بلوچستان نا گروشکی آ استار: عطا شاد
نوشت: پناہ بلوچ | مَٹ: عتیق آسکوہ بلوچ
دی بلوچستان پوسٹ
عطا شاد بلوچستان نا گروشکی آ استار ءِ ہرا رُژنا و ہمیش سلوک خننگک۔ اگاں پاننگے کہ او شاعر اس ئس تو بڑز کردار ئس۔ اگاں پاننگے نغد کار تو بے مثیال ئس، اگاں محقق تو بے مَٹ ئس، اگاں ڈرامہ نگار تو بے بہا ئس، رِجانکار تو اعلیٰ درجہ نا ئس، صداکار تو ہنین توار ئس، اداکار تو زیبدار ئس۔ تیوہ غاتیان زیات او پاش وڑ اٹ زیباغا لائخی تا اسہ زیباؤ بندغس ئس۔
بلوچی شاعری ئس او شہہ مرید، ملا فاضل، جام درک، مست توکلی و درزن آتیان زیات کلاسیکی ادب نا شہہ پارہ غاتا تخلیق کار آتا شاعری نا کلاسیکی رنگ ئس خننگک۔ داڑتون اوار او بلوچی شاعری ءِ پوسکنا شاعری نا خواست آتون اوار کریسہ ہم خننگک۔ او لغت نویسی ئٹ ”اردو بلوچی لغت“، پٹ و پول نا رِد اٹ ”بلوچی نامہ“ و رِجانک نا رِد ئٹ ”درین“ ءِ مونا ہتیسہ تینا لمئی بولی نا خدمت تون اوار ایلو بولی تا اہل دانش ءِ بلوچ و بلوچی دوستی تون اوار کریسہ خننگک۔ عطا شاد بلوچی زبان و ربیدگ، طرز فکر و احساس، سیاسی ہڷ و تس، علمی اظہار و عملی جدوجہد نا علامت ئسے۔
تینا بابت پائک؛
من ءَ دنیائے گُشیت دیوانگ
توگنوکے کہ من ء سار گُشے
یعنی: جہان کنے ابدال پائک
نی گنوک اُس کہ کنے ساری پاسہ
دیر نا زیاتی، پِر نا برجائی نا سوب آن جَل تیت سیلاب نا خلیس آن بچنگ کن ”شہرِ روغان“ آبات کروکا و دوارہ موسمی بدلی و حالیت آتا گواچی مریسہ خانہ بدوشی نا زند ءِ گدریفوکا اندا بلوچ چاگڑد ئٹ حانیؔ وشہ مُریدؔ، بیبرگ و گراناز، سمّو و مست توکلی، لِلّہ و گراناز، دوستین و شیرین، بالاچ و مریم، ملوک و بیلو، سہتی و مراد وَڑ نا ہمیش زندہ مروکا مہر و مابت نا داستان آک ہم ودی مریرہ گُڑا اندا چاگڑد اٹ رند و لاشار، دودائی و رند، بگٹی جھکرانی، مری مزاری، رند و رئیسانی، ابڑو و بنگلزئی تون اوار بے حساب تین پہ تین نا چِک و تاڑ نا گندہ آ دروشم آک ہم خننگرہ۔ سیالداری، سیوتی، دلیری، راست گوئی، مہمانداری، ہمسایہ نا حق آتا خیال تخنگ، نزور تپہ غاتا اساس آ دروشم ہم خننگک، اندا چاگڑدی نا برابر، تپئی ظلم تون اوار ڈنی مخلوق نا کوزہ گیریت و تہہ ئنا زور آور آتا بد مستیک ہم دا تاریخ نا بشخ ء ُ۔
او نوشتہ کیک:
ڈوب گئے تو جھوٹے ٹھہرے
دریا پار کیا تو سچے
ایک سو بھیڑیں رکھنے والے
یہ میرے سردار کا حکم ہے۔۔۔ کود پڑو
عطا شاد ہم اندا بلوچ چاگڑد نا بشخ ئسے۔ سنگانی سر نا مِش تیان ودی مروکا دا بلوچ دانائی، شعور و فہم و فراست نا بڑزی تے دُو خلیسہ آفاقیت آن ہلیس دا جاگہ نا تہذیبی و چاگڑدی حالیت آتیان متاثر مریک و دا حالیت و واقعہ غاتے لوز تا دُر آتیٹ گوفیسہ اوفتا زیبدارو جنساری تون ننے اسکان سر کیک۔
