اسلم بلوچ، اسہ بلوچ جنرل ئس
دی بلوچستان پوسٹ تیدری
بہزاد دیدگ بلوچ
تدوکا ہفت و یک سال آن بلوچستان ئٹ برجاء آجوئی نا تحریک بڑزی و شیفی، ترندی و کمی، سرسہبی و بے سہبی نا جتا لیک آتیان درکسہ اینو برجاء ءِ۔ دا مرغنا و دتری آجوئی کن تحریک ئٹ بھاز گچین ءُ بڑز بالاد ءُ کڑدار خننگرہ، ولے اسہ اُست ءِ دروکو کڑدار اس بلوچ چاگڑد و تحریک ئٹ اساطیری ءُ ہند اس دوئی کرینے۔
دا شخصیت اسہ مہم جوئیانہ افسانہ ئسے نا بھلا کڑدار آنبار نیامئی تپہ غان گمنامی نا ندارہ نا پد آن ناگمان آن پاش کیک، و دوارہ اونا شجاعت نا کسہ غاک ہر دوی آ مریرہ و او اُرا اُرا پِنی مریسہ کائک۔ تینا ایب کیب ئٹ او اسپارٹکس آنبار باوہ نا ہند تخک و دژمن کن اسہ اندنو بیم ئسے نا علامت ہرا ناگمان آن تینا لشکر تون پاش کریسہ ہر پارہ غا لتاڑک تخک۔ دا کڑدار حضرت ابراہیم آنبار تینا مار ءِ ندر کننگ کن تینٹ گچین کیک، و ہمو ہندا سرکریسہ ندر کیک تا۔ او بھاز وار تینا دژمن نا گیڑ ئٹی بریک، سم و توپ آتا شنزہ ئٹ بریک، اونا مرگ ءِ پک کریسہ اونا دژمن است جم مریک ولے او اسیکہ وا پین جاگہ ئسے آن پین طاغت دوئی کریسہ پاش کیک، سمک اونا بدن ٹی ڈب ہلیرہ ولے مرگ اونا خڑک آ بفک۔ او اندنو رواج ہڈ ایتک ہرافتا مٹ رسینگپک۔ او اسہ وختا بڑز بالاد ءُ سپہ سالار، مبلغ، استاد و مصنف ئسے نا کڑدار ایسری ایتک، و او دا تیوی گڑاتے بیرہ چل و چار سال نا عمر اسکان سرمننگا کیک۔ دا کڑدار نئے اسہ فوک لور ئسے و نئے اساطیر بلکہ بلوچستان نا آجوئی نا تحریک نا گواچنی کڑدار اسلم بلوچ ءِ، ہرادے بلوچ پیر و ورناک جنگول و سیاسی باسک آک شرف تننگ کن ”استاد“ نا پِن اٹ توار کیرہ، و کہنگ آن گڈ اودے بلوچستان نا برجاء آجوئی نا تحریک نا کل آتیان بھلا اعزاز ”جنرل“ نا شرف تننگک۔
25دسمبر 2018 آ اسلم بلوچ تینا پنچ سنگت کمانڈر رحیم مری سگار، تاج محمد مری، اختر شاہوانی، فرید بلوچ و صادق بلوچ تون اوار اسہ خودکش جلہو ئسے نا نشانہ مس و سنگت آتون اوار کذیت کرے۔ ولے اونا شخصیت نا زیم (سحر) و کڑدار نا زہم آک اینو اسکان کڑمبی تیتون بلوچ چاگڑد خاص وڑٹ بلوچستان نا آجوئی نا تحریک ئٹ خننگ مریرہ۔ دانا سوب انت ءِ؟ دا چائنگ کن دی بلوچستان پوسٹ، اسلم بلوچ نا خڑک ہمراہ تیتون احوال کرے۔
