ٹک تیر (شہید دلجان)
نوشت: مرید بلوچ
مَٹ: ہانی بلوچ
دی بلوچستان پوسٹ
ضیاء، سماء اف دا اسہ لوز ئنا تشریح ءِ پوہ مننگ اینو داخس سخت انتکے مننگ ءِ۔ وختس سوچ کیوہ کہ بلکن دا اسہ لوز ئٹی تیوہ غا جہان نا رُژن تالان ءِ کہ ذہن دا رژن ءِ مَننگ افک، و وختس سوچ کیوہ کہ زمین نا تہہ آن سطح اسکان و او سطح آن آسمان اسکان و آسمان آن جہان نا ایسری حد اسکان ہخس تاریخ مروئے کل اندا لوز ئٹ تفوک ءُ ہندا خاطران دا لوز ءِ پوہ مننگ داخس ناممکن لگنگ ءِ۔ اینو سماء تما کہ دا منہ لوز ہرافتے ہیل کرینٹ اسہ لوز ئنا مون آ کاٹم شیف کریر، اینو دا ذہن دا علم دا شعور نا اختیار اخس محدود لگنگ ءِ۔ بھاز پاننگ کن اُست خوائک، بھاز نوشتہ کننگ نا است خواہنگ ءِ ولے، نوشتہ کیو تو انت کیو، پاو تو انت پاو اینو او وخت اف کہ ضیا ءِ پوہ مننگ کن ضیا تون ہیت کیو گڑاس ہرفنگ کیو تینا کیفیت ءِ پاننگ کیو و بھاز جارات و چُپی تون اوار کنا وجود ئٹ تالان دا توار توار ءِ بنیسہ مہر تون منہ لوز ئٹی تینا تیوہ غا ہیت ءِ پاننگ کیو، سمندر نا چُلک آتیان دا کیفیت آن، دا بے جاراتی آن کنے آزات کرفنگ کے۔
ضیاء اسہ اندنو پِن ئس ہرادے بِنوک سال آک گدرینگانو ضیاء اسہ اندنو دروشم ئس ہرادے خَنوک بھلو وخت گدرینگانے اسہ اندنو توار ئس ہرادے بِننگ کن خفک توروک مسنو، بس یاد ءِ تو اسہ ہی لوز ئس ضیاء۔ و دا لوز ءّ ہخس محدود پوہ مسٹ بیرا انداخس ہی پوہ مسٹ کہ ضیاء نا مطلب ضیاء ءِ ہرانا رُژن محسوس کننگ مریک، ہرانا گروشک آن خوشی مننگ کیک، ہرانا باسُنی آن جارات رسینگنگ کیک و ہرانا رنگ آن دا بے رنگ آ جہان رنگین مننگ کیک ولے ہرادے تیوہ پوہ مننگ، دوئی مننگ ہچ کس نا وس ئٹ اف۔
پارہ کہ جہان ئٹ ہمو عظیم بندغ مریرہ ہرافتا زند و خذمت ایلو بندغ آتیکن قربان مریرہ ہرافتے لغوری و دلیری نا نیامٹ فرق نا علم مریک ہرافتے ظالمیت و مظلومیت نا احساس مریک ہرافتے آزادی و غلامی نا شعور مریک ہرا مابت و نفرت نا اصول تیان واخب مریرہ۔ و دن انگا عظیم شخصیت آتا ودشت سال یا کرن آتیٹ مروئے۔ او لُمہ اخس خوش قسمت مروئے ہرانا خُمب آن دن انگا مڷ ودی مروئے۔ او خاہوت و سنگت آتیان خدا اخس خوش مروئے ہرافتا نصیب ئٹی دن انگا بندغ آتا سنگتی مرو و دا ڈغار نا او وخت انت کیفیت مرو ہرانا زی آ بے کچ آ بے حس آتیان پدا دنو بندغ ئس گام تخو۔
