پولیس تھانہ باغ ہیڈ نا کیب گوٹھ احمد آباد ئٹ زالبول نا ماما عبدالغفار کھوسہ سُم کاری کریسہ تینا ایڑ ئنا مسڑ آسیہ بی بی نا خون ءِ کرے و ہمو وخت نرا۔
حوال رسینگ آ ایس ایچ او سعداللہ جمالی پولیس ٹیم تون اوار تدینی نا ہند آ سر مس، ہراڑے کہوک مسڑ نا جون ءِ پوسٹ مارٹم کن اسپتال آ سر کننگا۔
پولیس نا رد ئٹ تدینی سیاہ کاری نا پِن آ خون مروک تدینی ئسے، واہم پین پٹ و پول برجاء ءِ و دوبہ دار نا دزگیری کن جتا انگا ہند آتیا چھاپہ خلنگ مننگسہ ءِ۔
یاتی مرے کہ بلوچستان ئٹ بھاز وخت سیاہ کاری نا پِن آ خون مننگ نا تدینیک مریسہ کیرہ درو 12 جولائی نصیر آباد نا علاقہ ڈیرہ مراد جمالی ئٹ گمانی سیاہ کاری نا دوبہ ئٹ اَرغ تینا زائیفہ ءِ گُٹو کریسہ او نا خون ءِ کریسُس۔
واہم دا تدینی تیٹی اوار بھاز آ دوبہ دار آک قانود آن بچسہ نرنگ ئٹ سرسہب مریرہ۔
کیہی تدینی اندنو ہم مون آ بسنے ہراڑے ذاتی جیڑہ آ زالبول آتا خون ءِ کریسہ سیاہ کاری نا پِن تننگانے و پدان دُننگ آ تدینی تیٹ قبائلی دود آتا رد ئٹ دوبہ دار آک سزا آن بچرہ۔
بلوچستان ئٹ زالبول آتا حق و بیدادی نا برخلاف کاریم کروک آ این جی اوز و تنظیم آتا رد ئٹ تیوہ پاکستان ئٹ زالبول آک ہڑدے نا بُنداو آ اُرائی و چاگڑدی ظلم ئنا گواچی مریرہ واہم دا تدینی تیٹ گیشتر بلوچستان ئٹ رپورٹ مریک۔