بلوچ یکجہتی کمیٹی پارینے کہ ہفتدہ دسمبر 2025 آ ہائی کورٹ ئٹ ڈاکٹر ماہ رنگ بلوچ و بلوچ یکجہتی کمیٹی نا ایلو قیادت نا ضمانت کن خواست آتیا پیشی مس۔ وکیل تینا دلیل آتے پوروْ کرے ہندن استغاثہ اسہ وڑ دزگیری ءِ جائز پاننگ کن اسہ ہم سوگو شاہدی یا گواچن ءِ پاش کننگ ئٹ بے سہب مس۔ عدالت فیصلہ نوشت کرے۔
داسا مُسہ توہ گدرینگانو، ولے دسکان اسہ ہم فیصلہ اس بنفنگ تنے۔
او پارے کہ پاکستان ئٹ نوشت انگا ضمانتی مقدمہ غاتیٹ لس فیصلہ مچٹ دے یا ہفتہ آتا نیام ئٹ بنفنگ مریرہ۔ واہم کیس نمبر 19/25،28/25،05/25،89/25 و 92/25، ہرا نا پیشی جسٹس کامران ملاخیل و جسٹس نجم الدین مینگل کریر، ئٹ غیر معمولی پد بٹنگ عدالتی عمل نا خودمختاری و سافی آ بھلو سوال بڑز کیک۔
مستی پارے کہ دا پد بٹنگ بیرہ اسہ قانودی یا بست و بندی ویل اس اف۔ دا بنداوی حق، شخصی آزاتی، و عدلیہ غا اُلسی باوری تون گنڈوک جیڑہ ئسے۔ ہراتم پُرامن سیاسی باسک آک بیدس شاہدی و وخت آ عدالتی فیصلہ غان بیدس دزگیر کننگرہ گڑا دا خیال سوگو مریک کہ قانودی ادارہ غاک اختلاف رائے ءِ ڈکنگ کن کاریم ئٹ ہتنگسہ ءُ۔
ایسر ئٹ پارے کہ عدلیہ بائد ءِ ساف، خودمختاری و بیدس خلیس و رعایت تینا آئینی فرائض آتے سر ایتے۔ بلوچستان نا اُلس و کل ہمو شاریک ہرا آئینی حق آ باور تخرہ، اسہ پاش و وخت آ مروک فیصلہ ئسے نا حقدار ءُ۔