اینو آن کم و ود ۰۳ سال مُست بلکل ہندا خوشی نا احساس اسہ لُمہ ئسے مروک مرو ہرا وخت او اسہ بندغ ضیاء ءِ ودی کروک مرو و دا خوش نصیبی نا احساس ہمو باوہ و اونا خاہوت ءِ الم مروک مرو ہندا خاطران تو اونا پِن ءِ ضیاء تخنگ آ ٹہوک مرور و دا ڈغار نا کاٹم فخر آن او وخت اخس بڑز مروک مرو ہرا وخت ضیاء نا سیخا ڈغار آ تمیسہ زمین ءِ رژنا کروک مرو و ڈغار نا مون آ چرخ کہن ہم شَکی مرو کہ کاش دا بندغ نا نت تا مِشک اودے ہم خوش گند ایتر دا ضیاء نا سیخا اودے ہم رژنا کریکہ۔
جہان نا نظر تا مون آ مروکا دا لس دروشم ہر وخت اسہ بشخندہ ئس دروشم آ ہتوک مسکہ۔ اونا دا بشخندہ نا ہنینی آن ای ہمو وخت واخب مسوسٹ ہرا وخت اولی وار اونا دیدار مس و ہیت آتیان سماء تما کہ دا بشخندہ نا پدٹ بے کچ شعور ڈھکوک ءِ۔ ولے دا سنگت نا سوچ، اونا مسخت نا گمان، اونا مزل نا گمان او وخت خلنگ ناممکن ئسک۔ دن تو سنگت اندن تیاری تون ہنا کہ یخین مسکہ کہ سنگت خواننگ ایسر کننگ آن پد نوکری ئسے نا کوشست ئٹی ءِ و جہان نا وڑ دا سنگت ءِ ہم گڑتی مسنے کہ داسہ منہ وخت تینا چنا و خاہوت نا پِن آ گدریو دا زمہ واری ءِ پورو کیو ہرا زمہ واری نا احساس ہر لس بندغ ءِ باشعور مننگ آ مریک۔ ولے کنتون اوار جہان دا ہیت آن بے سماء ئسک کہ او اسہ لس بندغ ئس الوکہ بلکن او عظیم بندغ ضیاء ئسک ہرانا مسخت داخہ در چُنک الوکہ، اونا مزل داخس خُڑک الو، او تو بھلا مزل تا مسافر تیان اسہ مسافر اس ئسک۔ ہرا جہان نا نظر تیان ڈھکوک ضیاء نا پِن ءِ گمنام کریسہ دلجان نا دروشم ئٹ اسہ وام ئس دھڑفنگ، سرزمین بلوچستان نا رکھنگ و دا لُمہ وطن آ دژمن تا ناپاک نظر تے خَن تون اوار کشنگ خسنگ تباہ و برباد کننگ کن ہناسس۔ او تو تینا زند ءِ زائیفہ، چُنا، لمہ باوہ، ایڑ ایلم تا پِن آ کننگ نا جاگہ غا راج نا پِن آ کریسس۔ ہمو راج ئنا پِن آ ہرا گواچن آن بھاز مُر تینا زند ئٹ لگوک ئسک۔ ہرادے نہ تینا مظلومیت نا احساس ئسک نئے کہ مادر نا غلامی نا شعور، نہ دا عظیم دھرتی نا مڷ ضیا و امیر، شکور و حق نواز، جاوید و نثار تون اوار ہزار آ پِنی آ و گمنام سپاہی تا حوصلہ،جذبہ، ارادہ و مسخت تون واقفیت تخاکہ ہرا اوفتے کن تینا کل ءِ قربان کریسہ اوفتا رکھ اکن ہر وخت سلوک ئسر۔ ہرا دا راج ئنا جاراتی تُغ اکن تاریخی نن تیٹ بیدار دژمن آ نظر تخوک توفک دوٹی دا راج ئنا دژمن تے نیست و نابود کننگ کن تیار ئسر و سماء اف اخس وار اخس گھنٹہ اخہ دے اِسکان دژمن نا جلہو تا مون آ سلوک اوفتا ورندی تسرہ۔ دژمن مدام سرزمین بلوچستان ءِ دتر چر کننگ نا نیت ئٹ بسکہ ولے بے سہب مریسہ نرنگ آ بیوس مسکہ انتئے کہ دا ڈغار نا رکھنگ کن سرمچار آک بیدار ئسر و بے سہبی دژمن نا مقدر ئٹ ئسکہ انتئے کہ سرمچار آتیان اسہ سرمچار کمانڈر ٹک تیر ئسک و ٹک تیر آن دژمن جوانیکا واخب ئسک۔