سنہ 1975 ئٹ کوئٹہ نا علاقہ ٹین ٹاؤن حاجی غیبی روڈ آ رحیم داد دہوار نا اُراٹی خن ملوک اسلم بلوچ بنائی تعلیم اسپیشل ہائی اسکول کوئٹہ آن دوئی کرے۔ او بلوچستان نا آجوئی نا تحریک تون باقاعدہ وڑٹ ئٹ سنہ 1994 ئٹ ہمو وخت اوار مس، ہراتم مرحوم سردار خیربخش مری بے وطنی ءِ ایسر کریسہ بلوچستان نا شار کوئٹہ ئٹ ہندی مس و اوڑے حق توار نا پن اٹ اسہ اسٹڈی سرکل ئسے نا بناء کرے۔ دا اسٹڈی سرکل ہراڑے چاگڑد و ریاست گچین آ سرحال آک مسرہ، ورنا تا خاص پامداری نا مرکز جوڑ مس۔ اسلم بلوچ ہم دا ورنا تیان اسٹ ئس، ہرا دا پیر آ مارکسسٹ بلوچ سردار ءِ بِننگ کن بسکہ۔ داکان او فیصلہ ارفک کہ اودے انت کروئی ءِ و دا اسٹڈی سرکل آتا بشخ مننگ آن گڈ اسلم بلوچ باقاعدہ 1995 ئٹ منہ سنگت آتون اوار بلوچ لبریشن آرمی نا بنیات ءِ تخنگ و دادے تیوی بلوچستان ئٹ تالان کننگٹ گچین آ کڑدار ءِ ایسری ایتک۔ پنچ سال اسکان چیر زمین بلوچ لبریشن آرمی ءِ منظم کننگان گڈ 2000 ئٹ بلوچ، بی ایل اے نا پن ئتون باقاعدہ سلاء بند جہد ئنا بناء کیرہ، ہرا دا وخت اسکان برجاء ءِ۔ اسلم بلوچ بناء ٹی بلوچ لبریشن آرمی نا تیوہ غان بھلا وتاخ مننگوکا بولان وتاخ نا راہشون (کمانڈر) مریک، ہراڑان گڈ بی ایل اے نا تیوہ غا جنگی بست و بند آتا راہشون مننگک و پک آ حوال آتا رِد ئٹ 25 دسمبر 2018 ئٹ اسہ خودکش جلہو اسیٹی پنچ سنگت تون کہنگ آن کم و وَد یک و نیم سال مُست سنہ 2017 ئٹ او بلوچ لبریشن آرمی نا سرکماش یا کمانڈر انچیف مریک۔
ہراوختا بلوچ لبریشن آرمی تیوی بلوچستان ئٹ سلاء بند کاریم تا بنا کریسس، ہمو وخت بلوچستان لبریشن فرنٹ نا ساڑی آ راہشون ڈاکٹر اللہ نظر بلوچ اسہ خوانندہ راہشون اس ئس، ہرا بلوچ آجوئی خواہوک گَل بلوچ اسٹوڈنٹس آرگنائزیشن آزات نا بنیات ءِ تخا۔ ہرانا بدل ئٹ اودے فورسز دزگیر کریسہ توہ تے اسکان بے دادی تا گواچی کننگان گڈ مرکی کروک حاللیت اٹ مونا ایس۔ جیل آن ضمانت آ یلہ مننگان گڈ اللہ نظر بلوچ سلاء بند مزاحمت نا کسر ءِ ارفے۔
ڈاکٹر اللہ نظر بلوچ ہم اسلم بلوچ ءِ استاد نا پن ئتون توار کریسہ پائک کہ ”جنرل اسلم کنا گواچنی معنہ غاتیٹ استاد ئس، ای اونا شاگرد مسونٹ، او کنے جنگی تربیت تسوسس۔“
اللہ نظر بلوچ ہمو منہ بندغ آتیان ءِ، ہرا اسلم بلوچ ءِ بھاز خڑک آن چائسکہ، اسلم بلوچ نا اولیکو سال دے آ دی بلوچستان پوسٹ ڈاکٹر اللہ نظر بلوچ تون اسلم بلوچ نا بابت ہیت کرے و اونا کڑدار نا بابت سوج کرے گڑا اونا پاننگ ئس کہ ”ای جنرل اسلم بلوچ ءِ بھاز خڑک آن چاوہ، جنگی بابت او بھلو منصوبہ ساز اس ئس، میدان جنگ ئٹ دژمن نا مونا امر او سنگت آتے جنگ تسکہ، اونا ہچو مَٹ اس اَف۔ او پاش ءُ و ہمہ گیر شخصیت ئسے نا خواجہ ئس، بلوچ قبائلی چاگڑد مرے یا شاری زند یا ایلو ہڷ و تس آک، او بھاز زوت تینے حالیت ئتون اوار شاغاکہ۔ جنرل اسلم کونا سنگت و راہشون نا جتائی یخین ئٹ اسہ تاریخی المیہ ئسے ننے اونا پین خواست ئس ولے انقلاب تینا چُناتے تینٹ کنیک۔ جمعی بلوچ تحریک آ اونا شہادت نا بد ءُ اثر تمپرو انتیکہ اونا شہادت بلوچ راج، خاص وڑٹ بلوچ مزاحمت کار، و بلوچ سیاسی باسک آتیکن اسہ پوسکنو جوزہ اس ودی کرینے و اوفتا پام ءِ کاریم تا پارہ غا زیات کرینے۔ جنرل نا نظریہ بھاز سوگو ءُ نظریہ اس ئس، و دا نظریہ ہر ہمو بلوچ نا نظریہ ءِ ہرا بلوچستان نا آزاتی ءِ زند ئنا بشخ اس سرپد مریک، و جنرل اسلم نا شہادت دا مڷ آتا کڑدار سازی آ بھاز جوانو زیم شاغانے۔“
اسلم بلوچ ءِ بلوچستان نا آزاتی نا تحریک اٹ دا سوب آن ہم گچینو ہند اس دوئی ئس کہ او بلوچ بلوچ راہشون تیان چَپ نہ بھلو قبائلی پد رند اس تخاکہ و نہ سیاسی، ولے او بیرہ تینا لائحی، خواری و برجاء توروک مزاج آن اسہ سپاہی آن ”جنرل“ اسکان نا پند ءِ خلک۔ بلکن اندا سوب بی ایل اے نا تہہ ئٹ اسہ بڑز کمانڈر اس مننگ آن بیدس ہم، او اسہ پوسکنو ہیت و گپ، و تحریک اس بناء کرے، ہرانا نظریہ دا ئس کہ تنظیم ءِ تیوئی اداراجاتی و جمہوری ساخت ئتون شاغنگے و اختیار و کماشی نا معیار قبائلی پد رند آتا جاگہ غا لائخی آ مرے۔ ہرا بی ایل اے نا تہہ ئٹ اختلاف نا سوب مس، ہرا ایسر آ تنظیم نا قدامت پسند آتا جتائی، بناء غان ادارہ سازی و اسلم بلوچ نا راہشوئی آ ایسر مس۔
اسلم بلوچ میرات ئٹ تالان ءُ لشکر اس ہلیتو، بلکن او دو نیم سال نا چنکا وخت ئٹ ہمو ادارہ ٹہیفے، ہرا اونا تغ ئس، اندا سوب رواج آتیان چَپ اونا ہننگ آن گڈ بی ایل اے نا راہشونی نہ اونا خاہوت ءِ تننگا، نہ قبیلہ ءِ، اولیکو وار جمہوری وڑ ئٹ راہشونی خوانندہ ورنا تپہ نا دُوٹی مس و اسہ گدرینگوک خوانندہ راہشون بشیر زیب بلوچ بی ایل اے نا سرکماش مس۔
بلوچستان یونیورسٹی نا تدوک خوانندہ و بلوچ خوانندہ گَل بی ایس او آزات نا اِرا وار چیئرپرسن مروک بشیر زیب بلوچ پائک کہ ”استاد اسلم بلوچ بیرہ کنا استاد اَلو، او ہر بلوچ جہد کار نا استاد ئس، دانا تیوہ غان بھلا سوب دادے کہ بلوچ جنگ آجوئی ءِ پوسکنا کسر تے اسکان سرکننگ آ اونا مرکزی کڑدار ئس۔
