حوثی تا ٹولی انصاراللہ دعوی کرنے کہ سعودی عرب تدوکا ۲۴ گھنٹہ ٹی یمن نا جتا جتا انگا علاقہ تیٹ ۲۸ بالی ءُ جلہو کرینے۔
ایلو پارہ غان امریکی سینٹرل انٹیلیجینس نا ڈائریکٹر جان ریٹکلف ہم یک شمبے کن قاہرہ غا سر مسونے۔ اونا دا چکر سعودی نا ولی عہد نا مصر ئنا چکر آن پد زوت مسونے۔
امریکہ نا محکمہ خارجہ امریکئی حکومت نا ملازم آتتیان سعودی نا شار طائف و ینبع نا مسافری آ رکھ خلکونے۔ ینبع بحیرہ احمر نا زی آ تیل ڈوہنگ کن اسہ بھلو بنجاہی ٹرمینل ئسے ۔ ہرادے مہالو ہم حوثی باغیک جلہو آتیٹ ٹک کرینو۔
ریاض و حوثی تا نیام ئٹ جیڑہ نا سوب آن جہان نا کل آن بھلا خام تیل کشوک آ ملک سعودی عرب آن تیل ئنا ڈوہنگ تون اوار اوار کرکی ہن و بر ہم زیمی مسونے۔
سعودی عرب نا اتحادی امریکہ نا پارہ غان ہم جتا جتاؤ وڑ ئنا ہٹکل مون آ بسنو۔ امریکہ نوز ویب سائٹ ایگزیوس نا رد ئٹ واشنگٹن تدوکا ہفتہ سعودی عرب نا پارہ غان حوثی تا برخلاف بالی تیٹ جلہو کننگ نا خواست ءِ رد کرینے، ایکان فاکس نیوز یک شمبے کن رپورٹ کرینے کہ امریکہ نا صدر ڈونلڈٹرمپ پارینےحوثیک امریکہ نا مڈی تے ٹک کننگ نا است خواہی نشان تسنو۔
سی آئی اے نا ڈائریکٹر جان ریٹکلف یک شمبے کن مصر ئنا صدر عبدالفتاح السیسی تون اوڑدہی کرے۔ دا اوفتا قاہرہ غئے بھلو چکر ئسے۔
دا دورہ سعودی ولی عہد محمد بن سلمان نا مصر ئنا بنجاہی شارئنا دورہ غان منا دے پد مسک۔ ہراڑے او صدر السیسی تون اوار بابالمندب نا شاجو آن کرکی ہن و بر نا رکھ ءِ کننگ نا باور کرفنگ آ ٹک خلکر۔ واہم حوثیک یمن نا کرکی پٹی آ شاجو نا علاقہ نا زی آ تینا کوزہ ٹی کرینو۔
حوثیک داکان مہالو ہمن نا جنگ ئٹی سعودی سروک آتا جوڑ مروک اواری ٹی اوار مننگ نا برخلاف پڑو تسوسر۔ او پاریسر کہ اوفک ٹرمپ انتظامیہ ءِ باور کرفینو کہ بحیرہ احمر ئٹی امریکہ نا کرکی جہاز آتے ٹک کپرور۔
سعودی عرب تینا ڈغار آ حوثی تا جلہو تا زیم آتے تڑفنگ کن زو زو گامگیچ کرے۔یک شمبے نا نن سعودی عرب نا بھلا اخبار آک ریاض آ مروک آ جلہو نا ہچو زکر اس کتور، ایہن تو سعودی سروک آتیٹ جوڑ مروک فوجی اتحاد منا گھنٹہ مہالو پڑو تسس کہ بنجاہی شار آ حوثی تا پارہ غان خلنگوک آ بیلسٹک میزائل ءِ تورسہ بھس کننگا۔
سنت کروک آک پارینو کہ حوثیک ملک ئنا قبلہی کنڈ ئنا شار تیٹ شار والا و اوفتا مڈی تے ٹک کننگ نا کوشست کرینو۔ ہرافتیٹی بحیرہ احمر نا بندرگاہ ہنبع ہم اوار ءِ ۔ پرا کہ سعودی عرب نا تیل ئنا کل ئنا بھلا بنجاہ ءِ۔