بلوچستان نا ضلع دکی ٹی پاکستانی لشکر سی ٹی ڈی نا دروغ نا مونتس ئٹ کسفنگوک اِرا بندغ نا چاہنداری مالو آن زوراکی ئٹ بیگواہ بندغ تیان مس ہرافتے جتا وخت آتیٹ بیگواہ کننگانے۔
سی ٹی ڈی نا دروغ نا مونتس ئٹ کسفنگوک اسہ بندغ ئسے نا چاہنداری محمد دین مری نا پِن ئٹ مسنے ہرادے چار توہ مُست، دسمبر 2024 ئٹ ضلع ہرنائی آن پاکستانی لشکر دزگیر کریسہ زوراکی ئٹ بیگواہ کریسس۔
اونا بیگواہی نا حوال ءِ 19 جنوری 2025 آ بندغی حق آتا باسک آک و سوشل میڈیا ءِ کاریم ئٹ ہتوک آک لس کریسر، ہرافتیٹی اونا آجوئی نا خواست ہم کننگاسس۔
پن کروک سی ٹی ڈی نا دروغ نا مونتس ئٹ کسفنگوک اسہ پین بندغ ئسے نا چاہنداری بیگواہ بندغ ئسے نا دروشم ئٹ مسنے ہرادے پاکستانی لشکر قلات نا علاقہ منگچر آن 12 اپریل 2025 آ دزگیر کننگ آن پد زوراکی ئٹ بیگواہ کریسس۔
دروغ نا مونتس ئٹ کسفنگوک بندغ نا چاہنداری خدا بخش نا مار اعجاز ہند منگچر نا پِن ئٹ مسنے۔
اعجاز بلوچ نا بیگواہی نا حوال ءِ اونا خاہوت 16 اپریل آ میڈیا ءِ تریسہ پک کریسس۔ خاہوت نا ردئٹ اعجاز ءِ 12 اپریل 2025 آ پاکستانی لشکر اونا اسہ پین سنگت عابد خان نا مار زید ہند سریاب شال ئتون اوار دزگیر کریسس ہراڑان پد ہڑتوم آتے بیگواہ کننگا۔
اینو اونا خاہوت دا ہیت ءِ پک کرینے کہ عکس ئٹی خننگوک جون اعجاز بلوچ نا ءِ۔
یاتی مرے اینو، 19 اپریل آ سی ٹی ڈی دعویٰ کرے کہ دکی ٹی کاروائی نا وخت آ پنچ شکبر بندغ خلنگار۔ واہم اوفتیٹ محمد دین مری و اعجاز بلوچ نا چاہنداری دا گمانی مونتس ءِ اسہ ”دروغ نا مونتس“ اس گوندنگ نا بنداو فراوان کرینے۔
بندغی حق آتا گل آک، سیاسی باسک و چاگڑدی کڑدہ غاک دا تدینی نا ترند مذمت کریسہ پارینو کہ بلوچستان ئٹ دا وڑ نا تدینیک پوسکنو ہیت اس افس۔ ہنوکا وخت ئٹ ہم زوراکی ئٹ بیگواہ کننگوک بندغ آتے دروغ نا مونتس تیٹ کسفنگ نا دوبہ غاک ریاستی ادارہ تیا لگسہ بسنو۔
بندغی حق آتا تنظیم آک دا وڑ نا کاریم ءِ بیدس عدالت خون پِن کریسہ دادے بندغی حق آتا ترند لتاڑ پارینو۔
دا مونتس ئٹ ایلو مُسہ بندغ نا چاہنداری دائسکان مننگ کتنے واہم بندغی حق آتا ادارہ غاک اندا خُلیس نا درشانی کننگ ءُ کہ ایلو مُسہ بندغ ہم بیگواہ ءُ بندغ مننگ کیرہ۔