سی ستمبر آ بلوچستان نا ضلع پنجگور ئٹ زوراکی ئٹ بیگواہی نا گواچی کننگوک اِرا حقی ءُ ایلم صابر نور و عابد نور نا آجو مفننگ نا برخلاف خاہوت نا پارہ غان ریلی کشنگا و ڈپٹی کمشنر آفس نا مونا تولوک برانز کننگا۔
برانز ئٹ زالبول و چنا تیتون اوار بھلو کچ اسیٹ بندغ آک اوار مریسہ زوراکی نا بیگواہی تا برخلاف نعرہ خلکر و ہڑتوم آ ایلم تے یلہ کننگ نا خواست کریر۔
خاہوت نا پاننگ ءِ کہ اینو 16 دے مسنے کہ صابر نور و عابد نور بیدس ڈوہ آن ریاستی زندان تیٹ بیدادی سگنگ ءُ۔
او پاریر کہ تدوکا شانزدہ دے ئٹ ریاست عابد و صابر نا خاہوت تون اسہ ڈول دروغ نا زی آ دروغ تڑنگ ءِ، مالو پاننگا کہ 24 گھنٹہ ٹی ہڑتوم آ ایلم تے یلہ کننگو، اوکان پد ہڑدے ایلو دے ئنا وعدہ کریر ولے دائسکان ہڑتوم آ ایلمک بیگواہ ءُ۔
او پاریر کہ اینو خاہوت ءِ بیوس مریسہ ڈی سی آفس نا مونا تولوک برانز کروئی تمنگ ءِ، پنجگور نا مخلوق آن خواست ءِ کہ تولوک برانز ئٹ اوار مریسہ عابد نور و صابر تون اوار غٹ بیگواہ بندغ تا آجوئی کن توار ارفر۔
خیال ئٹ مرے 30 ستمبر نا سہب پاکستانی لشکر پنجگور نا علاقہ تار آفس ئٹ چھاپہ خلیسہ اِرا ایلم صابر نور و عابد نور ءِ زوراکی ئٹ بیگواہی آن پد نادرست ہند آ درے ہراڑان پد ہڑتوم آ ایلمک بیگواہ ءُ۔
خاہوت نا پارہ غان ہڑتوم آ ایلم تا زوراکی ئٹ بیگواہی نا برخلاف تولوک برانز کریسہ سی پیک کسر ہر وڑ نا ہن و بر اکن بند کننگاسس۔
پدان برانز کروک و کوالخواہ تا نیام ئٹ گپ و تران آن پد تولوک برانز ایسر کننگا، کوالخواک گپ و تران نا وخت آ پاریسر کہ بیست و چار گھنٹہ ٹی ہڑتوم آ ایلم تا آجوئی یقینی جوڑ کننگو واہم ہڑتوم آ ایلمک دائسکان یلہ متنو۔