بولان ٹی بلوچ لبریشن آرمی نا پارہ غان جعفر ایکسپریس ءِ کوزہ کننگ ءِ بیست و چار گھنٹہ مسونے ، دائسکان بی ایل اے نا خواست آتا بابت ئٹ کوالخواہ ہچو گام گیچ ئس ارفتنے ۔

پاکستان لشکر نا پارہ غان استو آن علاقہ ئٹ لشکر کشی مننگ ءِ ۔

علاقائی ذرائع نا ردئٹ پاکستان لشکر نا گن شپ ہیلی کاپٹر ، ڈرون طیارہ و جیٹ طیارہ لشکر کشی ئٹ بشخ ہلنگو اندن منہ جا تیٹ کمانڈوز شیف کرینو ۔

ہنوکا نن پاکستان لشکر نا پارہ غان ڈرون طیارہ آتیٹ گولہ خلنگا واہم تراک آتیٹ برمتہ و سرمچار آتا نسخان تا احوال دوئی متنے ۔

بی ایل اے نا ترجمان بیان ئٹ پارے کہ بلوچ لبریشن آرمی نا سرمچار آتا بر خلاف قابض پاکستانی لشکر اسہ وار پین غیر زمہ وار و آمخ عسکری جنگجو تون مظاہرہ کریسہ ڈرون جلہو کریر و اِرا گولہ خلکر۔

او پارے کہ اینو نا لغوری آ و بے جان انگا بمباری تا ورندی ٹی گیشتر 10 بندی کارندہ ءِ مرگ ئنا گواچی کننگو ۔ بی ایل اے دشمن ءِ تنبیہ کینہ کہ اگہ پاکستانی لشکر دوارہ جلہو کرے ، چاہے اسہ ہم سم اس خلنگا، گڑا گیشتر 10 کارندہ ءِ کسفنگو ۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارے کہ بی ایل اے نا سرمچار آک سوگو عسکری اٹکل و ترند گام خلیسہ کوزہ گیر لشکر نا زمینی و آسمانی کمک ءِ ہشت گھنٹہ نا مونتس آن پد پدی مننگ آ بیوس کریر۔

بی ایل اے نا ردئٹ کیہی گھنٹہ آتے اسکان برجاء مروک جھڑپ آتیٹ دائسکان 30 آن زیات دژمن کارندہ مرگ ئنا گواچی و کیہیک ٹپی مسنو، اندن کوزہ گیر دژمن ءِ بھاز نسخان ارفوئی تمانے۔

جیئند بلوچ پارینے کہ بی ایل اے تدوکا ہشت گھنٹہ غان ٹرین و اوٹی ساڑی غٹ بندی تے تیوہ دوئی مسنے جنگی اصول آتا ردئٹ، دا 214 بندی تے جنگی قیدی منّنگک و بی ایل اے بندی تا ہڷ و تس اکن تیار ءِ۔

او پارے کہ کوزہ گیر ریاست پاکستان ءِ 48 گھنٹہ نا وخت ایتنہ کہ بلوچ سیاسی بندی، زوراکی ئٹ بیگواہ کننگوک بندغ و راجی مزاحمتی باسک آتے دمدستی و بیدس شڑط آن یلہ کے۔

بی ایل اے ترجمان ودیک پارینے کہ بی ایل اے نا دزگیر ئٹ 214 پاکستانی کارندہ غاتیتون اوار فوجی، نیم فوجی کارندہ، پولیس و ڈھکوک ادارہ تا کارندہ غاک تیوہ رکھوک و جنگی قانود آتا ردئٹ تخوک ءُ اگہ پن کروک وخت ئنا تہٹی ننا خواست آک منّنگتور یا کوزہ گیر ریاست دا نیام ئٹ اسہ وڑ ئنا عسکری گام خلنگ نا کوشست کرے گڑا غٹ جنگی بندی تے مرگ ئنا گواچی کننگو و ٹرین ءِ تیوہ وڑئٹ بھس کننگو ہرانا ذمہ واری پاکستانی لشکر آ مرو۔

اونا پاننگ ئس کہ دا پڑو سوگو و ایسری ءِ کوزہ گیر دژمن خبڑدار کننگک کہ بی ایل اے تینا ہر فیصلہ غا تیوہ، جُوان و دمدستی کاریم کننگ نا لائخی تخک۔

