اسلام آباد پریس کلب نا مونا بلوچ زوراکی ئٹ بیگواہ بندغ تا و بلوچ یکجہتی کمیٹی نا دزگیر راہشون تا آجوئی کن اوفتا خاہوت و سیال آتا پارہ غان اینو ارٹمیکو دے ہم تولوک برانز برجاء ءِ۔
تولوک برانز ئٹ خوانندہ، وکیل و بندغی حق آتا جہدکار آک اوار مریسہ برانزی تیتون ہمکوپئی نا درشانی کریر۔
بلوچ بندی تا آجوئی کن خاہوت آک برانزی کیمپ اس خلنگ نا پڑو کریسر، واہم اسلام آباد بست و بند اوفتے خیمہ خلنگ نا موکل تتو دا رکھ آن پد ہم بیگواہ بندغ تا خاہوت آک و ایلو برانزیک ترند پِر ئٹ آسمان نا شیف آ تینا برانز ءِ برجاء تخار۔
درو ترند پِر و پاش تولوک برانز کننگ نا سوب آن چُنا، پیر و زالبول آتے بھاز سختی تیتون مون تروئی تما۔
اسلام آباد تولوک برانز ئٹ بی وائی سی نا راہشون تا و زوراکی ئٹ بیگواہ بندغ تا خاہوت آک اوار ءُ، بی وائی سی راہشون تا خاہوت آک اسلام آباد ئٹ تولوک برانز نا ذریعت ئٹ صوبائی حکومت نا بے سوبری و بی وائی سی نا راہشون تے سیاسی بیر ئنا گواچی کننگ نا برخلاف تینا برانز ءِ ریکارڈ کریسہ ءُ۔
بلوچ بیگواہ بندغ تا خاہوت آک کیہی سال آتیان زوراکی ئٹ بیگواہ تینا بندغ تا آجوئی نا خواست کننگ ءُ۔
درو اسلام آباد نیشنل پریس کلب نا مونا برجا تولوک برانز ئٹ اوار مروک آک پریس کانفرنس کریسہ پاریر کہ اوفک اسہ وار پدا بلوچستان آن تینا پراد ءِ ہتسہ وفاقی بنجائی شار آ بسنو اندا امیت تون کہ بلکہ داڑے اوفتا توار بِننگہ۔
اوفتا پاننگ ئس کہ بلوچستان نا پراد آک ہموڑے کڈ کننگرہ میڈیا غا ترند سنسرشپ خلوک ءِ و راستکی نا در آک بند کننگانو۔
پریس کانفرنس ئٹ خاہوت آک پاریر کہ بلوچستان حوال آتا اسہ بلیک ہول اس جوڑ مسنے ہراڑے بیرہ ہمو بیانیہ پیری کیک ہرا اسٹیبلشمنٹ نا موکل تون تفوک مرے اندن ظلم و تادی نا برخلاف ارفنگوک توار تے چپ کرفنگک۔
اوفتا پاننگ ئس کہ ریاستی ادارہ غاک بلوچستان ئٹ زمینی گواچنی تیان خن تے چپ کریسہ اسہ مصنوعی ایمنی ئسے نا ہیت ءِ کننگ ءُ حالانکہ زمینی گواچنیک داڑان چپ ءُ۔
خاہوت آک دوبہ خلکر کہ 19 مارچ 2025 آ کوئٹہ پریس کلب ئٹ پریس کانفرنس کروکا سیاسی و بندغی حق آتا جہدکار ڈاکٹر ماہ رنگ بلوچ، بیبرگ زہری، گل زادی، بیبو، ماما غفار، شاجی صبغت اللہ، و عمران بلوچ ءِ ریاستی ادارہ تا پارہ غان اسہ سوگو کریک ڈاؤن ئسے نا ردئٹ ٹک کننگا، پدان اوفتے 3 ایم پی او نا ردئٹ بیدس قانود دزگیر ئٹ تخنگا و عدالتی فرمان تیان پد ہم اوفتے آجو کننگتو۔
تولوک برانز ئٹ اوار مروکا آتا پاننگ ئس کہ 22 جون آ 3 ایم پی او نا وخت ایسر مننگ آن پد ہم دزگیر مروک راہشون تے پین 20 دے اسکان بندی کننگا و پدا 8 جولائی آ بیدس حوال آن اوفتے دوارہ دزگیر کریسہ انسداد دہشت گردی نا عدالت ئٹ دننگا۔
عدالت ئٹی اوفتے دروغ نا ایف آئی آر آتا ردئٹ 10 دے نا جسمانی ریمانڈ آ رادہ کننگا ہراڑان پد اوفک پولیس نا دزگیر ئٹی ءُ خاہوت آتے اوڑدہی نا موکل تننگ افس و وکیل آک ہم قانودی کاروائی ئٹ ہڑاند آتیتون مون تننگ ءُ۔
اسلام آباد نیشنل پریس کلب نا مونا برجاء برانز ئٹی اوار مروک آک حکومت نا مونا اِرا اہم خواست تخانو اولیکو بلوچ سیاسی راہشون ڈاکٹر ماہ رنگ بلوچ، بیبرگ زہری، بیبو، گل زادی، شاجی صبغت اللہ، بشیر احمد زہری ماما غفار و عمران بلوچ ءِ دمدستی آجو کننگہ و ارٹمیکو بلوچستان ئٹ زوراکی نا بیگواہی و سیاسی جہدکار آتا دزگیری تا لڑ دمدستی بند کننگہ و غٹ بیگواہ بندغ تے آجو کننگہ۔
برانزیک پاکستانی میڈیا، وکیل، بندغی حق آتا باسک و سول سوسائٹی آن خواست کریر کہ او اوفتا توار جوڑ مریر و جہانی برادری و اقوام متحدہ آن خواست کریر کہ اوفک پاکستان آ زور شاغسہ بلوچ راہشون تا آجوئی ءِ باوری جوڑ کیر تاکہ بلوچستان ئٹ انصاف و بندغی حق آتا بحالی ممکن مننگ کے۔
