر نا پلویڑ ئٹی ءُ ہراڑے لشکری کارندہ غاک چُنا نیاڑی تے ہم دزگیر کرینو۔
اندن سانگان ئٹ پاکستانی لشکر نا بھلو کچ ئسیٹی گاڑی تیا ساڑی کاروان سر مسنے ہراڑے او کیمپ ہم اڈ تسنو۔
اسہ ہندی بندغ ئس ٹی بی پی ءِ پارے کہ پاکستانی لشکر نا بھلو کچ ئس جنگی مڈی تون علاقہ ٹی سر مسنے و لشکری کارندہ غاک جنگل آتے ہم ہُشنگ ءُ۔
داکان مُست سوئی شابان نا علاقہ آن فورسز آک اِرا بندغ ءِ ہمو وخت بیگواہ کریر ہرا وخت او کُھر خوافنگ اسر۔
بولان آپریشن نا بارو ئٹ داسکان پاکستانی کوالخواک ہچو تران کتنو ولے بلوچ چاگڑدی و سیاسی تپہ آک آپریشن ئٹ لس مخلوق ءِ ٹک کننگ و دروغ ئنا مونتس آتیٹ زوراکی ئٹ بیگواہ کننگوک بندغ آتے کھسفنگ نا خلیس نا درشانی کننگ ءُ۔