دی بلوچستان پوسٹ بی ایل اے نا ساڑی آ سرکماش بشیر زیب بلوچ تون اسلم بلوچ نا سال دے ئنا رِد ئٹ حوال کرے و اوڑان سوج کرے کہ انت سوب ءِ کہ اینو اسکان اسلم بلوچ نا ذکر بلوچ تحریک ئٹ اسہ اساطیری کڑدار ئسے نا وڑک مریک، اونا پاننگ ئس کہ ”جنرل استاد اسلم بلوچ، ہرا سفت آتا خواجہ ئس و اونا اخسو بھلو کڑدار اس ئس، او دا پند ئٹ اخس سختی تیتون مون تس، ای سرپد مریوہ دائسکان تیوہ غا مخلوق ءِ دانا درک ہم اف۔ بلکن بروکا وخت اٹ مورخ اونا بڑز بالاد آ شخصیت ءِ پورہ سرپد مننگ کرو۔ استاد اسلم تینا دور آن بھاز مُونی ئس۔ جنرل گیاپ، ہوچی منہ، چی گویرا و ایلوفک ہرا چاگڑد آتیٹ ودی مسر، و ہراتم انقلاب نا بشخ مسر، اوڑے چاگڑد انقلاب کن تیار ئسر، ولے جنرل اسلم بلکن وخت آن مُست ودی مس، او بیرہ ہشت سنگت نا ہمرئی تون ئس و چاگڑد اسہ تحریک اسیکن تیار اَلو۔ ای وخت وخت ٹَک خلیوہ کہ اگہ اوفتیانبار استاد اسلم ہم انقلاب کن مالو آن تیار اسہ چاگڑد اسیٹی وڈی مسکہ گڑا او دا یات کروک شخصیت آتیان ہم بھاز زیات جہانی وڑٹ پنی ءُ شخصیت اس مسکہ۔ او بلوچ چاگڑد ئٹی دلیری نا اسہ چہدہ اس جوڑ مسونے، او پوسکنا بلوچ گوریلا مِڑ تس نا سرکماش ءِ۔ امر کہ تاریخ نا گامک مستی سریسہ کرور گڑا پوسکنا زنک گچینی ئٹ سرپد مرو کہ اینو ہرا بدلی تے اسلم بلوچ ایس، ہرا گڑاتے او درستی راستی کریفے، او امر تاریخ نا مون ءِ پین کنڈ ئسے آ شاغور، و دوارہ جنرل اسلم نا کڑدار تون بلکن پورہ انصاف مرو۔“
انت بلوچ لبریشن آرمی ءِ اونا ہننگ آن نسخان ارفوئی مس؟ دا سوج ئنا ورندی ئٹ بی ایل اے سرکماش پائک کہ ”اگاں ای ذاتی وڑٹ ئٹ پاؤ گڑا اونا شہادت آن بھلو بلکن زند ئٹ کنے پین ہچو سختی اس رسینگتنے، اونا ہننگان اسہ سنگت، اسہ استاد، اسہ سیخا سینا کمی الّمی مرو ولے تنظیم یا راج ءِ ہچ نسخان متؤ انتیکہ نن حالیت جنگ ئٹی ان، او ننا تربیت و تنظیمی ادارجاتی ساخت ءِ اندن شاغاسس کہ شخصیت اخس کہ بھلن مرے اونا ہننگ آن تنظیم ئٹ ہورکی اس ودی مف و تحریک اندن دمدستی تون ہورکی ءِ ایسر کریسہہ برجاء کاریم کے۔ و ای سرپد مریوہ دا ہم اونا گچین آ کاریم تیان اسٹ ءِ کہ دنو بھلو کڑدار اس مننگان گڈ ہم تینا ذات ءِ تنظیمی ساخت آ داخس تمنگ کن ہلیتو کہ اونا ہورکی انداخس زیات مرے کہ تنظیم ءِ نسخان رسینگے۔ او بھاز مُر سرپد مروک اس ئس۔ استاد اسلم نا زند ورنا تیکن گواچنی زند ئنا استعارہ اس جوڑ مسونے و اونا شہادت تیوہ غاتیکن اسہ جوزہ ئسے نا سوب مس۔
