بلوچستان نا ضلع آواران آن اِرا بندغ زوراکی ئٹ بیگواہ اندن پسنی و تربت آن چار بندغ آجو مسر۔
شابیتی حوال تا ردئٹ آواران نا تحصیل مشکے آن پاکستانی لشکر اِرا بندغ ءِ زوراکی ئٹ بیگواہ کرینے۔
علاقائی حوالکار تا ردئٹ کندھڑی نا ہڑتوم آ ہندی تیان عظیم نا مار کریم جان ہند کندھڑی ءِ پاکستانی لشکر استو لاکھی چوکی آ خوائفسہ بیگواہ کرے اندن علم خان نا مار نور اللہ ءِ کندھڑی ٹی ننکان اُرا غا چھاپہ خلیسہ بیگواہ کرے۔ خاہوت آک اوفتا رکھوک یلہ کننگ کن سیاسی، چاگڑدی تنظیم و چاگڑدی حوالکاری تلہ کاریم ہتوک بندغ آتیان توار ارفنگ نا خواست کرینو۔
ایڑے پسنی آن بیگواہ بی این پی نا پبلیکیشن سیکریٹری وحید مجید تون اوار اونا ایلم حفیظ مجید و ندیم مجید آجو مریسہ تینا اُرا ءِ سر مسر۔
یاتی مرے پاکستانی لشکر نا دو آن اوفتا زوراکی نا بیگواہی آن پد اوفتا خاہوت کراچی، مکران کسر ءِ برانز ئٹ بند کریسہ اوفتا آجوئی نا خواست کریسس۔
ایلو پارہ غان کیچ آن ڈاکٹر زرین آجو مریسہ تینا اُرا ءِ سر مس ہرادے استو ڈھنک آن اونا کلینک آن نادرست سلہہ بند بندغ آک برمتہ کریسر۔