اولیکو وار جہانی میوزک اسٹریمنگ ایپس آتیا براہوئی فنکار وسیم عالم نا شئر آ امنائی، ہرا شینک مس۔
دا اولیکو وار ءِ کہ براہوئی شئر پاروک ئسے نا شئر اسہ وخت آ 150 آن زیات ایپس آتیا باقاعدہ آن لائن شینک مرو۔ داکان مالو میر احمد بلوچ و منہاج بلوچ نے پن ئٹ ساؤنڈ کلاؤڈ آ شئرک شینک مریسہ کرینو۔
نوشکے آن تعلقدار وسیم عالم براہوئی شئر باگل نا پِڑ آ چنکو وخت اسیٹی بھاز پنی مروک ورنا ئسے۔ ہرا کیسٹ نا وخت آن شئر پاننگ ءِ بناء کرے و دا وخت اسکان بھلو کچ اسیٹی شئر پارینے۔
علی ساقی نا نوشتہ کروک شئر ‘گم سُم’ ءِ وسیم عالم پارینے ہرادے آن لائن شینک کننگانے۔ دا شئر دا وخت اسکان ڈیزر، انغامی، یوٹیوب میوزک، ایپل میوزک/آئی ٹیونز، سپوٹی فائی، ٹک ٹاک آ شینک کننگانو۔
وسیم عالم نا شئر ءِ شینک کننگ ئٹ شاعر و ادیب عمران فریق کمک کرینے۔ عمران فریق ٹی بی پی تون ہیت کریسہ پارے کہ براہوئی فنکار آتا شوق آک ڈجیٹل دور نا بنا غان گڈ او وڑ سلتور ہرا وڑ کیسٹ آتا دور ئٹی ئسر دانا اسہ سوب دادے کہ مالو اوفتا خواری تیکن میوزک کمپنیک اوفتے گڑاس زر تسرہ ہرافتیان او زند ہم کننگ کریرہ و شونق آتے ہم برجا تخنگ کریرہ ولے داکان گڈ چندی تُو تا خواری تیان پد ہراتم اوفتا ایلبم اس رہلیز مسکہ تو اسہ بندغ آن شیئر مُستی گدرینگسہ مچ بنوکاتسکان سر مسکہ ہرانا سوب آن آخر کمپنیک ہم پیسہ تننگ آن نمن مسر، و شعر پاروکاتا حوصلہ غاک ہم کھٹہ مریسہ کریر۔
عمران فریق پارے کہ دا خیال بس کہ او ہرا وڑ ءِ، ہرا کسرے ہرا دا فنکار آتا شونق ءِ ہم تازہ تخے و ننا میوزک ہم مُستی کائے اندا سوچ اٹی دا کسر مونا بس کہ ہرا وڑ ایلو جہانی آرٹسٹ آک Music distributor آتا کمک اٹ تینا شعرتے مونا اتنگو ہمون گام نن ہم ارفن۔
او آن لائن شینکاری نا فائدہ تا بابت پارے کہ دا شعر آک ہراتم میوزک ایپس یا اسٹور آتیان بننگرہ گڑا دانا اسٹریمنگ آ ہمو فنکار اکن گڑاس پیسہ بریسہ کیک یعنی میوزک اسٹورز آک اوفتے زَر ایترہ۔ داڑان دا مریک کہ شئر پاروکاک تینا خواری تیکن گڑاس داد ہلنگ کیرہ۔ ایلو جوانی دادے کہ دا میوزک اسٹریمنگ آتا کوالٹی شئر تا سفائی داخہ در زیات گچین ءِ کہ داڑے شئر بننگ نا اسہ جتاؤ چَس ئسے۔
مسٹمیکو کل آن بلا جوانی دادے کہ دا میوزک ایپس آتیا ریلیز مننگ آن مست Music Distributor ہر شئر نا جاچ ءِ ہلیک، او اُرک دا دہن مالو کاریم اٹ ہتنگانے یا نہ، دانا ریکارڑنگ صافے یا نہ، دا پین ئسے نا شئر ئس تو اف، دانا میوزک پین میوزک تروک ئسے نا تو اف دا کل گڑاتے ہننگ آن گڈ او نا شئر ءِ ارفک۔ دانا فائدہ دادے کہ ننا فنکار آک ذگر ءُ گڑا مونا ہتور، او براہوئی میوزک ءِ مُستی دریسہ اسہ ہند اس ایتور۔
یاتی مرے وسیم عالم نا دا شئر 150 ایپس آ شینک مرو۔ بڑز پن کروک ایپس آتیا شئر شینک مسونے و ایلو ایپس آتیا شئر ءِ بننگ کن ودار کروئی تمو۔
بلوچستان ئٹ بنوکاک Anghami، Deezer و Jiosaavn آن اسٹ اس انسٹال کیر۔