بلوچ راجی آجوئی سنگر اسہ بلوچ سیوت ئسے، ہرانا پڑو 10 نومبر 2018 آ مس، ہراٹی چار بلوچ مزاحمتی تنظیم بلوچ لبریشن آرمی، بلوچستان لبریشن فرنٹ، بلوچ ریپبلکن آرمی و بلوچ ریپبلکن گارڈز اوار ءُ۔ دا سیوت ءِ بلوچ تحریک ئٹ اسہ سنگ میل اسینا ہند دوئی ءِ۔ اسلم بلوچ ءِ اللہ نظر بلوچ نا ہمرئی تون دا سوت ءِ ٹہیفنگ نا مرکزی کڑدار سرپد مننگک۔
گلزار امام بی آر اے نا راہشون ءِ، ہرا دا سیوت تون اوار ءِ۔ دی بلوچستان پوسٹ، بلوچ ریپبلکن آرمی نا سرکماش آن اسلم بلوچ نا بابت اونا ہیت آتے بننگ خوائس گڑا اونا پاننگ ئس کہ ”جنرل اسلم بلوچ تون کنا ہڷ و تس مسونے، او اسہ بھاز معاملہ غاتے سرپد مروک بندغ اسیتون اوار اسہ گچینو جنگی راہشون و مُر سرپد مروک بندغس ئس، کنے استاد نا کڑدار بھاز زیمی کرے، او ہمیش تیوہ غاتا اوار ہننگ خواسکہ۔ استاد اینو ننا نیامٹ اف ولے او مسخت ءِ مونی دننگ کن ننے اسہ تیار ءُ روڈ میپ اس تسونے۔ ’براس‘ نا دروشم ئٹ استاد نا تروک روڈ میپ ننا دوٹی ءِ۔ اگہ نن براس کونا سیوت ءِ نزور کرین گڑا ای دا پاننگ کیوہ کہ استاد نا شہادت آن بلوچ قومی تحریک ءِ نسخان مس، اگہ نن استاد نا وَڑ ڈول و روڈ میپ آ سرسہبی تون ہنان دوارہ استاد نا سوچ و فکر آجوئی اسکان ننتون اوار ءُ۔“
اسلم بلوچ دنکہ اسہ آجوئی دوست قوم پرست اس ئس و اسہ مزاحمتی تحریک ئسے نا راہشون ئس ولے او فسطائیت نا بھاز خلاف ئس، او مذہبی ترندی آن بد دریکہ، اندا سوب پاش وڑٹ شیعہ زائرین تا خون ئنا خلاف ہیت کریکہ۔ او جنگی اصول آتا سخت پابند ئس۔ زالبول، چنا، ناجوڑ آتے ہر وڑٹ جنگ ئنا نسخان تیان بچفنگ نا کوشست کریکہ۔ اندا سوب بلوچستان نا ایب کیب نا مظلوم راج آتون اونا کڑمب ءُ سنگتی مسوسس۔
سندھو دیش ریوولیوشنری آرمی سندھ و سندھی راج کن بھلو وخت ئسے آن سلاء بند جہد کننگے۔ صوفی شاہ عنایت ایس آر اے نا کمانڈر ءِ و اسلم بلوچ نا خڑک سنگت ہم مسونے۔ اسلم بلوچ نا بابت اونا پاننگے کہ ”شہید شرفدار استاد اسلم بلوچ تون کنا 2002 آن ہلیس اونا شہادت نا دے اسکان فکری، نظریاتی و مزاحمتی رِد ئٹ اسہ سوگو ءُ سیالی اس مسونے۔ دا تیوہ غا وخت ءِ اگا ای چُنک درشان کیو گڑا، استاد ذاتی حوالہ اٹ مہروان، مخلص، راستگی، ایماندار، مابت تروک و خوشی و غم ئٹ اوار مروک و ایسری تروکا، فکری و نظریاتی بابت بسوک وطن دوست و بناء آن ایسر اسکان تیوی ءِ وطن سرپد مروک و مزاحمتی حوالہ ئٹ پروفیشنل راہشون نا تیوہ غا لائخی تخوک اسہ بھاز گچینو بندغس ئس۔ اندا سوب ءِ کہ او تینا ایسری وخت آ ہم فنافی الوطن (بلوچستان) مریسہ تیوی بلوچستان کن تینا بھلا شہادت آن پوسکنو کسر، لائن آف ایکشن، ندر مننگ، حوصلہ، دلیری و جیرت نا بے مٹ و بیدس شکست ءُ مثیال ہلانے۔ ہرا کسر و رمائشت آتیا ہنیسہ اسہ دے بلوچستان الّمی آزات مرو۔“
