برطانیہ نا پارلیمان ئٹ بلوچستان نا اجتماعی قبر آتا ہیت
دی بلوچستان پوسٹ تیدری
بہزاد دیدگ بلوچ
بلوچستان نا ضلع خضدار نا علاقہ توتک اٹ بیست و پنچ جنوری اِرا ہزار ہژدہ نا یخ ء ُسہب ئسے تون اسے بلوچ شوان ئس تینا کر ء ِخوافنگ کن مژی نا علاقہ کن پیشتمک۔ مش تا نیامٹ اٹ دا علاقہ گدرینگوکا مسہ سال آن نا درست سلاء بند بندغ تا دوٹی ئس و پین کس ءِ ہننگ بنگ نا موکل الو۔ غٹ چائسرہ دا سلاء بند بندغاک دیر ءُ و دافتے دیر داڑے ایسونے۔ ولے کس دا باروٹ سوج ارفنگ خواتوکہ۔ انتئے کہ داسلاء بند مخلوق نا بَننگ آن مسہ سال مالو اولیکو وار ہژدہ فروری ارا ہزار یانزدہ ٹی پاکستان نا فوج بھلو کچ ئسے ٹی بسوسس۔ دا چنکا گلان پر انگا علاقہ ءِ چارمہ کنڈان ہلکر و اِرا درزن آن زیات بندغاتے دزگیر کریسہ تینتو دریر و سم کاری آن اِرا ورنا ءِ خلیسہ نیمہ علاقہ ءِ خاخر تسوسر۔ ہرا بندغاتے او دزگیر کریسہ تینتو دریسر، اسٹ نا تا لاش منہ وخت آن گڈ رسینگا۔ ایلوتا اینو اسکان حوال رسینگتو۔ دا فوجی آپریشن آن پد فوج اندا سلاء بند بندغاتے انداڑے ہلاسس۔ ہرافک تینے ”مسلح دفاع ” نا پنٹ پاریرہ و تینا کماش شفیق مینگل ءِ پاریرہ۔ ہرا فخر ئٹی پاریرہ کہ نن کشمیر و اوغانستان اٹ جہاد کرینن، داسہ بلوچستان نا کافراتے (آجوئی خواہوک) آتا نیست کن بسونن۔ بھلا ریش والا دا بندغاک تنیا اَلورہ، دافتا ہمراہ فوجی ءُ وردی بینوکا ریش کوٹ آ فوجیک ہم ئسرہ۔ ولے بیرہ اسے ہفتہ اس مالو دا بندغاتے بیست و پنچ آن زیات گاڑی تیٹی پیشتمنگ آ غٹ خناسر۔ اوفتا ہننگ آن گڈ ہموکان فائرنگ نا توار و پراسرار بندغی چیہانٹ آتا توار بند مس۔ بلکن اندا گڑا ہمو بلوچ شوان ءِ اندا جاگہ غا درے کہ اُریو مسہ سال مست داڑے انت مننگ ئس۔
ہانگ کانگ نا ملک اٹ جوڑ مروکا ایشیئن ہیومن رائٹس کمیشن 1984 ٹی اندا مسخت نا بنماس آ جوڑ مس کہ او ایشیا نا ملک آ تیٹی بندغی حق آتے لتاڑنگ آن توننگ و حالیت ءِ جوان کننگ کن کاریم کننگ کیر۔ اوفک 27 جنوری 2014 ٹی اسے دمدستی پریس ریلیز ئس شینک کریسہ پاریر بلوچستان نا علاقہ توتک آن مسہ اجتماعی قبر خننگانو۔ہرافتیان دا وخت اسکا 169 لاش کشانو۔ اوفک پاریر کہ اسے شوان ئس توتک نا علاقہ ٹی بندغ تا جوْن ئنا ٹکر آتے خنا، او علاقہ نا مخلوق و لیویز والاتے حوالتس۔ ہرا وخت ختنگ بناء مس گڑا مسہ اجتماعی آ قبر آتیان 169 لاش کشار۔ اوکان گڈ فوج بس علاقہ ءِ سیل کریسہ تینا کوزہ ٹی ہلک و مخلوق ءِ اوکان پیشتمنگ نا حکم تس۔ علاقہ والا تا پاننگ نا رِد ئٹ اوڑے پین جوْنک ہم ئسر۔ ولے کسے موکل رسینگتو۔ اوکان گڈ فوج دا پڑو ءِ کرے کہ بیرہ پانزدہ لاش کشنگانو۔