بلوچستان نا ضلع سبی ٹی سلہہ بند بندغ آک کوئٹہ غان پشاور آ ہنوک جعفر ایکسپریس آ جلہو کریسہ ٹرین آ کوزہ کرینو۔

کوالخواہ تا ردئٹ جعفر ایکسپریس 9 بوگی تیا تالان ءِ ہراٹی پنچ سد بندغ نا کچ مسافر سوار ءُ۔

ریلوے ترجمان نا ردئٹ جعفر ایکسپریس ئٹی چار سد آن زیات مسافر سوار ءُ و جمعی وڑئٹ نو بوگی ءُ۔ اونا پاننگ ءِ کہ ٹرین ئٹ بھازی سرکاری ملازم آک سوار ءُ و ڈرائیور ٹپی مسنے۔

ایلو پارہ غان بلوچستان حکومت نا ترجمان تدینی ءِ پک کریسہ پارینے کہ کوئٹہ آن پشاور آ ہنوک جعفر ایکسپریس آ گڈالر و پیرو کنری نا نیام ئٹ ترند سم کاری نا حوال آک ءُ۔

میڈیا غا شینک کروک بیان نا ردئٹ حکومتی ترجمان پارے کہ سبی اسپتال ئٹ ایمرجنسی نافذ کننگا و ایمبولینس آتے ہمو ہند ئنا پارہ غا رادہ کننگانے۔

کوالخواک سبی اسپتال ئٹ ایمرجنسی نافذ کننگ آن پد کوئٹہ نا غٹ اسپتال آتیٹ ایمرجنسی نافذ کریسہ ڈاکٹر آتے خبڑدار کرینو۔

اندن شار ئٹ ہیلی کاپٹر آتا پیری ہم برجاء ءِ۔ واہم کوالخواک حالیت نا بابت دائسکان ہچو شابیتی حوال مونا ہتنو۔

ایلو پارہ غان بی ایل اے نا ترجمان جیئند بیان اسیٹی پارینے کہ سرمچار آک جعفر ایکسپریس آ کوزہ کننگ آن پد کوزہ گیر لشکر نا زمینی کارروائی ءِ تیوہ بے سہب کرینو۔ ترند جھڑپ آتیان پد پاکستانی زمینی ٹولیک پدی مننگ آ بیوس مسر، واہم پاکستانی ہیلی کاپٹر و ڈرون آتا بمباری دائسکان برجاء ءِ۔

ترجمان پارے بی ایل اے پاش خبڑدار کیک کہ اگہ آسمانی جلہو دمدستی توننگتئو گڑا سد آن زیات بندی تے بروکا اسہ گھنٹہ ٹی مرگ ئنا گواچی کننگو۔ دا کارروائی ٹی بی ایل اے نا مجید بریگیڈ، ایس ٹی او ایس، فتح اسکواڈ و زراب یونٹ نا سرمچار آک جُوان جوابی کارروائی ٹی اختہ ءُ، و ہر فوجی جلہو نا بھیم بش کروک ایسری اس مرو۔

او پارے کہ دژمن لشکر نا سد آن زیات کارندہ غاک دائسکان ہم بی ایل اے نا دزگیر ئٹی ءُ۔ کوزہ گیر لشکر تون دائسکان ہم وخت ارے کہ او آسمانی بمباری بند کریسہ تینا کارندہ تا زندگی تے رکھے، نہ گڑا غٹ بندی تا مرگ ئنا زمہ وار پاکستانی لشکر آ مرو۔

اسہ پین بیان اسیٹی ترجمان پارے کہ بی ایل اے نا سرمچار آک جعفر ایکسپریس آ کوزہ کننگ آن پد مزاحمت نا وخت آ 182 بندی تے دزگیر کرینو۔ دا آپریشن ئٹ دائسکان یانزدہ کارندہ مرگ ئنا گواچی مسنو، اندن اسہ ڈرون اس ہم خلیسہ بِٹنگانے و جعفر ایکسپریس دائسکان بی ایل اے نا سرمچار آتا دوٹی ءِ۔

بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارے کہ ننا سرمچار آک بولان نا علاقہ ڈھاڈر ئٹ مشکاف نا ہند آ اسہ بھلو کارروائی اسیٹی ریلوے ٹریک ءِ تراک ئٹ بھس کریسہ جعفر ایکسپریس ءِ تورینو۔ سرمچار آک ترندی ئٹ ٹرین آ کوزہ کریسہ غٹ مسافر آتے بندی کرینو۔

