نیشنل پارٹی نا راہشون و بندی بی وائی سی باسک بیبو بلوچ نا باوہ ماما غفار قمبرانی ءِ پاکستانی لشکر دزگیر کریسہ بیگواہ کرینے۔
اونا مار ئنا ردئٹ کنا باوہ غفار قمبرانی ءِ کوئٹہ غان بیگواہ کننگانے اندن بیبو بلوچ کنا ہیڑ قید ئٹ ءِ۔ نن پاکستانی حکومت نا دا گام آتا ترند مذمت ءِ کینہ۔
یاتی مرے داڑان مالو پاکستانی لشکر بی وائی سی نا راہشون ڈاکٹر صبیحہ بلوچ نا باوہ ءِ ہم حب چوکی آن دزگیر کریسہ بیگواہ کریسُس۔ اونا یلہ کننگ کن مسڑ نا تینے دزگیر کرفنگ تون تفنگا۔
کنا سیاسی جہد ئنا سزا کنا باوہ و خاہوت ءِ تریسہ ءُ۔ ڈاکٹر صبیحہ بلوچ
بلوچ خوانندہ راہشون و بلوچ یکجہتی کمیٹی نا سروک ڈاکٹر صبیحہ بلوچ دوبہ خلکنے کہ اونا باوہ میر بشیر احمد ءِ حب سپریڈنٹ پولیس آفس آ دننگانے و اودے پاننگانے کہ اونا آجوئی ہمو وخت اسکان مننگ کپک ہرا وخت اسکان ای صبیحہ بلوچ تینا دزگیری تتنوٹ۔
چاگڑدی حوالکاری تلہ غا شینک کروک بیان اسیٹی ڈاکٹر صبیحہ بلوچ پارے کہ کنا باوہ ءِ اسہ ڈوہ اسیکن آخہ بلکہ کنا سیاسی جہد ئنا بنداو آ ارفنگانے و دا قانود اس اف بلکن سیاسی بلیک میلنگ ئسے۔
او پین پارے کہ اونا کاریم تا سوب اونا خاہوت ءِ مالو ہم کیہی وار بھیم ئنا گواچی کننگانے ہراتم ریاست اسہ سیاسی توار ئسے چپ کرفنگ کتئو گڑا اونا سیال آتے ٹک کیک۔
او پارینے کہ ولے ریاست گیرام کیک کہ نظریہ غاک ہمو اُرا تیٹ مفسہ ہرافتیا چھاپہ خلنگ مریک او ہمو اُست آتیٹ جاگئی ءُ ہرا کاٹم ءِ شیف کننگ آن نمن کیرہ و دن انگا کاروائی تیان نن چپ مروفن۔
یاتی مرے اینو سہب ئنا بلوچستان حکومت نا ترجمان ڈاکٹر صبیحہ بلوچ نا برخلاف گمانی ریاست نا برخلاف کروک تران کننگ آ کاروائی نا پڑو کریسس۔
بلوچستان حکومت نا ترجمان شاہد رند اینو کوئٹہ ئٹ میڈیا تون ہیت کریسہ دعویٰ کرے کہ صبیحہ بلوچ درو تولوک برانز ئٹ صوبائی حکومت و ریاست نا برخلاف ہیت کرے ہرادے حکومت سوبری ئٹ اُننگ ءِ و اونا برخلاف کاروائی کرو۔
حکومت دا پڑو آن پد صبیحہ بلوچ نا باوہ ءِ دزگیر کریسہ ایس پی آفس آ دننگانے۔
ترجمان صوبائی حکومت شاہد رند پارینے کہ ڈاکٹر صبیحہ نا ریاست مخالف تران نا برخلاف کاروائی کننگو۔
بلوچ خوانندہ راہشون و بلوچ یکجہتی کمیٹی نا ڈاکٹر صبیحہ بلوچ نا درو بلوچستان نیشنل پارٹی نا تولوک برانز ئٹ اواری و تران آن پد حکومت زالبول باسک نا برخلاف کاروائی کننگ نا پڑو کرے۔
