متنازعہ حکومت نا بیانیہ و گواچن حالیت آک

متنازعہ حکومت نا بیانیہ و گواچن حالیت آک – ٹی بی پی سرگپ

نوزدہ فروری نا نن ضلع بارکھان نا علاقہ رڑکن ئٹ لیویز تھانہ نا ہند آتیٹ بلوچستان ءِ پنجاب تون گنڈوک کسر ءِ سد آتا کچ ئٹ سلہہ بند بندغ آک تفیسہ سپر میختر نا بس ءِ توریر و ہفت بندغ ءِ دڑفیسہ سم خلکر مرگ ئنا گواچی کریر۔ دا تدینی نا ذمہ واری ءِ آجوئی دوست سلہہ بند تنظیم بلوچ لبریشن آرمی ارفے و مرگ ئنا گواچی مروک آتے پاکستان نا ڈھکوک ایجنسی تا کارندہ گوندا۔

اندا کسر آ موسیٰ خیل نا ہند آتیٹ داڑان مُست ہم بلوچ لبریشن آرمی ”آپریشن ہیروف“ نا وخت آ فوج ئتون تفوک کیہی بندغ آتے مرگ ئنا گواچی کریسس۔

بلوچستان نا متنازعہ سروزیر سرفراز بگٹی منہ دے مُست اسمبلی نا پارلیمانی مجلس ئٹ تران نا وخت دعویٰ کریسس کہ بلوچستان ئٹ دنو ہچو علاقہ اس اف ہرا آجوئی کن جنگ کروک سلہہ بند تنظیم آتا کوزہ ٹی مرے۔ واہم، سال 2025 نا اولیکو اِرا توہ ئٹ بلوچ لبریشن آرمی و بلوچستان لبریشن فرنٹ نا پارہ غان تربت، قلات، و بولان نا اہم کسر تے کوزہ کریسہ بند کننگ و پاکستانی لشکر ءِ جانی نسخان تننگ، حکومت نا دا دعویٰ تے رد کیک و بھیم بش کروک حالیت آتا زی آ پردہ شاغنگ نا اسہ کوشست ئسے۔

پاکستان نا قومی اسمبلی ٹی جمیعت علمائے اسلام نا سروک مولانا فضل الرحمن نا ہمو بیان آن ہم دا معاملہ پاش مریک کہ بلوچستان نا کم آن کم پنچ ضلع بلوچ مزاحمت کار آتا کوزہ ٹی ءُ۔ دا گواچنی مقتدر طاغت آتا دوٹی حکومت نا پڑو آتیان چپ ءِ، ہرا چرجوئی ئٹ بلوچستان ئٹی ایمنی و سوگوی نا دعویٰ تے کریسہ بسنے۔

مولانا فضل الرحمن نا دا دعویٰ و بلوچستان نا بدل مروک حالیت آتے پام ئٹ تخیسہ گمان کننگ مریک کہ بروک وخت ئٹ بلوچستان نا گیشتر علاقہ غاک پاکستانی لشکر نا دو آن پیشتمسہ بلوچ مزاحمت کار آتا دوٹی بننگ کیرہ۔

متنازعہ حکومت نا بیانیہ و گواچن حالیت آک – ٹی بی پی سرگپ

الّمی خوانبو

پُوسکنا حوالک