ہراتم نن پانزدہمیکو کرن ئنا متکنا بلوچی شاعر نا کلاسیکل دور آ چمشانک شاغینہ تو ادب برائے زند نا تمبہ غا سلوک خننگک۔ عطا شاد ہم پائک: ”ادب ہمو مریک ہرا زند ئنا دروشم نگاری ءِ کے۔ زند ئٹ انتس جوانے انتس گندہ ءِ ادب اندا پائک۔ اندا نشان ایتک۔ زند ئنا ہزار آ بشخ آکو، ہزار آ خواست آکو۔ ادب زند ئنا اندا بشخ و رنگ آتا درشانی ءِ۔ ادب زند اکن ءِ، زند اکن مرے، ادب زند ءِ بیرفک، اندا سوب ادب ءِ زند ئنا آمیز و زندگی آموز مرے۔“
اندا فلسفہ غا سلوک عطا شاد نا شاعری ہم زند ئنا ہر رنگ، ہر بشخ و خواست ءِ پورہ کریسہ زند ئنا آمیز و زندگی آموز نظر خننگک۔ اونا شاعری بلوچستان و بلوچی ادب نا بے بہا آ سرمایہ ءِ۔ او پائک:
بڑا کٹھن ہے راستہ جو آسکو تو ساتھ دو
یہ زندگی کا فاصلہ مٹاسکو تو ساتھ دو
عطا شاد نا بابت افضل مراد نوشتہ کیک: ”عطا شاد بلوچی بولی و ربیدگ، طرز فکر و احساس، علمی اظہار و عملی جدوجہد ناچیدہ ئسے۔ چیدہ دا سوب آن کہ بلوچستان نا تیوہ غا تپہ، بولی و ادب دوست آتیکن اسہ عہد، اسہ دور ئسے۔ اگاں پاش وڑ اٹ پاؤ تو بلوچستان نا شابیت آ ڈغا وسائل و ندارہ، فطرت بارن آ تئو، سخت آ مَش و انسانی لمس آن بے چکار آ ساحل آتیا ہتم نا صوب ءِ، ہلار تا بسنگ نا موسم (ہامین) ءِ۔ گواڑخ نا جغری رنگ نا احساس ءِ، عالم گنگ زر ہوس آ دعوت تروکا فکر ءِ و بولان نا راہشون ءِ۔“
او پائک:
سنگساری میں تو وہ ہاتھ بھی اٹھاتھا عطا
جس نے معصوم کہا جس نے گنہگار کیا
بیرم گوری پائک: ”اونا شئر زندہ و ہمیش آبات ءِ۔ عطا شاد نا آبات مننگ موسمی آباتی اس اف بلکن ضد نا سخت آ ڈغار آ ترکسہ زیبائی تخلیق کیک۔“
محسن شکیل پائک: نظم ”گل کدہ“ ہرا مہر گڑھ نا متکنا میرات نا بابت ءِ، اسہ قوم ئسے نا دنو گدرینگوکو وختس مریک ہرا نا روشنائی آ قوم آک تینا بروکا وخت نا کسر تا پٹ و پول ءِ کیرہ۔ عطا شاد دا نظم ئٹ سرزمین نا تدوکاوخت نا دتر تے روانی بشخوکا رَغ تیا دُو تخیسہ خنانے و دوارہ پائک: عطا شاد نا شاعری بلوچی بولی نا خلقی داستان آتا جتا بشخ آتیا ہیت کیک و اظہار کریسہ خننگرہ۔
رزاق نادر پائک: ”ڈغارنا ہر فرزند آنبار عطا شاد ءِ تیناوطن تون مابت ئس، دا مابت نا درشانی اونا شاعری تیٹ خننگک:
تا عمر سنی قضا کی دستک
زنجیر تھی آشنا کی دستک
عطا شاد نا شاعری ئٹ کوہ کے کرب، گلباخِ خاک، گل کدہ، ہے جسم جسم دھڑکتی رتوں میں آباد، دل کے صحرا میں کھوئے دوستوں، سفیر کوتاہ، ازل کا آتش کدہ، زندگی آئینہ ہے، ماہ بہ دل، ویرانے لوگ، دشت میں سفراء پڑا ہے، پھر مِرے سفینے کا، وفا، سرگنگ زاد ہوس، نقد گہہ خرید، تین کے بعد دو، جنم جنم کی پیاس و بولان، مہناز، حانی و شہ مرید، پھول شرارہ پتھر سبزہ کچھ ہے میری مٹی ہے، گھر باہر ہے زمستان، گل زمین، کرخسہ، چرواہا، دل روئے رات کراہے، بیوہ، پھولوں کی خشک پتیاں، وفا کا مول، تن فروش، نزع، سورج کو کون مارسکتا ہے، ایلو ایلو۔۔
