بلوچ اسٹوڈنٹس ایکشن کمیٹی نا شینک مروک بیان ئٹی پاننگا کہ بساک نا پارہ غان پوسکن آ سال ئنا ردئٹ بلوچستان نا جتا ہند و علاقہ تیٹی ”بلوچستان کتاب کاروان“ نا پن ئٹ کتاب مُچی اڈ تننگو۔ دا کتاب مُچیک بلوچ خوانندہ غاتیکن پوسکن آ سال ئنا ٹیکی ءُ ہرافتے بلوچستان کتاب کاروان نا وسیلہ ئٹ ہمو کتاب آک رسینگور ہرا کتاب آک دائسکان مارکیٹ ئٹ دن اڑزانی ئٹ رسینگپسہ۔ گل ئنا پارہ غان بلوچ خوانندہ غاتیکن پوسکن ءُ لٹریچر چھاپ کننگانے و جتاء پبلیکیشن آتیان گچین ءُ کتاب ارفنگانے ہرافک گل ئنا اسٹال آتیا رسینگرہ۔
بیان ئٹ ودیک پاننگا کہ بلوچستان کتاب کاروان گل ئنا بھلا پروگرام آتا بشخ ئسے و اونا مسخت بلوچستان ئٹ کتاب کلچر نا دیمروی و بلوچ خوانندہ غاتیکن وخت ئنا خواست آتا ردئٹ لٹریچر نا سر کننگ ءِ۔ دنکہ ٹیکنالوجی گیشتر مون آ گام خلیسہ ءِ و دا شیفی بڑزی تیٹی بلوچ خوانندہ غاک اندن ہبکہ ءُ کہ اوفک مدان مدان آ کتاب آتیان مُر مریسہ ءُ یا اندنو کتاب خواننگ ءُ ہرافتا بلوچ ویل ئتون ہچو سیالی اف۔
ایسر ئٹ پاننگا کہ دا کتاب مچی تا بھلا مسخت اندادے کہ بلوچ نا ورناک تینے کتاب آتیتون اوار و خڑک کیر و کتاب خواننگ نا اہمیت و گرج ءِ پہہ مریر۔ خوانندہ غاک کتاب خواننگ نا عمل ءِ سرپد مریر انتئے کہ دا ہمو کاریم یا عمل ءِ ہرا ننے تینے آ باوری و برجاء مزاجی تون اوار ننا ہر ویل ئنا سائنسی و تھیوریٹکل ایسری کن کمک کیک۔ بلوچ ورناک خواننگ ءِ تینا ہڑدے ئی زند ئنا بشخ جوڑ کیر، و ہمو کتاب آتے خوانر ہرا بلوچ نا خوشحال آ پگہ و بلوچ ویل ئنا ایسری کن اوفتا راہشونی ءِ کننگ کیر۔