بلوچستان حکومت نا ترجمان شاہد رند ہفتہ نا دے کوئٹہ ٹی میڈیا تون ہیت کریسہ پارے کہ صبیحہ بلوچ درو برانز ئٹ صوبائی حکومت و ریاست مخالف ہیت کرے ہرادے حکومت سوبری ئٹ ہریسہ ءِ و اونا برخلاف کاروائی کرو۔
شاہد رند پارے کہ ریاست کس اسے ہم ریاست مخالف تران کننگ نا موکل تننگ کپک و صبیحہ بلوچ نا برخلاف کاروائی کننگو۔
بلوچستان حکومت نا ترجمان شاہد رند لکپاس نا خُڑک بی این پی برانز نا بابت ئٹ پارینے کہ اختر مینگل اگہ ریڈ زون ئٹ برانز نا ضد آ سلیس گڑا حکومت تون پین کسر ارے۔
او پین پارے پارینے کہ بی این پی ریڈ زون ئٹی برانز کننگ خواہک ولے اونا اجازت ءِ تننگپرو۔ برانز ہراڑے و اخس اُرے اسکان مرو دا بست و بند فیصلہ ءِ کرو۔
ترجمان پارے کہ تیوہ صوبہ ئٹ دفعہ 144 نافذ ءِ، اگہ برخلافی کننگا گڑا قانود کارم ئٹ ہتنگو۔ اگہ اختر مینگل ریڈ زون برانز نا ضد آ سلیس گڑا حکومت تون پین کسر ہم ارے۔
پاکستانی لشکر مُسہ دزگیر ئٹ مروک بندغ آتے کسفینے۔
مشکے آن حوال آتا رد ئٹ مُسہ بندغ نا جون آک خننگانو ہرافتے فورسز آک دروغ نا مون تس ئٹ کسفنگ آن پد بِٹینے ہرافتا چاہنداری ظہور ولد حضور، شاہنواز ولد جلال و حبیب ولد عیدو نا پن تیٹ مسونے۔
علاقائی حوالکار آتا رد ئٹ ظہور و شاہنواز ءِ استو مشکے نا علاقہ شردوہی آن پاکستانی لشکر دزگیر ئٹ ہلکسُس اندن حبیب ولد عیدو بیست دے مالو پاکستانی لشکر نا دو آن زوراکی ئٹ بیگواہی نا گواچی مسوسُس۔
اینو اوڑتون اوار مُسہ بندغ نا جون آک خننگانو ہرافتے بیدادی آن پد سُم خلیسہ کسفنگانے۔
یاتی مرے کہ درو ہم خضدار آن مُسہ بندغ نا جون آک خننگاسر ہرافتے پاکستانی لشکر دروغ نا مون تس تون کسفنگ نا دعویٰ کریسُس ہرافتا چاہنداری پدان زوراکی ئٹ بیگواہ مروک آتیان مسوسُس۔
بلوچستان نا جتا انگا ضلع آتیان دا وخت اسکان ہشت 8 بیگواہ بندغ آتا دروغ نا مون تِس ئٹ خلنگ نا تدینی تا حوال آک رسینگانو اندن کیہی بندغ آتا چاہنداری دائسکان مننگ کتنے۔
بلوچ یکجہتی کمیٹی نا بنجاہی راہشون ڈاکٹر صبیحہ بلوچ پارینے کہ نن مالو ہم پاریسہ بسونن و داسا ہم پانہ کہ نن کس اسیکن اسہ ہم ویل اس ودی کریسہ افن۔ نن راج ئسے نا دروشم ئٹ آزات، شریف و پرامن زند اس گدارینگ نا اُست خواہی تخنہ ولے ہرا زند ءِ ریاست ننے آن پُھلانے، او ننے خلنگ خواہک، ہر وخت ننا عزت نفس ءِ چیلنج کننگک ننے ارفنگک، ننا جون آتے بیابان تیٹ بِٹنگک۔
او پارے کہ اینو قلات نا علاقہ کوہنگ آن تعلق تخوک آ 28 سال ئنا عبدالمالک ولد محمد یوسف، ہرادے یانزدہ اکتوبر 2024 آ تربت آن پاکستانی لشکر زوراکی ئٹ بیگواہ کریسس، اسہ دروغ نا مون تِس اسیٹ شہید کننگا۔