دژمن نا تیوہ تیاری، بے کچ فوجیک، پوسکنا سلہہ غاک، ہیلی کاپٹر و جیٹ طیارہ غاک ہم ٹک تیر و اونا سنگت آتا حوصلہ تیان بچنگ کتوس و دژمن ہر وار ٹک تیر نا نشانہ جوڑ مریسہ بے سہبی آ بیوس مسکہ۔
ٹک تیر سنگت ضیاء دلجان بلوچ زند نا دا گواچن آن جوانیکا واخب ئسک کہ زند ہر وخت آ دروہ تریسہ اواری ءِ یلہ کیک، و بندغ جہان آن مدامی کن کہیک چُٹیک، ولے کہنگ ہر لس بندغ نا صفت ءِ و عظیم بندغ آک تو زندہ مریرہ گڑا ٹک تیر انتکے زندہ متوکہ۔ دا زندہ مننگ نا اُست خواہی، ڈغار نا مابت اسہ وار ولدا ٹک تیر ءِ بیوس کرے کہ ہمو ڈغار آ گام تخہ ہراڑے او ودی مسس، ہراڑے اونا چنکی گدرینگاسس، ہرانا زمین داسہ ملاس ئسک و دا ملاسی ءِ ضیاء ایسر کننگ کریکہ، دلجان ہی ایسر کننگ کریکہ، ٹک تیر ایسر کننگ کریکہ۔ نوزدہ فروری نا سہب آ اسہ وار ولدا ضیاء مخیسہ سنگت آتون گپ کریسہ ہمو ڈغار آ سر مس ہراڑے لُمہ وطن تون اوار دژمن ہم اونا ودار ئٹ ئسک۔ ضیاء دلجان ءِ لُمہ وطن تون تینا مابت نا درشانی کریسہ، اونا زیبائی، اونا خوش گند، اونا ہیت آتیان چس ہلیسہ مچے وخت گدرینگاسس کہ دژمن بھلو کچ ئسیٹ ناپاک ارادہ تون جلہو کرے کہ نوائے ہندا وار دژمن سرسہب مرے و اسہ سنگت اس یا تنظیمی راز اونا دو آ لگیر، ولے سنگت ٹک تیر و سنگت بارگ جان نا حوصلہ و دلیری دژمن ءِ اربشی کرے و دژمن ءِ اسہ وار ولدا جوان بے سہبی مون تروئی تما۔ سنگت ٹک تیر و سنگت بارگ جان اوار دژمن نا داخس کچ و پوسکنا سلہہ تیتون ہمو وخت اسکان مون تسر ہرا وخت اسکان اوفتا توفک نا اسہ اسہ سُم دژمن نا سینہ ءِ چریسہ ہِنتو۔ مقدس تنظیم نا پارہ غان ہر اسہ سُم ئنا وام ءِ ایسری تننگ آن پدا تومکا جانباز آک تنظیمی راز تے دژمن نا شر تیان رکھنگ کن و تینا سینہ ٹی دفن کننگ کن ہمو گڈیکو سُم ءِ، ہرا ہر سرمچار نا امانت مریک، توفک ئٹی شاغیسہ اسٹ ایلو نا خن تیٹ ہُریسہ مخیسہ، دژمن نا بے سہبی ءِ ہُریسہ، آزادی نا تغ خنوک وطن نا چِرک ئٹ تینا خوش گند ءِ اِلیسہ ڈغار نا ملاسی ءِ تینا دتر ئٹ ایسر کریسہ تاریخ ئٹ زندہ سلیسر و نن کن اسہ سوج ئس اِلار ہنار کہ
انت خواہک ننے آن ننا دا زند
انت وام ئسے ہرا ننے آن تننگ مفک۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