دا لاش آتیٹ اِرٹ پوسکنو ئسر، ہرافتا چاہندری ارا بے گواہ مروک بلوچ سیاسی باسک آتیان مس، ہرافتے بلوچستان نا ضلع آواران آن منہ ہفتہ مالو پاکستان نا فوج دزگیر کریسس۔ ہراڑان دا ہیت ءِ پین طاغت رسینگا کہ دا غٹ جوْنک بے گواہ مروکا بلوچ آتا ءُ۔ ایلو جشوک آجوْنک ڈی این اے ٹیسٹ نا پنا بے ڈس کننگار۔ اینو اسکان نہ ڈی این اے ٹیسٹ مونا بس و نہ دا سما تما کہ فوج دا اِرا سد نا کچ جوْن تے ہرانگ درے۔
بلوچ قوم پرست سیاسی کارکن آتا خلاف پاکستان فوج نا ”خلبو و بٹبو” پالیسی نا بناء مننگ آن گڈ دا اولیکو اجتماعی قبر آک الور، داکان مست اولیکو نومبر 2010 اٹ پشین نا علاقہ یارو و بوستان نا نیامٹ اسے اجتماعی ءُ قبر ئسے آن پنچ بندغ تا ولدا 11 مئی 2011 اٹ پنجگور نا اسے اجتماعی ءُ قبر ئسے آن مسہ بلوچ راہشون، آغا عابد شاہ، ماسٹر ستار، و سفیر بلوچ نا جشوک آ جوْن آک ملار۔ ہرانا سوب آن دا خلیس کننگا کہ بلوچستان اٹ اندا وڑ نا درزن آتا کچ بے پِن انگا اجتماعی قبرآک مرور۔
بلوچ سیاسی جماعت آک و بندغی حق آتا تنظیمک ہرا مہالو آن بلوچستان اٹ بندغی حق آتا لتاڑنگ آ برانز کریرہ، توتک نا اجتماعی قبر آتیان پد اوفک تینا برانز آتیٹ پین ترندی ایسر، پاکستان نا روایتی آ میڈیا دا ویل ءِ ڈکھسہ کرے ولے سوشل میڈیا نا کمک ئٹ دا ہیت جہانی میڈیا اسکان سر مس۔ ہراڑان پد منہ جہانی حوالکاری تاک آک دا حوال ءِ تینا پنہ غاتیٹ جاگہ تسر۔ امریکہ نا کانگریس مین لوئی گوہمرٹ تینا امریکی کانگریس نا تران اٹ بلوچستان نا اندا اجتماعی قبر آتا ہیت ءِ کرے۔ دا جہانی زور شاغنگ ءِ خنیسہ بلوچستان نا ہمو وخت نا سر وزیر ڈاکٹر مالک بلوچ تینا کُنٹ آ لوز آتیٹ پاکستان نا فوج نا پِن ءِ ہلنگ نا جاگہ غا شفیق مینگل آ دا دوبہ ءِ خلیسہ، جسٹس نور محمد مسکانزئی نا کماشی ٹی پٹ و پول کننگ کن اسے عدالتی ءُ کمیشن اس ہڈ تس۔
اسے ہفتہ سیٹی بلوچ سیاسی باسک آتیان بیدس ایلوفک ہرا برجاء برانز ارفنگ ئسر، جہانی میڈیا و جہانی بندغی حق آتا ادارہ غاک دا بھلا بندغی المیہ ءِ گیرام کریر۔ نہ داڑا جہانی فیکٹ فائنڈنگ مشن اس ٹہینگ مس، نہ سوج آک ارفنگار۔ غٹ آن زیات گوڑیفوکا گڑا پنچ تو آن پد عدالتی کمیشن نا رپورٹ ئس۔