ایس آر اے راہشون صوفی شاہ عنایت، دی بلوچستان پوسٹ تون بلوچ تحریک آ اسلم بلوچ آن گڈ نا زہم آتا بابت ہیت کریسہ پائک کہ ”ندر مننگ و شہادت آک راج و تحریک آتیکن معراج مریرہ۔ راجی جہد کار، خاص وڑٹ راہشون آتا شہید مننگان وختی وڑٹ ہورکی و نفسیاتی وڑٹ زہم تو الّمی تمک، ولے ہرا تحریک و تنظیم تون وطن و راج نا پاش ءُ وژن، تنظیمی چاہنداری، مخلصی و ایماندار کاریمی بندغ و گچین مزاحمتی حکمت عملی و پوسکنی مریکک، او دا ودی مروک ہورکی ءِ زوت آن زوت مُر کیرہ و جہد آجوئی و مزاحمت ئٹ ترندی ہتیسہ راج و تحریک ء مونی دیرہ۔ استاد شرفدار اسلم بلوچ نا شہادت آن گڈ بی ایل اے نا راہشونک ہرا فکری، نظریاتی، تنظیمی و مزاحمتی بابت جمعی وڑٹ تحریک ءِ مُستی دننگو، دا بابت تیوہ غا سنگت آک سفت نا لائخ ءُ۔“
اسلم بلوچ رواج آتے پرغوک جنگی کمانڈر اس ئس، اونا لائخی بیرہ توفک اسکان سلوک الو بلکن او ادبی و سیاسی مخلوق ئٹ اسہ پنی ءُ نوشتکار اس ئس، او برجائی تون پوسکنا سرگڑدان کروک سیاسی و چاگڑدی ویل آتیا قلم ءِ چریفیکہ۔ او تینا ہیت آتا درشانی نوشت، بھازا رسالہ، اخبار و ٹی وی چینل آتے انٹرویوں تیٹ کریسہ کریکہ۔
بلوچستان نا ساڑی حالیت آک و آجوئی نا برجاء تحریک آ کڑمبی تون اُروک صحافی، سلام صابر تدوکا دئے سال ئنا نیامٹ بھاز وار جتا رسالہ آتیکن انٹرویو ہلنگ کن اسلم بلوچ تون خن تیان چَپ ہند آتیا اوڑدئی کرینے۔ دا نیامٹ صحافی ئسے نا رِد ئٹ سلام صابر، اسلم بلوچ ءِ خڑک آن خناسس۔ دی بلوچستان پوسٹ سلام صابر تون احوال کرے و سوج کرے کہ او اسلم بلوچ ءِ علمی و سیاسی شعور نا بابت امر خنا، گڑا اونا پاننگ ئس کہ ”نم اسہ بلوچ گوریلہ کمانڈر ئسے نا امرو روایتی دروشم ئس تینا ملی ٹی تخرے، اسلم بلوچ اونا اسُل چَپ ئس۔ بھازا رسالہ تیکن، بھاز وار خن تیان چَپ ہند آتیا کنا و اسلم بلوچ نا اوڑدئی مسونے و ہر وار اوڑتون توفک تون اوار کتاب آتا بنڈل اس خناٹا۔ اودے خواننگ نا اسل بھاز شونک ئس۔ و اونا خواننگ بھاز شابیت ئس۔ فلسفہ، تاریخ و علم تفسیات آ پبی وڑٹ چاہنداری تخاکہ۔ او سوج آتا سیدھا و بیدس سرگڑدان کننگان کڑمب ءُ ورندی تسکہ۔ تیوہ غان گچین آ ہیت اونا نوشت آک ئسر، اگہ نم اونا نوشت آتے خوانرے گڑا نم یخین کننگ کپرورے کہ دا نوشت آک اسہ اندنو بندغ ئسے نا ءُ ہرا بیرہ دئے جماعت اسکان خوانانے، بلکن اونا نوشت آتا رموز، لوز آتا ارفنگ، خیال نا کڑمبی و دلیل آک نمے دا زیم ءِ ایتور کہ دا اسہ بھلو ادارہ ئسے آن ڈاکٹریٹ کروک بندغ ئسے نا نوشت آکو۔ اسلم بلوچ اسہ جنگول اس ئس، ولے اونا جنگ پورہ اونا سیاسی نظریات آتیا جِک ئس۔ او تینا نظریہ غا ترند، و ایسری سلوک مسکہ، ولے او مون پہ مون نا بندغ نا ہیت آتے بھاز خوڑتی تون بنگکہ و اگہ اودے گچینی ئٹ دلیل تننگوس گڑا وا مون والا نا ہیت آن بیدس دلیل آن نمن متوکہ۔
اسلم بلوچ اسہ بھلو وخت ئسے آن بلوچستان نا آجوئی نا تحریک ئٹ اسہ سحر انگیز، بڑز بالاد شخصیت ئسے نا ہند دوئی کریسس، ولے مجید بریگیڈ نا ٹہیفنگ و اودے متحرک کننگ، اونا اندنو کڑدار اس مسونے ہرا اودے اونا دژمن نا خن تیٹ بھاز خطرناک و سنگت آتا خنتیت ہمیش زندہ مروک جوڑ کیک۔
مجید بریگیڈ نا ٹہیفنگ نا پڑو ہمو وخت مس، ہراتم 2010 ئٹ مجید لانگو ثانی فورسز تون اسہ دو پہ دو مِڑ تس اسیٹی کذیت کرے۔ دا واقعہ غان اسہ سال ئسے آن گڈ 30 دسمبر 2011 ئٹ مجید بریگیڈ تینا اولیکو کاریم ءِ کیک۔ ہراتم درویش بلوچ تدوکا وفاقی وزیر نصیر مینگل نا مار شفیق مینگل نا اُراغا خود کش جلہو اس کیک۔ بلوچ لبریشن آرمی نا میڈیا ٹی تروک حوال ئسے نا رِد ئٹ مجید بریگیڈ ءِ ٹہیفوک و اونا سرکماش اسلم بلوچ مریک۔ ولے 2011 آن گڈ مجید بریگیڈ نا کاریم تے توننگک۔ ولے ہراتم 2017 ئٹ اسلم بلوچ، بلوچ لبریشن آرمی نا سرکماش مریک گڑا ایلو سال 11 اگست 2018 غا مجید بریگیڈ دالبندین ئٹ چینی انجینئر آتا اسہ قافلہ ئسے آ خودکش جلہو اس کیک۔ دا جند ندری جلہو کروک پین کس آخہ اسلم بلوچ نا تینا ورنا غا بیست و دو سالہ فرزند ریحان بلوچ مریکک۔ دوارہ منہ تو آن گڈ 23 نومبر 2018 آ مجید بریگیڈ نا مسہ فدائین کراچی ئٹ چینی قونصل خانہ آ جلہو کیرہ۔ دا لَڑ دوارہ اسلم بلوچ اسکان سلپک، اوڑان گڈ 11 مئی 2019 آ چار فدائین گوادر پی سی ہوٹل آ بیست و چار گھنٹہ اسکان کوزہ کیرہ۔
اسلم بلوچ اسہ با عمل بندغس ئس، اندن ہراڑے اونا سنگت آک شابیت ءُ پڑ ئسے آ خننگرہ، اوڑان بد دروک آک ہم اریر ولے کس ہم اونا کڑدار نا بڑزی آن نمن کننگ کپک۔ او ہمو بندغ آتیان ئس، ہرا وخت آن مُست کہرہ، ولے ترندی تون زند کیرہ و وخت آن زیات زندہ مریرہ۔