او پارے کہ ویل بیرہ اسٹ ءِ” ہرا زند ءِ ریاست نن کہ گچین کرینے، اودے نن منیپنہ”۔ ریاست نا گچین کروکا زند دادے کہ او خلیسہ کائے و نن چُپ مرین، بیدادی جاہ تیٹ تیوہ زند بند کننگے و نن چُپ مرین، تینا بندغ آتیکن درپدر نا ڈکھ کُننگ آ بیوس کننگے و نن چُپ مرین، ہر وخت مرگ و بیگواہی نا خلیس نا سیخا ٹی تخِنگے و نن چُپ مرین۔ نن دا زند ءِ اسل منیپنہ۔
مستی پارے کہ اگہ ریاست سرپند مریک کہ ویل ماہ رنگ ءِ، صبیحہ ءِ، شاہ جی ءِ یا بیبگر ءِ گڑا ریاست رد سرپند مریک۔ ویل تینٹ ریاست ءِ، انتئے کہ اسکان ریاستی دہشتگردی، ظلم و زوراکی برجا مرو، نن مرین یا مفن، اسہ نہ اسٹ اس الم مرو۔ انتئے کہ اسہ نہ اسٹ سے بش مروئی تمو۔ اندا سوب ویل ننے ٹی اف، ریاست ئٹی ءِ۔ نن تو حق آٹن۔ نن ڈکھ، ظلم و زوراکی، مرگ و بیگواہی نا خلیس آن آزات، پرامن و خوشحال ءُ زند اس خواہنہ۔
دا تو ننے پاکی سے ئے خلک
نوشتکار: جعفر قمبرانی
دی بلوچستان پوسٹ
نن اسہ بھینگ ءُ ملک اسے تون پاسینگوکن۔ ہرا اسٹ تینٹ پِنڈہ نا است آ مرے او ایلو تے انت ایتو پا؟ ہندا سوب آن بلوچستان آ کوزہ گیر جلہو کریسہ ہر وڑ ئنا مال و مڈی آ تینا دوتے ساف کریسہ ہننگ ءِ۔ یانی لنگڑ ءِ لنگر ہس ملانے، سیر پِڈ مننگ ٹی ءِ سفا۔
بدلہ ٹی ننے انت رسینگک دا بھاز اہمیتی ءُ سوج ئسے۔
خڑینک دڑد ارمان انتظاری چیہانٹ مودہ ماتم بے گواہی و ژدغہ انگا جون آک، مودہی آ ائید آک یا اخا۔
ننے گیرام کروئی اف کہ ننے آن ریاست قلات پلنگا، اوڑتون اوار ایلو مسٹ انگا ریاست آک، خاران، لسبیلہ، مکران ہم پنچ دیری ٹی اوِڑدہ کننگار۔ یانی کل آن مالؤ ننا سیاسی چاہنداری نا کاٹم ءِ کُٹار۔
اوکان پد بنا کرے اسہ ہندن ءُ لُٹ و پل نا وخت ئس کہ ہرا دائسکان برجا ءِ۔
دا لٹ پل ئٹی ننا بندغی مڈی تیا دو شاغیسہ آغا عبدالکریم خان احمدزئی، بابو نوروز و ہفت انگا شھید آک، سفر مہراب، شھید شھزاد، حفیظ، وحید و غفار جان استے شھید و واحد کمبر، سنگت ثناء، ڈاکٹر مارنگ، سمی دین، بیبرگ و پین کیہی ہزار آتے دسگیر و بےگواہ کننگا۔
گلزمین ءِ چُنڈ چُنڈ کننگا کہ کراچی،سیستان، ڈیرہ جات و ہلمند اسک پلنگار و داسہ گوادر و سیندک، ریک ئنا ڈک و دائے ہم سمجھا ہمو لڑی ئٹی ءُ۔ یانی گوانڈ کیس تو ننا خیسن ہم ہنِنگ ءِ، ڈغار ہم و ڈغار نا باتیک ہم۔
