بلوچستان نا ضلع خضدار نا علاقہ اورناچ ئٹ نادرست سلہہ بند بندغاک جلہو کریسہ پولیس و لیویز فورس تھانہ غاتے بُن تسر۔
اورناچ ئٹ پولیس نا اسہ کارندہ اس احوالکار آتون ہیت کریسہ پارے کہ ہفتہ نا بیگہ غا سلہہ بند بندغ آتا اسہ بھلو کچ اس شار ئٹ پیہاسس و اوفک پولیس و لیویز فورس نا کارندہ غاتے بندی کریر و اوکان گڈ ہڑتوما تھانہ غاتے بُن تسر۔
پولیس کارندہ نا رِدئٹ سلہہ بند بندغاک ہنیسہ پولیس و لیویز فورس نا کارندہ غاتیان سلہہ تے ہم تینا کوزہ ئٹ ہلکر۔
سرکاری کوالخواہ تا رِدئٹ دا جلہو ئٹ ہچو جانی نسخان اس متنے و رکھ ئنا حالیت ءِ ٹہیفنگ کن فورس کارندہ غاتا بھلو کچ اس اورناچ رادہ کننگانے۔
جلہو نا بابت کوالخواک انت پاریر؟
اورناچ پولیس نا اسہ کارندہ اس پِن ءِ ڈھکنگ نا شرط آ پارے کہ ہفتہ نا بیگہ شش بجہ و بیست و پنچ منٹ آ سلہہ بند بندغ آتا بھلو کچ اس اورناچ ئٹ پیہاسس۔
کارندہ نا ردئٹ سلہہ بند بندغ آتا کچ شست آن زیات ئس ہرافک بننگ تون جتا ہند آتیا سنگر ہلکر۔ ‘سلہہ بند بندغ آک شار ئٹ پولیس و لیویز فورس نا تھانہ غاتے گھیڑ ئٹ ہلیسہ اوفتا کارندہ غاتے بندی کریر۔’
پولیس کارندہ نا پاننگ ئس کہ سلہہ بند بندغ آک پولیس و لیویز فورس نا تھانہ غاتیان سلہہ و ایلو فوجی مڈی تے تینا کوزہ ئٹ ہلنگ تون تھانہ غاتے خاخر تننگ تون لیویز فورس نا اِرا گاڑی ءِ ہم بُن تسر۔
پولیس کارندہ نا رِدئٹ سلہہ بند بندغ آک اوڑے نیم گھنٹہ آن زیات ساڑی مسر و ہنیسہ پولیس نا اسہ گاڑی ئسے ہم تینتون دریر۔
محکمہ داخلہ بلوچستان نا اسہ بڑزکو کوالخواہ اس دا رِدئٹ پائک کہ سلہہ بند بندغ آک پولیس تھانہ آن دئے ئنا کچ توفک دریر، و لیویز فوس نا کارندہ غاتیان کوزہ ئٹ ہلوک سلہہ تا کچ اِرٹ ئس۔
اوفک پاریر کہ دا جلہو ئٹ ہچو جانی نسخان اس متنے و جلہو آن گڈ جلہوکار آک مش تا پارہ غا ہنار۔
خضدار ئٹ اسہ بڑزکو کوالخواہ ئس پارے کہ اورناچ ئٹ رکھ حالیت کن فورس ئنا بھلو کچ ئٹ رادہ کننگانے۔
اورناچ ہرادکن ءِ؟
اورناچ ضلع خضدار نا سب ڈویژن ءِ و دا سہ سخت ءُ مَشی علاقہ ئسے۔ اورناچ خضدار شار آن کم و وَد 130 کلومیٹر مُری آ جاندومی دے کیہی پارہ غاٹی ءِ۔
اورناچ نا آباتی جتا بلوچ قبیلہ غاتیا تالان ءِ۔ ہراڑے ضلع خضدار بلوچستان نا ہمو علاقہ غاتیٹ پِن کننگ ہرا جنگ آن زیات زیمی ءُ ہموڑے اونا علاقہ اورناچ ضلع آواران آن ہم خڑک ءِ، ہرانا پِن ہم جنگ آن زیات زیمی علاقہ غاتیٹ ہلنگک۔
ضلع خضدار ئٹ دننگا ارٹمیکو تدینی
اورناچ ئٹ سلہہ بند بندغ آتا بھلو کچ ئسے نا بننگ و اوڑے پولیس و لیویز فورس نا تھانہ غاتے خاخر تننگ دا ڈول ئنا اولیکو تدینی اف۔
داڑان مُست برجا سال جنوری نا بناء ٹی ضلع خضدار نا شار زہری ئٹ ہفتاد آن زیات سلہہ بند بندغ آک پیہاسر۔
زہری شار ئٹ سلہہ بند بندغ آک لیویز فورس نا تھانہ، نادرا نا دفتر، بینک و میونسپل کمیٹی نا دفتر آتے خاخر تسوسر و لیویز فورس نا تھانہ غان سلہہ تیتون اسہ گاڑی و موٹر سائیکل آتے ہم دریسر۔
اورناچ ئٹ مروک جلہو نا ذمہ واری ءِ دائسکان کس ارفتنے، و زہری ئٹ مروک جلہو نا ذمہ واری ءِ بلوچ سلہہ بند گل بلوچ لبریشن آرمی ارفیسس۔
زہری ئٹ مروک جلہو آن گڈ 31 جنوری و یکم فروری نا ننکان سلہہ بند بندغ آتا بھلو کچ اس ضلع خضدار نا کیب ئٹ ضلع قلات نا تحصیل منگچر نا ہیڈکوارٹر منگچر شار و اوڑے کوئٹہ کراچی بھلا کسر ءِ تینا دوٹی ہلکوسر۔
دا وخت آ سلہہ بند بندغ آتا جلہو ئٹ پاکستانی فوج نا 18 کارندہ مرگ ئنا گواچی مسر۔