پاکستانی لشکر مشکے آن چار بندغ زوراکی ئٹ بیگواہ کرینے۔
بلوچستان نا ضلع آواران نا علاقہ مشکے ٹی پاکستانی لشکر وڈھکوک ادارہ آک چار بندغ ءِ دزگیر کرسا بے ڈس ءُ ہند ئسے آ درینو ہراکان گڈ اوفتا بارث ئٹ ہچ وڑ ئنا معلومداری رسینگتنے۔
ہندی حوال تا رد ئٹ استو نن ئنا چار بجہ نا وختا پاکستانی لشکر مشکے نا علاقہ نوکجو ٹی بھلو کچ ئسیٹی گھیرہ کرسا اُرا تیا چھاپہ خلکنے۔
زوراکی ئٹ بیگواہ کننگوک آتا چاہنداری اللہ بخش نا مار شہداد، ماسٹر الہی بخش نا مار عتیق، نبی بخش نا مار منیر و مجید نا مار جبل نا پن تیٹ مسنے۔
کوالخواہ تا کنڈ آن دا بارو ئٹ داسکان ہچو ہیت متنے۔
خیال ئٹ مرے، مشکے زوراکی نا بیگواہی تیان زیات زیمی مروکا علاقہ آتیان ءِ و داڑے بھلو کچ ئسیٹ بندغ آک ٹارگٹ کلنگ نا گواچی مسنو۔ دا ٹارگٹ کلنگ آتا دوبہ پاکستان لشکر نا مخ تفی ٹی کاریم کروک ٹولی ڈیتھ اسکواڈ آ خلنگک۔
تدوکا دے تیٹ دا ہیت ہم مونا بسنے کہ مشکے ٹی مخلوق آن پاکستانی لشکر زور ئٹ کاریم کرفنگ تون اوار اوفتے زور ئٹ تینتو اوار کیک تاکہ آزادی پسند آتا جلہو تیان رکھوک مننگ کے و علاقہ نا بندغ آتے فوجی کیمپ آتیٹ خواہفِسہ حاضری تننگ نا ہم پابند کرینے۔