قوم ئنا پرغنگ و بشخ و بانٹ ئنا تینا بھلو کسہ ئسے۔ چندی قبیلہ غاتے دنکہ تالپور، رزداری و دائے تے بلوچ آن جتا وتا کننگا کہ بلوچ نا بندغی تاغت نزور مرے۔
ایلو مخلوق سوج کیک کہ کراچی بلوچستان نا بشخ مسُنے متنے؟
ای پاو وخت ئسیٹی تالپور قبیلہ نا حکومت تیبہ سندھ ئٹ مسُنے، اینو نا کرن ئٹی زرداری قبیلہ سندھ ئنا آلی بالی تکنگک، پہہ مروک اتیکے داٹی بھلو سبخ ئسے۔
داکان بیدس، چندی تے لالچ ئٹ تینا پارہ غا کریسہ بلوچ قوم ءِ زبان نا پن ئٹ بشخ و چانٹ کننگ کن وارو تسر۔
چندی تے بیوروکریسی نا پن ئٹ چُپی نا سبخ ملا۔
چندی تے خُلیفسہ با تے تا گنڈار کہ نوا قوم ئکن تینا با تے ملور ہیت کرور۔ یانی دووی گنگ و جوڑ آک چٹ گنڈوک مسر۔
خلقی اتیان بھلو کچ اس بے اُرا مسنو۔ خلق آک پرسان (ویران) و بنبیل مسنو، دانا اسہ بھلو مثیال اس نیمرغ نا دیارے کہ اینو بڑیبانگ ءِ انتئے کہ اوڑے “پنچ دیری” نا تالی چٹ آک تولوک اسر۔ چار پیسہ اسے کن ڈس و وس کریر و خلق اتے پڑسان حالیت آ سر کریر۔
ولے ننے خُلوئی اف، قوم اتا تاریخ تیٹی اگہ جہس چی گویرا ودی مسونے تو وخت اس صادق و جعفر نا دروشم اٹ ہم بھاز آ لمہ غاتا کُٹ آک خالی متنو۔
مُستی ہرن تو کتاب خوانوک آتا دو آن کتاب آک پلنگنگ ءُ۔
ورنا سیاہ سر و سیاہ ریش آک بے گواہ مریسہ ءُ۔
روزگار نا پن اف۔ پیسہ ءِ تے مان اف۔ انصاف نا پش اف، وڈی خوری رزاٹ لس کننگانے۔ دُز آک یلہ ءُ خوئشی کیر و مالک آک عدالت آتیٹ پیشی ایترہ۔ جی اؤ دا کالونی و کالونیل نظام اتا پِنز ءِ ۔ دا گڑاتے مروئی ءِ تآنکہ آجو متنن۔
ولے یات سلے کہ نن پنچ دیری نا غلام اُن و پنچ دیری تینٹ ہم اسہ بھلو غلام ئسے، او امریکہ نا غلام ءِ، چین ئنا یا پیسہ نا۔ ولے ارے تو سہی۔ بھاز بھلو غلام ئسے۔۔۔
وخ! یانی نن اسہ غلام اسے نا غلام اُن۔
سوج دادے کہ دا پنڈوخ نن کن انت ہلانے میدان آ؟
ای تو پاوہ ہچ سلتنے۔
پک انگا ہیت دادے کہ دا تو ننے پاکی سے ئے خلکونے۔
داسہ گرج دادے کہ ننا بلوچی ایمان، جیرت و غیرت ساندہ سلے، جہد برجاء سلے ہر گڑا بابت مرو شالہ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
کوئٹہ تون اوار بلوچستان نا کیہی ضلع آتیٹی موبائل انٹرنیٹ سروس دائسکان بند ءِ ہرا نا سوب آن بندغ آتے سختی تیتون مون تروئی تمنگ ءِ۔
کوئٹہ ٹی تدوکا تو ئٹ بلوچ یکجہتی کمیٹی نا برانز نا وخت کیہی دے اسکان انٹرنیٹ سروس بند کننگا و داسا بلوچستان نیشنل پارٹی نا لانگ مارچ آن پد ہم موبائل انٹرنیٹ سروس نا بند کننگ نا لڑ برجا ءِ۔
