دڑد آتا چِرک
نوشت: سنگت الیاس بلوچ
دی بلوچستان پوسٹ
استو ای و میرک جان خلق آن مُر پٹ ئسے آ توسُن کچاری کرین میرک جان کنے پارے یار سہب ئنا تیار کیس تینے شال آ کانہ، ای پاریٹ تہ خیر مرے دُن اچانک، میرک جان مخیسا پارے خیرے کنا پھل، کانہ ایلم نا کنا برام ءِ چار دے آن پد کانہ ای کہ تہ گڑا ہلینہ، ای میرک جان ءِ آؤ کریٹ میرک جان مخیسا پارے گُڑا بش مرین کان خلق آ سہب ئنا وختی ہنون، بش مسُن خلق ئنا نیمہ غا سر الکُن او تینا خلق آ ہنا ای تینا خلق راہی الکُٹ۔
خلق ءِ سر مسُٹ اما غاسک او ادی آسک پیشن حویلی ٹی پڑچ ئس تالان کریسُر تولوک اسُر جہان نا زیہا تران کریرہ ای ہناٹ سلام تسٹ او کنا سلام ءِ واعلیک کریر، کنے ادی آسک خنِنگ تون مَخسا سوج کریر بر اینو بھاز خوش اُس اللہ خیر کہ؟ ای خوشی ئٹ ورندی تریسا پاریٹ، خیر ءِ ای و میرک جان سہب ئنا شال آ کانہ میرک جان نا ایلم نا برام ءِ گِڑا ہلینہ برام کن تہ، ادی استے پاریٹ کنا پُچ آتے اِستری کیرے کنا لوتھ ئٹی کنا گڑاتے شاغیرے نن سہب ئنا وختی ہنون، ادی اسک جی آؤ کریسہ پاریر بر چاہ تیار ءِ چاہ کُن اللہ خیر کیک ای پاریٹ آخہ چاہ کُنپرہ کاوہ سہب ئنا اُرے تمک ننے ادی آس تا رہان بش مسٹ تینا کُڈی نا نیمہ غا ہناٹ کُڈی ٹی پُترینگاٹ کوس ءِ تینا کشاٹ اینگر آتے ٹی درنجاٹ الماری نا زیہا غمخوار حیات نا کتاب ( کنا داغستان) تخوک ئس، ہرفیٹ تہ کہ مچٹ ئس خوانو، خوانگ ءِ بِناء کریٹ خوانگ خوانگ ئٹی تُغ ئٹی ہناسوٹ۔
سہب ئنا سما کریٹ بَش مسُٹ جاگہ غان تینا ہناٹ سِلّاٹ تینے اما چاہ کرے ایس مونا کنا ارغ و زَرس خریش نا تخا نیرن کریٹ بَش مسُٹ اما و ادی استے آن رخصت کریٹ کہ میرک جان نا نمبر ءِ خلیو و پاو تہ کہ پیشتم کان اُرے تمک سڑک مُرے پدا دے باسک، ہنداڑ تون نا گُمان خلق ئنا زالبول ئس بس ننا خلق آ اما و ادی آستے آن سوج کریسا پارے سما اف نمے۔۔۔؟
اما غاسک آخہ ٹی ورندی تسُر، توار کرے استو نن نیمہ غا خلق ئٹی بدر منٹ بسونو، کئی لاری تیٹی سلاہ ارفوک، کچک آن بار گند کشیسہ، خلق ئنا چنا و پیرینگاتے غرانٹ تریسہ، اُراتے لتاڑیسہ ماناز نا مار میرک ءِ درینو۔
ای دا حوال ءِ بنگٹ بنگ تو کنے آ کس پائے آسمان دھڑنگا، اسہ دم ئتون میرک جان نا بشخندہ کروکا دروشم و اونا ہنینا توار، اوڑتون تفوک تدوکا ہر ہمو ساہت ہراتیٹی اوار مسوسن تیوہ غان کنا خنتیٹی تالان مریسہ ئس، کنے آ داسا دڑد آتا چِرک ئس چکنگ ئس ای ہچ گمان کننگ کتوٹہ کہ وخت ئس میرک جان کنیان دا وڑ ہم زندان تا گواچی جتاء مرو، داسا تو میرک جان تون اوار شال ئنا مہر آتے خنوئی ئس، شال ئنا شار شار کوچہ ءِ چکر کروئی ئس، سریاب نا کسرتیا اوار گھام خلوئی ئس ولے۔۔۔۔! میرک جان نا مُری دڑد آتا چرک ءِ کنیان کنے ہم ہُشا پتک تِس و ای میرک جان نا خیال آتیٹی تینے گم کریٹ۔!
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