جسٹس نور محمد مسکانزئی نا کماشی ٹی جوڑ مروکا عدالتی کمیشن نا مونا 57 خنوک شاہد آک تینا بیان آتے قلمبند کریفیر۔ دا 57 شاہد آتیان 38 بندغ آک پاکستان نا انٹیلی جنس ایجنسی و فوج نا خلاف تینا بیان آتے قلمبند کرفیر۔ 20 آن زیات گواہ آک اندا اجتماعی قبر آتیٹ شفیق مینگل نا دو مننگ ءِ پک کریر۔ اسے اندنو علاقہ ئس ہراڑے فوج، انٹیلی جنس ادارہ غاک و اوفتا جوڑ مروکا علاقائی آ ملیشیاء نا خلاف ہیت کننگ نا سزا بھاز سخت مرے و اجتماعی قبر آک رسینگسہ کیر، داخہ کچ ئسے ٹی گواہ آک زرس معنی تخیرہ۔ ولے گوڑیفوک ہیت دا مس کہ کمیشن دا غٹ گواہ تے دا پاریسہ منتو کہ اوفک تینا دوبہ آتے پک کننگ اٹ بے سہب مسونو۔ و دا اجتماعی آ قبر آتیٹ پاکستان آرمی و خفیہ ادارہ غا تا دو مننگ ءِ نہ بیرہ نمن کرے بلکن کمیشن آن شفیق مینگل نا پن ءِ ہم کشنگا۔
جہانی ادارہ غاتا پارہ غان دا بابت چُھپی و داٹی ادارہ غاتا دو مننگ ءِ دن آسراتی اٹ کمیشن نا پارہ غان کشنگ، دا کنڈا اشارہ اس ئسکہ کہ توتک نا اجتماعی قبر آک گڈیکو مرور‘ و نہ بلوچستان اٹ سیاسی باسک آتا زوراکی بے گواہ مننگ نا لڑ ایسر مرو ءِ۔ بروکا سال آک دا ہیت ءِ پک کریر۔ 2014 اسکان بے گواہ مروکا بندغاک ہرافتا کچ 18000 ئس او داسہ وائس فار بلوچ مسنگ پرسنز نا پاننگ نا رد ئٹ 40000 نا کچ رسینگانو، و توتک آن پد بلوچستان نا علاقہ ڈیرہ بگٹی و تربت اٹ پین اجتماعی قبرآک خننگانو۔
دا جنگی آڈو آ تیا جہانی چُھپی انتئے؟ دانا سوب نا چاہنداری کن دی بلوچستان پوسٹ جہانی سیاست و بلوچ سفارت آ خوڑتی اٹ اُروک فرانس اٹ ہندی بلوچ نیشنل موومنٹ نا ڈائسپورا کمیٹی نا آرگنائزر ڈاکٹر نسیم بلوچ تون ہیت کرے، او پاے ”کنا خڑک پاکستان نا جنگی ڈو تیا ہیت کپرنگ یا اونا خلاف ایکشن ہلپننگ نا منہ سوب ءُ۔ ہرافتیٹی اسٹ دادے پاکستان تون اوفتا مفاداک گنڈوک ءُ۔ پاکستان جہانی طاغت آتیکن اسے ریاست ئسے آن زیات اسے کرایہ نا فرم آنبار ءِ۔ ہرا طاغت انت خوائس، ہراوڑ خوائس، اوڑان کاریم ہلک۔ پاکستان تون نہ ”ریاستی” معیار ئسے و نئے قومی اقدار۔ پاکستان ہم جہانی طاغت آ تیکن کاریم وختا خطہ ٹی تینا اثر و رسوخ ءِ زیات کننگ و بلیک میلنگ کن مذہبی ترندی نا ودشت کرے و اینو ہم اودے اسے سلاء اس جوڑ کریسہ جہان ءِ بلیک میل کننگے۔ ارٹمیکو ہیت دادے کہ جہانی طاغت آک خطہ ٹی بدلی آن خلیس اسیٹی ءُ، جہان ءِ دا خلیس ہم پلویڑ کرینے کہ پاکستان نا پاش انگا جنگی ڈو آتیا ہور ارفنگ یا ننا تحریک نا امنا کننگ آن پاکستان نا دا وخت ئنا مذہبی ترندی ایلو ماندہ پاکستان اٹ پین ترند مرو‘ و خطہ و جہان کن جنجال اس جوڑ مرو۔