کوئٹہ و مستونگ ئٹ یکم اپریل آن دائسکان موبائل فون انٹرنیٹ بند ءِ، واہم پی ٹی سی ایل و لینڈلائن انٹرنیٹ سروس کاریم کریسہ ءِ۔ حکومت نا پارہ غان انٹرنیٹ سروس نا بند کننگ نا سوب رکھ ئنا خلیس پاننگسہ ءُ۔
واہم بی این پی راہشون آتا دعویٰ ءِ کہ انٹرنیٹ سروس و کسر تا بند کننگ نا گام آک برانز آتے بے سہب کننگ نا کوشست نا بشخ ءُ۔
انٹرنیٹ سروس نا بند کننگ نا سوب آن شاری تے عئید ئنا وخت آ تینا بندغ خاص وڑئٹ پیشن ڈیہہ تیٹ ہندی مروک آتون حوال ئٹ سختی تون مون تروئی تما۔
یاتی مرے بلوچ یکجہتی کمیٹی نا برانز آ کریک ڈاؤن و ڈاکٹر ماہ رنگ بلوچ تون اوار ایلو سیاسی باسک آتا دزگیری آن پد بلوچستان نا کیہی ضلع تیٹ انٹرنیٹ سروس ہمو وخت بند کننگا ہراتم بی این پی کوئٹہ نا پارہ غا بی وائی سی نا راہشون تا دزگیری نا برخلاف تینا لانگ مارچ نا پڑو کرے۔
بلوچستان نا ضلع ڈیرہ بگٹی آن پاکستانی لشکر اسہ بندغ اس دزگیر کریسہ بیگواہ کرینے۔
بیگواہ مروک بندغ نا چاہنداری قدیر ولد نورحسن بگٹی نا پنا مسونے۔
حوال تروک آتا رد ئٹ اینو سہب ئنا پاکستانی لشکر پن کروک بندغ ءِ زوراکی ئٹ بیگواہ کرے۔
پنجاب نا شار ملتان ئٹ اِرا درزن آ بندغ آک برانز کریسہ حکومت آن بلوچ لبریشن آرمی نا برخلاف کاروائی نا خواست کریر۔
دا برانز ئٹ بلوچ لبریشن آرمی نا دو آن کوزہ مروک ریل ئٹ مرگ ئنا گواچی مروک فوجی کارندہ آتا خاہوت آک اوار مسر و انصاف نا خواست ءِ کریسہ بی ایل اے نا برخلاف کاروائی کننگ نا خواست کریر۔
یاتی مرے کہ برجا سال مارچ ئٹ بلوچ لبریشن آرمی نا پارہ غان جعفر ایکسپریس آ جلہو کریسہ اودے کوزہ کننگاسس۔ کوزہ کننگ نا وخت بی ایل اے کُل ءِ شاری تے یلہ کرے و ریل ئٹ سوار 214 پاکستانی لشکر نا کارندہ آتے بندی کریسُس۔
بی ایل اے بندی تا یلہ کننگ ءِ قیدی تا ہڷ و تِس ئتون تفیسس و پاکستانی لشکر ءِ 48 گھنٹہ نا وخت تِس اندن ہمو وخت پاکستانی لشکر آپریشن ءِ بنا کرے و بی ایل اے کُل ءِ بندی تے مرگ ئنا گواچی کرے۔
دا جلہو آن پد، کوئٹہ غان پاکستان نا ایلو جاگہ تیکن ٹرین سروس سما مفروک وخت ئکن بند کننگا۔
بلوچستان نا شار حب چوکی آن پاکستانی لشکر بلوچستان یونیورسٹی نا لٹریچر ڈیپارٹمنٹ نا ارٹمیکو سیمسٹر نا خوانندہ ءِ دزگیر کریسہ نادرست ہند آ سر کرے۔
بیگواہ مروک ورنا نا چاہنداری کیا بلوچ ولد محمد اشرف، ہند مشکے کلر نا پن ئٹ مسونے۔
خاہوت نا بندغ آک اونا زوراکی ئٹ بیگواہی نا پک ءِ کریسہ دمدستی یلہ کننگ نا خواست کرینے۔
