بلوچستان اکیڈمی تربت نا توئی ادبی نشست اینو اکیڈمی نا بنجاہی دفتر ئٹ اڈ تننگا، ہراٹی ادبیب و شاعر آک اوار مسر، ادبی دیوان اِرا بشخ نثر و شاعری آ تالان ئس۔
ادبی نشست نا اولیکو بشخ ئٹ پنی آ ادیب پروفیسر غنی پرواز ادب نا مسخت آتیا ہیت کریسہ پارے کہ ادبی ذہنی سیل و چکر و خیال آتا درشانی نا پِن ءِ، ادب نا ذریعت ئٹ علمی و فکری خیال آک پاش کننگرہ و دا ذریعت ئٹ چاگڑدی بدلی نا بنماس تخنگ مریک، ادب نا ذریعت ئٹ بندغی چاگڑد ئٹ فکری و ذہنی بدلی ہتنگ مریک اندن ادب نا ذریعت ئٹ چاگڑد ءِ علمی و فکری بابت باعلم جوڑ کننگ مریک۔
دا نشست ئٹ ورنا غا نوشتکار حمل امین تینا افسانہ و پنی آ نوشتکار شگر اللہ یوسف تینا نوشت ءِ مونا ہیس۔
شعری بشخ ئٹ پنی آ شاعر عارف عزیر، ڈاکٹر شکور زاہد، ناصر بشیر، عابد علیم، حمل امین، راشد حسرت، پلان زامرانی، اللہ بخش تمل، چاکر صغیر و ایلو شاعر آک تینا شاعری تے پاریر و ساڑی مروک آتیان داد دوئی کریر۔
بلوچستان اکیڈمی کیچ نا ادبی نشست نا مہمان خاص پنی آ نوشتکار و تخلیق کار نصیر کبدانی و لبزانکی مجلس خاران نا باسک ڈاکٹر شکور زاہد ئسر اندن دا نشست نا سروکی ءِ بلوچستان اکیڈمی کیچ نا نائب صدر عارف عزیز کرے۔
ادبی نشست ئٹ زیڈ جے زہیران، شے حق بلوچ، صغیر احمد آن بیدس علم و ادب دوست ورنا تا بھلو کچ اس اوار مس۔
یاتی مرے بلوچستان اکیڈمی نا دا ادبی نشست ہر توہ آ اڈ تننگک ہراٹی پوسکنا تخلیق کار آتے موقع تننگک کہ او تینا تخلیقی لائخی تے جوان جوڑ کننگ کن اوار مریر و تینا تخلیق آتے مونا ہتیر۔