ڈاکٹر نسیم بلوچ بلوچستان اٹ بندغی حق آتا لتاڑنگ آ جہانی چُھپی نا دوبہ ءِ تیوی جہان نا ادارہ غاتیا خلپک بلکن او داٹی بلوچستان نا سیاسی جماعت آتا نزور سفارت کاری ءِ ہم ذمہ وار سرپد مریک، او پاہک ”اِرا عشرہ پورا مسونو کہ بندغاک بلوچ کن سفارتکاری نا پِن آ پیشن تولوکو۔ ولے افسوز اٹ پاننگک کہ بیست سال آن بلوچ قوم کن سفارتکاری نا پنا تولوکاک ہمدرد و سنگت جوڑ کننگ کتوس۔ جہانی ادارہ غاتے اسکان سرمننگ متو۔ پاکستان نا تاریخی یا دا وخت نا ڈو آتیا ہچ ءُ دستاویزی کاریم متنے۔ دا نا دوبہ ءِ نن دنا کاٹم آ خلین؟
25 جنوری 2014 آن اسے ہفتہ ئس مست درزن تا کچ گاڈی تیٹی سلاء بند بندغاک توتک آن پیشن مریسہ بلوچستان نا اسے پین علاقہ وڈھ باڈری ءِ تینا وتاخ جوڑ کریر۔ بھاز وار ہموڑے اذیت گاہ و اجتماعی قبر آتا تواراک لگار۔ ولے او توارآک جہانی ادارہ غاتا خف تے اسکان سر متوس۔ اسے لس ءُ بندغ اس اوڑے ہننگ نا جیرت کننگ کپک و خن تیان رکھوک ادارہ غاک اوڑے ہننگ خواپسہ۔ ہمو بندغ ہراڑا دوبہ لگاسس کہ توتک اٹ اجتماعی قبر آ تیٹ اونا دو ءِ۔ ہمو شفیق مینگل ہرادے آجوئی خواہوک آک خفیہ ادارہ تا جوڑ کروکا ڈیتھ اسکواڈ نا سرکماش پارہ، ہراڑا 2010 اٹ بلوچ لبریشن آرمی اسے جند ندری جلہو ئس کریسوس۔ او منہ وخت تینے ڈکھنگ آن گڈ 2018 ٹی آجوئی تون پاکستان نا گچین کاری تیٹ اوارمریک۔ و پاش وڑٹ جلسہ کننگ بناء کیک۔ و توتک نا اجتماعی قبر آتا ویل ءِ ہمو قبر آتیٹی ڈم تننگک۔
ولے دا ویل بلوچ آتا مِلی آن سِلنگ مفک، او اسے چنکو کچ ئسے آ ہر تلہ غا کارہ، و یات تریفسہ کیرہ۔ دا ویل ڈرامائی وڑ ئٹ دا وختا ولدا مونا بریک ہراتم برطانیہ نا پارلیمنٹ اٹ نائیجل ایڈمز، برطانیہ نا وزیر برائے دولت مشترکہ و انٹرنیشنل ڈولپمنٹ اسے سوج ئسے نا ورندی اٹ دا منک کہ برطانیہ نا حکومت پاکستان نا علاقہ خضدار، تربت و ڈیرہ بگٹی آن رسینگوکا اجتماعی قبر آتا بارو اٹ چاہنداری تخک۔
توتک نا اجتماعی قبر آتا خننگ آن شش سال گڈ 14 مارچ 2020 آ برطانیہ نا پارلیمنٹ نا پورٹس ماوتھ، ساوتھ انگلینڈ آن لیبر پارٹی نا ایم پی اسٹیفن مارگن، برطانیہ نا وزیر نائجنل ایڈمز آن بلوچستان اٹ اجتماعی قبر آتا بابت سوج کیرہ، ورندی اٹ وزیر پاہک کہ اوفتا حکومت ء ِاندا اجتماعی قبر آتا بارو اٹ جوان سمائے۔
دا وختا سلاء درآمد کروکا ملک آ تیٹ پاکستان جہان نا دئے میکو بھلا ملک ءِ، ہرا کم و وَد 800 بلین ڈالر سالانہ انداڑا خرچ کیک۔ چین، امریکہ و روس آن پد پاکستان اسے بھلو کچ اسیٹی دا سلاء تے برطانیہ آن خوائفک۔ برطانیہ نا وزیر ئسے نا دا ہیت ءِ مونا ہتنگ آن گڈ کہ اوفتے بلوچستان اٹ اجتماعی قبراتا بارو اٹ چاہنداری ارے و دا اسے لس ءُ معلومداری ئسے کہ پاکستان دا خوائفوکا سلاء تے بلوچستان اٹ کاریم اٹ ہتنگ ءِ۔ گڑا داسہ برطانیہ تو پین قانودی و اخلاقی سوب ارے کہ او پاکستان ءِ پین ہم سلاء ایتے؟ و بیرہ دا گڑا ءِ مننگ آن کہ برطانیہ ءِ بلوچستان اٹ اجتماعی قبراتا سما ءِ، گڑا انت برطانیہ حکومت نا بلوچستان اٹ بندغی حق آتا ویل نا ذمہ واری ایسر مریک؟
