بلوچ یکجہتی کمیٹی بلوچستان نا جتا انگا علاقہ آتیٹ چار بلوچ ورنا محمد فرید بلوچ، محمد انور بلوچ، پزیر بلوچ و کریم جان نا زوراکی ئٹ بیگواہی آن گڈ اوفتا جون آتے خننگ نا تدینی تے بے کچ بھیم بش کروک پارت، و پارے کہ دا تدینیک بلوچستان ئٹ برجا عدالت آن چپ کاروائی و بندغی حق آتا ترند برخلافی تا اسہ پوسکن ءُ مثیال ئسے۔
شش فروری 2026 آ کلی صفر علی جنگل، دکی آن تعلقداری تخوک بیست سال ئنا بزغر محمد فرید بلوچ نا بیدادی نا گواچی مروک جون خننگا۔ اودے چار جون 2025 ئٹ اُراغان زوراکی ئٹ دزگیر کننگاسس۔ خاہوت ہشت توہ اسکان او نا پد رند ءِ برجا تخا، ولے کالخواہ تا پارہ غان ہچو ڈس اس رسینگتو۔
بی وائی سی نا رد ئٹ فرید بلوچ نا کہنگ بلوچستان ئٹ زوراکی نا بیگواہی و عدالت آن چپ خون تا برجا لڑ ئنا عکس ءِ پاش کیک۔
ہندا وڑ ہمو علاقہ کلی صفر علی جنگل، دکی نا چِل و چار سال ئنا بزغر محمد انور بلوچ ءِ ہم چار جون 2025 آ نماز خواننگ آن گڈ دمدستی مدرسہ نا پیشن آن دزگیر کننگاسس۔
کم و ود ہفت توہ آن گڈ چار جنوری 2026 آ او نا جون ءِ بِٹنگا۔
بی وائی سی نا پاننگ ءِ کہ انور بلوچ اسہ محنت کروک شاری اس ئس و او نا کہنگ بلوچستان ئٹ برجا ریاستی زوراکی نا لڑ ءِ پاش کیک۔
وشبود پنجگور نا ہندی سی و دو سال ئنا پزیر بلوچ ءِ بیست و پنچ نومبر 2025 آ ریاستی مخ تف ٹولی دزگیر کرے۔ اِرا توہ آن گڈ ہفت فروری 2026 آ او نا بیدادی مروک انگا جون ءِ واشبوڈ ئٹ خسنگا۔
بی وائی سی نا رد ئٹ پزیر بلوچ نا بدن آن ترند بیدادی نا نشان آک دا ہیت ءِ پاش کننگ نا پارہ غا اشارہ کیرہ کہ اودے دزگیری آن گڈ بے بندغی آ رویہ نا گواچی کننگاسس۔
بیست و پنچ سال ئنا ڈارئیور کریم جان، ہند تربت، ءِ مُسہ جنوری 2026 آ اسٹار پلس مارکیٹ، تربت آن سادہ پُچ آتیٹ کارندہ غاک دزگیر کریر۔
خاہوت ءِ او نا دزگیری یا دزگیر کروک آ ہند ئنا بابت ئٹ ہچ پاتوس۔ کم و ود اسہ توہ ئسے آن گڈ اسہ فروری آ او نا بیدادی نا گواچی مروک آ جون بالگتر، پنجگور آن خننگا۔
بی وائی سی نا رد ئٹ کریم جان اسہ لس ءُ شاری اس ئس، و او نا کہنگ بلوچستان ئٹ زوراکی نا بیگواہی آن گڈ خون ئنا برجا پالیسی تا پاش ءُ مثیال ئسے۔
بلوچ یکجہتی کمیٹی چار انگا تدینی تے بلوچستان ئٹ برجا بندغی حق آتا ترند برخلافی نا بشخ اس پاریسہ پارے کہ زوراکی نا بیگواہیک، غیر قانودی دزگیر، بیدادی، و عدالت آن چپ خون اسہ سوگو ءُ پالیسی ئسے نا دروشم ءِ تینا کرینو، ہرافتان لس شاری، بزغر، مزور و ورنا کل زہمی مریسہ ءُ۔
بی وائی سی نا رد ئٹ دا گام آک جہانی بندغی حق آتا قانود، تون اوار آرٹیکل 6 و 9 (ICCPR) و آرٹیکل 33 (چارمی جنیوا کنونشن) نا پاش برخلافی ءِ۔
بلوچ یکجہتی کمیٹی اقوام متحدہ، ایمنسٹی انٹرنیشنل، ہیومن رائٹس واچ و ایلو جہانی ادارہ غاتیان خواست کرینے کہ او بلوچستان ئٹ زوراکی نا بیگواہی تا آزات پٹ و پول ءِ کرفر۔ عدالت آن چپ خون ذمہ وار آتے جوابدہ کیر۔ زہمی خاہوت آتے انصاف ترفنگ ئٹ کڑد سر ایتر۔
بی وائی سی نا رد ئٹ جہانی چپی دا تدینی تا لڑ ءِ پین گیشتر کیک۔