اسہ پِن ئسے آن اسہ چیدہ اسکان – ٹی بی پی سرگپ
اینو آن بیست سال مُست، 26 اگست 2006 آ بلوچستان نا علاقہ ڈیرہ بگٹی ٹی پاکستانی لشکر نا لشکر کشی نا وخت آ بلوچ کماش کسرشون نواب اکبر خان بگٹی نا شہیدی بلوچستان نا راج دوست تحریک ءِ اسہ پوسکنو طاغت اس تس۔ دا تدینی بیرہ اسہ سیاسی کسرشون ئسے نا شہیدی الو بلکہ بلوچستان نا سیاست و بلوچ راجی شعور ئٹ اسہ اندنو ہند ئسے نا حیثیت دوئی کرے ہرانا زہم آک اینو اِرا دہائی تدینگ آن پد ہم پاش ءُ۔ اکبر بگٹی نا شخصیت تینا زند ئٹ ہرا سیاسی ہند ئنا خواجہ ئس، اونا شہیدی آن پد او اسہ چیدہ اسیٹ مٹ مس۔ اونا شہیدی پجار، راجی حق، سیاسی اختیار و آجوئی نا سوج آتے گیشتر گنڈا۔
26 اگست بلوچ دیہاڑ و راجی تحریک آ اندنو کڑمب ءُ نشان اِلانے ہرافتے بیرہ وخت تدینگ تون اوار ایسر کننگ مفک۔ اکبر بگٹی نا شہیدی بلوچ ورنا تیٹی ہمو مُست ئنا تغ و مارشت ءِ اسہ وار پدا زندہ کرے ہرادے بلوچ چاگڑد زنک آتیان تینا ملی ٹی تخاسس۔ اسہ اندنو تغ اس ہرا سیاسی زور، لشکر کشی و ریاستی طاغت نا جتا دور آتیان پد ہم تیوہ وڑئٹ ایسر کننگ متو۔
اگہ اسلام آباد ئٹ دا خیال ساڑی ئس کہ اسہ زہم تخوک ءُ راج دوست کسرشون ئسے کسر آن مُر کرسا بلوچ مزاحمت یا راجی تحریک نزور کننگ مریک، گڑا تدوکا بیست سال نا دیہاڑ دا خیال ءِ کم آن کم سوبر آ سوج آتا مونا الم سلفک۔ دا نیام ئٹ اسہ تیوہ ءُ زنک اس بلوچستان نا ویل ءِ پوسکنا سیاسی و راجی شعور تون ہُرا۔ بلکہ 26 اگست نا کل آتیان بھلا معنویت اندادے کہ دا بیرہ اسہ ہنوک وخت ئنا تدینی ئسے نا یات اف بلکہ بروکا وخت ئنا گچین کاری آ ہم پام کننگ آ بیوس کیک۔