اندا بابت دی بلوچستان پوسٹ اطالوی صحافی فرانسیسکا مرینو تو ہیت گپ کرے۔ فرانسیسکا مرینو جنوبی ایشیاء نا امور نا چاہندار ءِ و دا سرحال آ اسے کتاب ئس ”ایپوکلپس پاکستان” ءِ نوشتہ کرینے۔ او ٹی بی پی تون ہیت گپ کریسہ پارے ”ای برطانیہ نا وزیر نا دا ہیت ءِ مونا ہتنگ آ گوڑینگاٹ، ولے ای خُلتوٹ۔ نن غٹ جوان چانہ کہ ہرا سلاء و بالی گراب آتے پاکستان آ سودا کیرہ، او بلوچ و پاکستان نا ایلو مخلوق آ کاریم اٹ ہتنگسہ ءُ۔ ای برطانیہ نا قانود آ تیان جوان بلد افٹ، ولے ای تینا ملک ئنا قانود آتے چاوہ۔ اٹلی پاکستان آ سلاء سودا کننگ ءِ حالانکہ 9 جولائی 1990 نا اطالوی قانون 185 دا ہیت آن نمن کیک کہ دونو ہچو ملک ئسے آ سلاء سودا کپس، ہرانا تہہ ٹی جنگ مرے، کہ بیدس اوڑا پیشن آن جلہو مرے، ہرانا موکل ءِ اقوام متحدہ نا چارٹر نا آرٹیکل 51 ہم ایتک۔ او ملک ءِ سلاء سودا کننگ نا موکل اَف ہرا اٹلی نا آئین نا آرٹیکل 11 نا اصول آتیتون ہمکوپہ مف (اٹلی ویل آتا ایسری ءِ جنگ آن کشنگ نا خلاف ءِ) و ہمو حکومت آتے ہرا بندغی حق آتے لتاڑنگ اٹ اوار ءُ۔ تدینگوکا سال نن پاکستان آ 682 یورو نا سلاء سودا کرین۔
اطالوی صحافی نا پاننگ ءِ کہ ہرا بلوچستان نا اجتماعی قبرآتیا چُھپ ءُ، او ہم اندا ڈو اٹ اوار ءُ ”برطانیہ بلوچستان نا اجتماعی قبر آتا بارو اٹ چاہک، پورا دے کہی ہلنگ کنڈ چاہک، اقوام متحدہ چاہک بلکن تیوی جہان چاہک، ولے کس ہچ ہم کپک، و پاکستان آ سلاء سودا کیرہ۔ او سلاء تے بلوچ آتا خلاف کاریم اٹ ہتیک۔ دا نا مطلب دادے کہ نن نہ بیرہ دا ڈو ئنا گواہ اُن بلکن دا بے پن قبر آتا ذمہ وار ہم ارین۔ نن ہمو بلوچ آتا سختی تا ذمہ وار اُن ہرا سال آ تیان تینا دوست آتا واپسی نا کسر اُروک ءُ۔ نن ہمو قبر آتا ذمہ وار اُن، نن ہمو خلنگوکا بلوچ آتا ذمہ واراُن۔ و پاکستان نا ڈو تیٹی اسہ وڑ اوار اُن۔
برطانیہ نا وزیر نا دا پک کننگ کہ اوفتا حکومت بلوچستان نا اجتماعی آ قبر آتا و بندغی حق آتا خلاف ورزی آن پہہ ءِ، تیوی رضا کارانہ اَلو بلکن اودے دا ورندی لیبر پارٹی نا ایم پی اسٹیفن مارگن نا ناگمان سوج آتا ورندی اٹ تروئی مس۔ دا گواچنی بلوچ سیاسی باسک آتا ہمو کوشست آتا بدل ءِ ہرادے او برجاء 2014 آن کریسہ بسونو۔ منہ دے مالو لیبر پارٹی نا پِن کروک ایم پی تون بلوچ نیشنل موومنٹ یو کے لڑ نا اسے وفد ئس اِرا وار اوڑئی کریسوس و اودے بلوچستان نا حالیت آن پپہہ کریسوس و برجاء دا کوشست اٹ ئسر کہ او بلوچستان اٹ مروکا بندغی حق آتا ویل آ برطانیہ نا پارلیمنٹ اٹ سوج ارفر۔ ہرانا برم برطانیہ نا وزیر نا پک کننگ آن بس۔ بلوچ سیاسی باسک آک دا واقعہ ءِ تینکے اسے بھلو سرسہبی اس تکنگو۔
