بلوچ اسٹوڈنٹس ایکشن کمیٹی نا پارہ غا لمئی بولی تا جہانی دے ئنا ردئٹ گل ئنا پارہ غان بنجائی مجلس مستونگ ئٹی اڈ تننگا۔
بساک ترجمان مجلس نا شابیتی احوال تریسہ پارے کہ بیست و یک فروری لمئی بولی تا جہانی دے چائنگک، دا ہمو دے ءِ کہ مُچ آ جہان ٹی لمئی بولی تا دیہاڑ، دیمروی و اوفتا رکھنگ کن مجلس آک مریرہ، ہندا ردئٹ بساک ہر سال دا دے آ مجلس اڈ ایتک و بلوچ راج ئنا بولی تا دیمروی و دیہاڑ ءِ رکھنگ نا زی آ جتاء غا چاہندار آتا خیال و نظریہ تے الس نا مونا تخک، اندا وڑ دا سال لمئی بولی تا جہانی دے آ مستونگ ئٹ ”عبدالعزیز کرد و بابو عبدالکریم شورش“ نا یات ئٹ مجلس اس اڈ تننگا، مجلس نا بشخ آتیٹ مکالہ خواننگ، ڈاکومنٹری، پینل ڈسکشن، تران و مشاعرہ اوار ئسر۔
لمئی بولی تا جہانی دے ئنا بابت تنظیم نا پارہ غان پیپر خواننگا، و بابو عبدالکریم شورش و عبدالعزیز کرد نا زند ئنا بابت ڈاکومنٹری اس پیش کننگا، ہراٹی پاننگا کہ عبدالعزیز کرد ہمو کڑدار ءِ ہرا بلوچستان نا تہٹی اولیکو وار سیاسی جہد ءِ بناء کرے، تنظیم ہندا پہہ مریک کہ تینا راجی بندغ آتا بابت بلوچ مخلوق ءِ زیات سرپنداری تننگہ، تانکہ بلوچ ورنا و خوانندہ غاک تینا راج ئنا گوری مروکا کڑدار تے پہہ مریر و مونی گام خلنگ کن جوانو فیصلہ ہرفر۔ بابو عبدالکریم شورش بلوچ دیہاڑ ئٹی اولیکو وار بلوچی بولی ٹی اخبار نوشتہ کرے و پوسکنا دور ئنا پن ئٹ اخبار ئس کشا، تنظیم پہہ مریک کہ بیدس سیاست آن راجی جوڑشت نا عمل مننگ کپک۔ و ہندا وڑ بیدس ننا لمئی بولی تا رکھنگ و اوفتا دیمروی آن بلوچ راجی پجار ایسر مریک، تنظیم ہمو کل کڑدار آتا کوشست ءِ سلام پائک ہرافک بلوچ سیاست، بولی و راجی جوڑشت ئٹ جوانو کڑد ئس ایسر کرینو۔
مجلس نا ایلو بشخ پینل ڈسکشن ئس ہرانا موڈریٹر براہوئی بولی نا نوشتکار حسن ناصر بلوچ و پینلسٹ آک براہوئی بولی نا پروفیسر ڈاکٹر لیاقت سنی، حمید عزیز آبادی و عابد عدید ئسر۔ پینلسٹ آک بلوچ اسٹوڈنٹس ایکشن کمیٹی نا اڈ تروکا مجلس نا ستا ءِ کریسہ و پاریر کہ نن اُمیت تخینہ کہ بلوچ اسٹوڈنٹس ایکشن کمیٹی تینا دا وڑ ئنا مجلس آتے مدام اڈ ایتو۔ پینل ڈسکشن ئٹ براہوئی بولی، ویل و جنجال، و دیمروی نا زی آ پینسلٹ آک تینا خیال آتے درشان کریر۔ ڈاکٹر لیاقت سنی پارے کہ اسہ خاص ءُ ٹولی ئس براہوئی بولی نا پن ئنا زی آ جتاء ءُ راج ئس جوڑ کننگ نا خیال ءِ مون آ ہتیک، ننے دا وڑ ئنا ٹولی تیان خُلوئی اف بلکن بلوچ چاگڑد ئٹ گیشتر سرپنداری نا زی آ کاریم کروئی ءِ، بلوچ دن ہم نزور اف کہ دانا ٹولی بلوچ ءِ پرغنگ کے، و ای ورنا تیان اندا خواست کیوہ کہ اوفک دا وڑ ئنا تعصبی سیاست کروک آتیان تینے رکھیسہ مُر کیر۔ بلوچ بولی دیمروی بھاز کرینے و کوشست اندا مرے کہ براہوئی بولی ہم مونی گچینو لٹریچر و ڈیجٹلائزیشن نا نیمہ غا دننگ مرے۔ عابد عدید تینا خیال آتے درشان کریسہ پارے کہ براہوئی بولی ئٹ رسم الخط ئنا جنجال ساڑی ءِ ولے دا ویل دا ہند ئنا کل آ بولی تے ارے۔ وخت ئتون اوار دا ویل آک تینٹ ایسر مریرہ، بھلا کاریم لٹریچر نا نوشتہ کننگ ءِ، ہراتم بولی ٹیکسٹ ئٹی بریک گڑا ہچ وڑا گم مفک۔
مجلس نا ایلو بشخ تران ئٹ گل ئنا مسکوہی سروک ڈاکٹر صبیحہ بلوچ لمئی بولی تا ارزشت نا زی آ تران کریسہ تینا خیال آتے درشان کرے۔ ڈاکٹر صبیحہ پارے کہ بولی راج آتا پجار ءِ، جہان ئٹ راج آتا ایسری نا اولیکو سوب بولی نا ایسری ءِ، بولی بیرہ خیال آتے درشان کننگ نا وسیلہ اف بلکن بولی راجی یاداشت آتا بشخ ءِ، اندا یاداشت آک دیہاڑ نا بشخ مریرہ، بولی کہ گم مس گڑا یاداشت آک ہم گم مریرہ، ہراتم یاداشت گم مرے گڑا راج ہم گم مریک۔
مجلس نا گڈیکو بشخ مشاعرہ ئس، ہراٹی شہ مرید، سہیل بلوچ، یحیٰی بلوچ و عاطف بلوچ تینا شاعری تے خوانار و اوکان پد مجلس نا ایسری نا پڑو کننگا۔ مجلس ئٹ مخلوق نا بھلو کچ ئس اوار مس ہرافتیٹی پروفیسر، شاعر، زبان زانت، و خوانندہ غاک اوار ئسر۔
