بلوچ راجی مچی نا بشخ مرِسہ جہان ءِ نشان ایتبو کہ نن زندہ و شرفدار ءُ راج ئسے اُن۔ ماہ رنگ بلوچ

بلوچ راج 28 جولائی نا دے گوادر ئٹ سرمریر و جہان ئے کلہو ایتر کہ نن زندہ و خوددار ءُ راج ئسے اُن۔

بلوچ یکجہتی کمیٹی نا راہشون ڈاکٹر ماہرنگ بلوچ پارے کہ تیوہ بلوچ راج 28 جولائی نا دے تینا اُرا تیان، تینا ہند آ تیان پیشتمِسہ گوادر آ سر مرے و تیوہ جہان ئے دا کلہو تے کہ او اَسہ شرفدار و زندہ ءُ راج ئسے اُن، باوقار و خوددار ءُ راج ئسے۔

او پارے کہ نہ بلوچ بے وارث ءِ نہ بلوچ سرزمین۔ تینا راج و تینا سرزمین نا رکھ کن مزاحمت زندہ اس، مزاحمت زندہ ءِ و مزاحمت زندہ مرو۔

بلوچ یکجہتی کمیٹی کوئٹہ نا کنڈ آن سریاب، ہدہ و بی وائی سی نوشکی نا کنڈ آن کلی قادر آباد ئٹی کارنر میٹنگ اڈ تننگا، ہراٹی 28 جولائی آ گوادر ئٹی مروکا “بلوچ راجی مچی“ نا بارو ئٹ چاہنداری تننگا۔

اندن بی وائی سی نا راہشون صبغت اللہ شاہ جی پارے کہ بلوچ راجی مچی ہر وڑ ئنا تنظیمی، تحریکی انجمن و پارٹی تیان بالاتر مرِسہ کُل بلوچ آک چائے زند ئنا ہرا تپہ آن تعلقداری تخِرہ اولیکو وار بیرہ بلوچ مرِسہ اواری نا درشانی کرور کہ نن کُل بلوچ اُن و ہرا وخت اسکان سیوتی و اوڑدئی کن راج ئے توار کننگو نن اِسہ راج ئس مرِسہ جہان ءِ تینا سیوتی ءِ نشان ایتون۔