داڑ اسکان بلوچی و اردو بولی نا ہر شئر دا جاگہ نا ہر بندغ نا ڈکھ دڑد ءِ سرپد مریسہ خننگک۔ دا چاگڑد نا زیبائی و گندئی ءِ پاش کیک۔ داڑاسکان کہ بلوچ چاگڑد نا تہذیبی، ربیدگی و چاگڑدی کردار آتا عکس نگاری ء ُ۔ اندن بلوچی لوک ادب نا صنف آتے زیباؤ وڑ اسیٹ شاغیسہ باگل و لاڑک خوشی و مابت، جتائی و ڈکھ و غم نا ساعت آتے، ہالو نا تلہ غا پوسکنا زند ئنا بناء کروکا بادشاہ و برامی نا صفت و خاہوت نا زالبول تا پارہ غان بادشاہ کن نیک دعا تا اُست خواہی، زہیروک نا تینا تیکن کسر اوننگ، مُری و جتائی نا نوشتانک، لولی نا ذریعہ اٹ لمہ نا تینا چنا تون اوار اُست خواہی تا جنسار، لیلڑی ئٹ دوست آ وطن تون ہیت کننگ، لیلی مور ئٹ ہر وڑ نا جوزہ و احساس نا اظہار، ڈیہی ئٹ مابت، ڈکھ و دڑد، زیبائی، اُست خوش آ ساعت آتا بیان و موتک ئٹ دوست خواہ تا ہمیش نا جتائی نا ساعت و کیفیت آتا بابت ہیت کریسہ بلوچ چاگڑد نا گواچنی رنگ آتے خوانوک اسکان سرکیرنے۔
اونا تصانیف آتیٹ سنگاب، برفاب (اردو شاعری مجموعہ) روچ گر، شپ سحار اندیم (بلوچی شاعری مجموعہ) بلوچ ربیدگ نا بابت اٹ ’بلوچی نامہ‘، لَوز گنج اٹ ’اردو بلوچی لغت، ہفت زبانی لغت‘، (حصہ بلوچی)، اندن درین و گشین، بلوچی لوک ادب نا بدل ءُ۔ اونا دا کوڑی ءِ ہلہ کننگان گڈ افضل مراد اونا اردو شاعری ءِ ”اب نیند ورق الٹے گی“ نا پِن اٹ کلیات نا دروشم اٹ شینگ کریفے۔ اونا بلوچی شاعری ”گل زمین“ نا پِن اٹ اوار کریسہ بلوچی اکیڈمی آن شینگ کننگا۔ اونا ڈرامہ غاک (بلوچی، اردو) شینگ مننگ کتنو۔ اودے صدارتی ٹیکی برائے حسن کارکردگی، ستارہ امتیاز تون اوار ایوارڈ آک رسینگانو۔ او ادارہ ثقافت پاکستان، پاکستان نیشنل بک کونسل، مرکزی اردو بورڈ، مقتدرہ قومی زبان و بلوچی اکیڈمی کوئٹہ تون ہم اعزازی اواری تخاکہ۔ کم و وَد 35 سال نا روزگار نا نیامٹ بھازا اوغدہ غاتیا فرض آتا ایسری تریسہ ناظم اعلیٰ آثار قدیمہ بلوچستان نا اوغدہ غا ئس کہ 13 فروری 1997ء ئٹ دا کوڑی ءِ یلہ کرے۔
پارساؤں نے بڑے ظرف کا اظہار کیا
ہم سے پی اور ہمیں رسوا سرِ بازار کیا
اونا زند ئنا ہر بشخ، اونا کڑدار، اونا ہر تخلیق اونا ہر خدمت آ کتاب نوشتہ کننگ مریک۔ اونا بابت لکھنگ نا بھاز خواست ارے۔ دنکہ او تینا تخلیقات و زند ءِ کلاسیکی رنگ بشخا، ننے اونا ہر رنگ ءِ زیبداری تون ہر پارہ غا تالان کروئی ءِ گڑا عطا شناسی نا فرض ایسر مننگ کرو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
