بلوچستان نا صنعتی شار حب و دریابی شار گوادر ئٹ سم کاری نا اِرا جتاؤ تدینی تیٹ سیکورٹی گارڈ تون اوار پنجاب نا ہندی ئس کھسفنگا۔
حوال تا رد ئٹ حب ئٹی دے کہی بائی پاس آ پیٹرول پمپ نا خڑک موٹر سائیکل آ سوار نادرست آ سلہہ بند بندغ آک سم کاری کرسا اسہ سیکورٹی گارڈ ئسے کھسفینو۔
دا بارو ئٹ ایدھی ریسکیو نا پاننگ ءِ کہ حب ئنا دے کہی بائی پاس نا خڑک پیٹرول پمپ آ نادرست آ سلہہ بند بندغ آک سم کاری کرسا 63 سالی سکیورٹی گارڈ کماش حیات اللہ ءِ کھسفینو۔
حوال تا رد ئٹ موٹر سائیکل آ سوار سلہہ بند داڑیل آک پیٹرول پمپ آ لُٹ و پُل کننگ اسر ہراڑا سیکورٹی گارڈ مزاحمت کرے و داڑیل آک اونا سلہہ تے پُھلِسہ سم کاری کریر، سم کاری ٹی کماش سکیورٹی گارڈ بیران مس۔
پاننگک کہ سلہہ بند بندغ آک مُسٹ مسنو۔ کہوکا بندغ نا جون ءِ حب اسپتال آ رادہ کننگانے، واہم پولیس تدینی نا بارو ئٹ ودیک پٹ و پول کننگ ءِ۔
ایلو کنڈ آن گوادر ئٹ سلہہ بند بندغ آک سم کاری کرسا پنجاب نا ہندی بندغ ئسے کھسفینو۔
کہوکا بندغ نا چاہنداری گوادر ڈیزل سروس پنی آ دکان ئٹ کاریم کروک، محلہ محمدی عبدلحکیم، تحصیل کبیر والا ضلع خانیوال پنجاب نا ہندی کامران ریاض نا پن ئٹ مسنے۔
موٹر سائیکل سوار بندغ آک سم کاری کرینو ہراڑان اسہ سم ئس اونا کاٹم ئٹ لگانے۔
ٹپی مننگ آن گڈ اودے دمدستی اسپتال آ رادہ کننگانے ولے او بچنگ کتنے۔ کہوکا بندغ نا جون ءِ اونا باوہ پیرئی علاقہ غا رادہ کننگانے۔