بے گواہ کننگ اسہ جہانی ویل ئسے، خاص وڑ اٹ مسٹیکو جہان نا ملک آتیٹ بش مروک تحریک آتے شیف خلنگ کن دا تحریک آتا کاریمی آ باسک آتے ارفیسہ بیگواہ کننگ نا رواج لَس ءُ گڑا سینا دروشم ئٹی بسونے۔ مسٹمیکو جہان نا ملک آتیٹ دا ویل بھاز بد ءُ رنگ اسیٹی پاش وڑئٹ خننگک انتئے کہ دُن انگا ملک آتیٹ آئین نا حکمرانی نزور مریک و پڑدہ نا پد آن کاریم کروک اسٹبلشمنٹ نا اختیارداریک بے کچ مریرہ، ہرا آسانی تون حکومت ئسے پڑغنگ یا ٹہیفنگ کیرہ۔
اندن دا گڑا بلوچستان ئٹ ہم خننگ مریک، ہراڑے آزادی خواہوک سیاسی باسک، گوانندہ راہشون و بندغی حق آتیکن کاریم کروک باسک آتے بے گواہ کننگ بیست سال آن برجا ءِ۔ تدوکا بیست سال نا بناء ٹی زیات تر بے گواہ کروک بندغاک ایجنسی تا کیز ئٹ منہ تُوہ سروسوج آن گڈ یلہ مسرہ ولے 2008 آن پد دن انگا بے گواہ کروک بندغ آتا بے دادی تیان گدرینگوک آ جون تا خننگ بناء کرے۔
امرکہ سیاسی و بندغی حق آتیکن توار ارفوک باسک آتا بے گواہی اٹ ترندی بریسہ کرے، اندن دانا بدل اٹ برانز ارفنگ ئٹ ہم ترندی بس۔ وائس فار بلوچ مسنگ پرسنز پنی تنظیم بے گواہ مخلوق نا یلہ کننگ کن تدوکا دئے سال آن برجاء وڑٹ برانز ارفیسہ کرینے۔ اندا وڑ نا حالیت آتیا اگاں چمشانک ساڑی آ وخت 20-2019 ئٹ چمشانک اس شاغن گڑا خننگک کہ اینو اسکان مخلوق بے گواہ کننگسہ ءِ، و اینو اسکان وختس زندہ و وختس مڑدہ مونا بریرہ، ولے فرخ دادے کہ داسہ بلوچ بے گواہ تا بابت پاکستانی فوجی اسٹبلشمنٹ نا پالیسی تیٹ اسہ بدلی ئس خننگک۔
پالیسی نا دا بدلی، بلوچ بے گواہ مخلوق ءِ پاکستان نا مرکزی اسمبلی ٹی تولوک پارٹی تیتون سودا گری کن کاریم اٹ ہتنگ ءِ کہ بھاز آ قانود سازی نا کاریم تیٹ اوفتا وفاداری دوئی کننگ مرے۔ دا گڑا ءِ پک ہمو قوم پرست پارٹیک جتا جاگہ تیا کرینو کہ اوفک مرکز ئٹ تحریک انصاف نا حکومت تون ہم کوپئی دا سوب آن کرینو کہ منہ بے گواہ بلوچ یلہ کننگ مریر۔ اسہ پین جاگہ ئسے آ اوفک زوت آتیٹ آرمی ایکٹ کن مُخ تفی نا سوب ءِ ہم منہ پین بے گواہ بندغ یلہ کننءِ پارینو۔
ہمو خاہوت آتا خوشی نا گمان کننگ مریک ہرافتا تیناک بے گواہ مننگ آن گڈ مونا ہتنگرہ، ہرافتے دوارہ دا ہیت ئتون ہچو ہڷ و تس اس اف کہ اسہ سیاسی پارٹی اس بدل اٹ امر ءُ بل ئسے نا مخ تفی ءِ کننگے ولے دا بلوچستان ئٹ رواج ہلپ، دن انگا کاریم تا مخ تفی کننگپ، دا بے بندغی ءُ کاریم ئسے کہ منہ ووٹ کن بندغ تا زند ئنا سوداگری کننگے۔ بندغ نا شرف ءِ دُن لتاڑنگ نا مثیال کولونیل وختا آتیت ہم خننگپک۔
ہرا بلوچ آک یلہ مننگو اوفتا بابت دائسکان ہچو شابیت ءُ دروشم اسیٹ حوال تننگتن ءِ کہ اوفتے ہرا جرم٭ اٹ سال آتیان بے گواہ تخنگاسس، و انت کہ جرم اس ئس اونا ایسری آرمی ایکٹ بل یا تحریک انصاف حکومت نا مخ تفی امر مننگ کرے۔
بلوچ قوم پرست جماعت آک بائدے دن انگا سوداگری تیان مر مریر، انتئے کہ داوڑ فورسز آتیکن کسر ملنگ کہ وہ پین بے گناہ بلوچ خوانندہ و باسک آتے بے گواہ کیر۔ اوفتے ہراتم قوم پرست جماعت آتا مخ تفی نا خواست مس گڑا او سودا گری کن ہر اسہ بلوچ ءِ ارفیرہ دیرہ۔
دن انگا سوداگریک جہانی میڈیا و انسانی حق آتا ادارہ آتا مونا پاش کننگر، کہ او بندغی زند نا قیمت نا دا بے شرفی ءِ شیف خلنگ کیر و اسٹبلشمنٹ آ زور شاغنگ کیر کہ بے گواہ بلوچ آتے بیدس شڑط بندغی حق آتا سوب آن یلہ کننگے، بیدس داڑان کہ اوفتا زند ءِ سودا گری کن کاریم اٹ ہتنگے۔