خلیل بلوچ اندا جماعت بلوچ نیشنل موومنٹ نا تدوک دئے سال آن مرکزی چیئرمین ءِ، او برطانیہ نا پارلیمنٹ اٹ بلوچ ویل آ ہیت و گپ ءِ بلوچ سیاسی توار نا سرسہبی تکک۔ دا بارو اٹ نن اوڑ تو ہیت گپ کرین و سوج کرین کہ داسہ برطانیہ نا ذمہ واری انت مروئی ءِ؟ اونا پاننگ ئس کہ حکومت برطانیہ نا پارہ غان بلوچستان اٹ اجتماعی قبر آتا بابت ہیت مونا ہتنگ مسونے، ای سرپد مریوہ کہ دا ہیت ناگمان آن متنے بلکن ننا برجاء برانز، شاہدی تے مونا اتنگ، جہانی تلہ غا پارٹی نا پارہ غان برانز، مظاہرہ غاک و راجکاری میڈیا تون اوار ایلو غٹ مننگ کروک ذریعہ آ تے کاریم اٹ اتنگ نا برم ءِ۔ ای دادے اسے گچین ءُ گام و بلوچ سیاسی توار نا سرسہبی سرپد مریوہ کہ برطانیہ دا منانے ولے ای دا ہم پاش پاوہ کہ بیرہ مننگ بس اف بلکن برطانیہ ءِ داکان زیات ءُ گام ہرفنگ نا خواست ءِ۔ برطانیہ جہانی مخلوق گچین ءُ باسک ئسے و گچین وڑٹ دا خطہ نا حوالہ ٹی برطانیہ نا ذمہ واریک زیات ودیرہ۔ دانا اسے تاریخی ءُ پس منظر ئسے۔ پاکستان ناجوڑ کننگ و بلوچستان آ پاکستان نا کوزہ ٹی برطانیہ نا بھلو کڑدار ئسے، دا رِد اٹ اوننگے گڑا برطانیہ ءِ ِبھاز وختی دا نا نوٹس ہلوئی ئس۔
برطانیہ نا وزیر نا پارلیمنٹ اٹ دا بیان آن مسہ دے مست 11 مارچ 2020 اٹ امریکہ نا دفتر خارجہ پاکستان اٹ بندغی حق آتا لتاڑنگ آ تینا سالانہ رپورٹ ءِ مونا ایس۔ دا سالانہ رپورٹ اٹ بلوچستان اٹ بندغی حق آتا لتاڑنگ آ شابیتی تون اوننگانے و بیگوا ہ مروکا بلوچ آتے ”سیاسی کیزی” نا پن تریسہ دا ویل ءِ اسے گڑتی تون اوننگوک ویل اس پاننگانے۔ و فوج آ دا دوبہ ءِ خلکنے کہ او بلوچ آتے بے گواہ کننگ و ہڑدے بلوچستان اٹ آپریشن کننگ اٹ اوار ءِ۔
بلوچستان اٹ بندغی حق آتا بابت اِرا جہانی طاغت آتا پارہ غان اسے ہفتہ اسیٹی اِرا وڑ نا خبرآک، بلوچ آ تیکن دلبڈی مریر۔ انت دافتیان بلوچستان نا حالیت آتیا اثر تمو؟ دا ہڑتوما پیش رفت آ تیان گڈ اینو 16 مارچ 2020 آ بلوچستان نا بھلا سرحال آک انت ءُ؟ ”کوئٹہ: بے گواہ مروکا تا برانزی کیمپ ءِ 3923 دے ایسر مس۔ بلوچستان نا علاقہ مشکے و واشک اٹ فوجی تا آپریشن برجا ءِ” و ”لیاری ٹی بلوچ بے گواہ مروکا تا خاہوت نا برانز”۔ انت گڑاس مَٹ مرو؟
