بلوچستان نا ضلع کیچ نا بنجائی شار تربت ئٹ زوراکی نا بیگواہی نا تدینی ئسے نا برخلاف خاہوت نا تولوک برانز برجاء ءِ۔
تولوک برانز حبیب بلوچ نا مار یاور حبیب نا زوراکی ئٹ بیگواہی نا برخلاف مریسہ ءِ ہرادے 16 جون پیشیم نا وخت آ تربت ہائی کورٹ نا پیشن آن نادرست بندغ آک زور ئٹ اسہ گاڑی اسیٹی شاغسہ دریر۔ تدینی آن پد خاہوت و ہندی بندغ آک شاپک نا ہند آ سی پیک کسر ءِ بند کریسہ تولوک برانز کننگ ءُ۔
خن خنوک شاہد آتا و زہمی مروک خاہوت نا ردئٹ یاور حبیب ہموزدے آ تینا باوہ تون عدالت ئٹی پیشی کن بسوسس۔ ہراتم او عدالت آن پیشن بس گڑا منہ نادرست ءُ بندغ اودے زور ئٹ اسہ گاڑی اسیٹی تولفسہ تینتون دریر۔ یاور نا خاہوت نا پاننگ ءِ کہ دا اولیکو تدینی اف کہ اودے بیگواہ کننگانے، بلکہ او ہنوک وخت ئٹ ہم اسہ وار اس زوراکی ئٹ بیگواہی نا گواچی مسنے۔
برانز کروک آک خواست کرینو کہ یاور حبیب ءِ دمدستی مونا ہتنگہ و دن انگا گام تے توننگ کن جوانو گام گیج کننگہ۔
سی پیک کسر نا بند مننگ نا سوب آن مخلوق نا ہن و بر زہمی مسنے، برانز کروک آتا پاننگ ءِ کہ زوراکی نا بیگواہی تا لڑ بندغی حق آتا پاش لتاڑ ءِ، حکومت و بندغی حق آتا تنظیم آک دا معاملہ غا سوبری ئٹ گام ارفر و یاور حبیب تون اوار غٹ بیگواہ بندغ تے آجو کرفر۔
وائم دائسکان ہندی بست و بند نا پارہ غان دا بابت ہچو ہیت اس مونا بتنے۔