برجاء سال نا ادب نا نوبل داد ہنگری نا 71 سالہ ادیب لاسلو کراسناہورکائی ءِ تننگ نا فیصلہ کننگانے۔ دا پڑو دا داد نا حقدار بندغ ءِ گچین کروک نوبل کمیٹی پنچ شمبے نو اکتوبر نا دے سویڈش دارالحکومت ئٹ کرے۔
سیڈن نا دارالحکومت سٹاک ہوم آن رسینگوک حوال آتا ردئٹ دا داد نا فیصلہ کروک سویڈش اکیڈمی نا پارہ غان پاننگانے کہ ہنگیرین مصنف لاسلو کراسناہورکوئی ءِ نوبل داد تون 11 ملین سیڈش کرونے (1.2 ملین ڈالر نا کچ) نا نغد داد تننگو۔
دا پڑو ءِ کریسہ سویڈش اکیڈمی نا ساندہی سیکرٹری و ادبی مؤرخ ماٹس مالم پارے “سال 2025ء نا ادب نا نوبل داد ہنگری نا مصنف لاسلو کراسناہورکائی ءِ تننگ نا فیصلہ کننگانے، ہرانا سوب آن لس وڑہٹ بھیم نا گواچی مُد ئٹ فنی تخلیق نا طاغت نا وار وار پَک کروک آرٹ نا ڈول اٹ اونا اوننگ آن پُر و تینا پلویڑ ئٹ ہلوک تصنیف آک ءُ۔”
اسہ اسہ ہیت ئٹ ملنگوک آ ناول آک
کراسناہورکائی ءِ 2025ء نا لٹریچر نوبل داد تننگ نا فیصلہ نا پڑو تون سویڈش اکیڈمی نا پارہ غان دا ہم پاننگا کہ ہنگری نا دا ادیب نا نوشتوک ناول آک تینا کڑدار و کسہ تیٹ زیات فلسفیانہ مریرہ، ولے اوڑتون اوار تارمئی ئٹ چس و گوڑیفنگ نا سوب مروک ہم، ہرا اسہ اسہ جملہ غان ہم پورو ڈول ئٹ ملنگرہ۔”
داڑتون اوار سویڈش اکیڈمی نا پارہ غان دا ہم پاننگا کہ لاسلو کراسناہورکائی نا تصنیف آک تینا جمعی چاہنداری ئٹ “خوانوک ءِ پورو وڑئٹ تینا پلویڑ ئٹ ہلوک چمشانک تخوک” ءُ۔
کراسناہورکائی نا کیہی تصنیف آک، ہرافتیٹ اونا اولیکو ناول Satantango ہم اوار ءِ، ءِ ہنگری نا پنی فلم ڈائریکٹر بیلا ٹار فلم ئنا دروشم ئٹ ایسونے۔ اونا نوشتوک اولیکو ناول آ جوڑ مروک اندا پن ئنا فلم ئنا وخت 450 منٹ ءِ و او اینو اسکان سینما تیٹ اوننگوک جہان نا مرغنا فلم آتیان اسٹ ءِ۔
جوزہ و سوچ آتیٹ بدل مروک رنگ آک
دا وخت لاسلو کراسناہورکائی 71 سال ئنا سن ئٹی ءِ و اینو کننگو نوبل ادب داد نا پڑو آن مُست ہم او بھاز پنی جہانی ادبی داد و شرف دوئی کرینے، ہرافتیٹ اودے 2015ء ئٹ تننگوک ‘مین بُکر انٹرنیشنل پرائز’ (کتاب آتا جہانی داد) ہم اوار ءِ۔
کراسناہورکائی نا ادبی تخلیق آتا ردئٹ گچین آ ہیت دا ہم ارے کہ اودے بُکر انٹرنیشنل پرائز تننگ وخت آ ہم جیوری نا چاہندار آک دا امنائی کریسر کہ اونا نوشت آتیٹ لس “ہیت آک غیر معمولی مریرہ، ہرا وختس بھاز چُنک و وختس بھاز مرغن ہم مریرہ، ولے تینا روانی ئٹ جوزہ و سوچ ءِ بدل کریسہ رنگ آتا عکاسی کیرہ۔”
نوبل داد ئنا پڑو تون ہنگری نا دا بھاز گچین آ ادیب داسہ تیوہ غا جہان نا ہمو کیہی بھلا ادبی شخصیت آتیٹ اوار مس ہرافتے تدوک وخت آن ہلیس اینو اسکان دا داد تننگانے۔
اوفتیٹ امریکہ نا ولیم فاکنر، برطانیہ نا اِرا وار وزیر اعظم مروک ونسٹن چرچل، امریکہ ارنسٹ ہیمنگوے، اونا ہم وطن سیاہ فام مصنفہ ٹونی موریسن و جاپانی نژار برطانوی ادیب ایشی گورو ہم اوار ءِ۔
خدو ادب نا نوبل داد کوریا نا زالبول ادیب ہانگ ءِ تننگاسس۔ جمعی وڑئٹ ادب نا نوبل داد 117 وار و کُل 121 ادبی شخصیت آتے تننگانے۔
