بلوچستان نا ضلع سوراب نا مل شاہوانی نا ہند آ کوئٹہ کراچی بھلا کسر آ سلہہ بند بندغ آک کم و ود اسہ گھنٹہ ئسے اسکان ناکہ خلکر و پٹ و پول کریر، دا وخت اسہ بی اسی کارندہ اس مرگ ئنا گواچی مس۔
احوالکار آتا رد ئٹ سلہہ بند بندغ آک پولیس نا اسہ چوکی ئسے تینا کوزہ ٹی ہلکر و کوئٹہ غان بروکا پولیس کارندہ غاتا سلہہ تے ہم دوئی کریر۔
دا نیام ئٹ اسٹ ایلو آ سم کاری نا وخت حوالدار محمد جان ولد محمد یوسف مرگ ئنا گواچی مس۔ کہوک کارندہ چل و ہفت سال ئنا خضدار نا ہندی اس ئس۔
احوالکار آک ٹی بی پی ءِ پاریر کہ سلہہ بند بندغ آک ہراتم بی سی کارندہ غاتیان سلہہ تے ہلنگ ئسر کہ کارندہ اوفتیا سم کاری کرے ہراڑا جوابی کارروائی ٹی سم کاری ئٹ کارندہ مرگ ئنا گواچی مس۔
کالخواہ نا رد ئٹ تدینی ہمو وخت مس ہراتم کانسٹبلری نا کارندہ غاک ڈپٹی ءِ ایسر کریسہ قلات آن خضدار ہننگ ئسرہ۔
یاتی مرے دا تدینی ہندنو وخت ئسے آ مس کہ تدوک دے تیٹ وزیر اعلیٰ بلوچستان سرفراز بگٹی نیشنل یوتھ سمٹ آن تران کریسہ دعویٰ کریسس کہ ای تینا قول ءِ پورا کریٹ، بلوچستان ئٹ ریاست نا رٹ ءِ بحال کریٹ۔
سرفراز بگٹی نا بلوچستان ئٹ ریاست نا رٹ ءِ بحال کننگ نا دعویٰ ءِ کننگ آ بیان تریسہ ساجد ترین ایڈووکیٹ پارینے کہ وزیر اعلیٰ تینٹ مستونگ آن خضدار کسر نا وسیلہ ئٹ سفر کننگ کپک۔
برجاء سال بلوچستان اسمبلی آن تران کریسہ اسمبلی نا رکن ظفر اللہ زہری بلوچستان نا بھلا کسر تے بے رکھوک پارے۔ تینا تران ئٹ او پاریسوس کہ بلوچستان نا بھلا کسر آتیا داسا بلوچ سلہہ بند تنظیم آتا کنٹرول ءِ۔
واہم درو نا مروک تدینی نا ذمہ واری ءِ دائسکان کس ارفتنے۔