ترجمان پارے کہ بی ایل اے پاش خبڑدار کیک کہ اگہ کوزہ گیر لشکر نا پارہ غان اسہ ہم آپریشن اس کننگا گڑا دانا بھلو نتیجہ پیشتمور، و سد آ بندی تے مرگ ئنا گواچی کننگو، ہرانا زمہ واری کوزہ گیر لشکر مرو۔

اسہ پین بیان اسیٹی ترجمان پارے کہ بندی تیٹ پاکستانی لشکر، پولیس، اے ایف ٹی، و آئی ایس آئی نا حاصر سروس کارندہ غاک اوار ءُ، ہرا چھٹی تیا پنجاب آ ہِننگ ئسر۔

او پارے کہ دا آپریشن نا وخت آ بی ایل اے نا سرمچار آک زالبول، چنا و بلوچ مسافر آتے یلہ کرینو، اندن ایلو غٹ بندیک کوزہ گیر لشکر نا حاضر سروس کارندہ غاک ءُ۔

ترجمان ودیک پارے کہ دا کارروائی نا سروکی ءِ بی ایل اے نا جند ندر یونٹ مجید بریگیڈ کننگ ءِ، ہرادے فتح اسکواڈ، ایس ٹی او ایس، و زراب نا تیوہ مخ تفی دوئی ءِ۔

ترجمان پارے کہ جعفر ایکسپریس آ کوزہ نا وخت آ دائسکان شش فوجی کارندہ مرگ ئنا گواچی و سد آ مسافر آک دزگیر کننگانو۔ ہرانا زمہ واری ءِ ننا تنظیم بی ایل اے ارفک۔

پنجگور ئٹ بیگواہ بندغ آتا خاہوت آتا پارہ غان وشبود پولیس اسٹیشن آن سی پیک اسکان برانزی ریلی اس کشنگا۔

پولیس اسٹیشن وشبود نا مون آن تولوک برانز ئٹ بیگواہ مروک عاقل، حوالدار باب جان محمد بلوچ، ظہیر بلوچ، شعیب بلوچ و ایلو خاہوت آک بشخ ہلکر۔

پولیس اسٹیشن نا مون آن تولوک برانز ئٹ تران کروک آک پاریر کہ اگہ 24 گھنٹہ نا تہہ ئٹ عاقل و ایلو بیگواہ بندغ آتے یلہ کننگتئو گڑا تربت آ ہنوکا کسر ءِ ہم بند کرون۔

اوفک پاریر کہ ننے کسر ءِ بند کننگ نا شوق ءِ نئے کہ روچہ نا تو ئٹ برانز کننگ نا، ننا بندغ آتے بیگواہ کریسہ ننے برانز کننگ آ بیوس کننگانے۔

اوفک پاریر کہ عاقل و ایلو بیگواہ بندغ آتا یلہ کننگ اسکان تولوک برانز سی پیک کسر آ برجا مرو۔

اوفک پاریر کہ پولیس و ضلعی بست و بند بیوسی نا درشانی ءِ کننگ ءُ پولیس اسٹیشن نا مون آن اسہ شار نا بندغ ئسے ارفسہ دننگک ولے او بیوسی نا عکس جوڑ مریسہ بیرہ تماشا اُریک۔

او پاریر کہ ننا بندغ آک بے ڈوہ ءُ۔ اوفتے ارفسہ تیوہ خاہوت ذہنی ڈول ئٹ بے دادی تیان گدرینگک۔ او پاریر کہ ننا بندغ آتے یلہ کننگے۔

بلوچستان نا ضلع ڈیرہ بگٹی ٹی چنا خننگ وخت آ مروک مرگ آتا لڑ برجاء، اسہ پین لمہ اس درمان نا آسراتی مفننگ آن چنا تون اوار کسک۔

اسہ گمان ئسے نا ردئٹ 13 توہ ئٹی چنا خننگ وخت آ درمان مفننگ نا سوب آن مرگ آتا کچ 76 مسنے ہرافتیٹ زالبول و پوسکن ودی مروکا چناک اوار ءُ۔

یاتی مرے ڈیرہ بگٹی ٹی چنا خنوک زالبول آتیکن جانجوڑی آسراتی مفننگ نا برابر ءِ ہرانا سوب آن بندغ آک ایمرجنسی نا دروشم ئٹ پنجاب نا ضلع رحیم خان یا ایلو شار تیا ہِننگ آ بیوس مریرہ۔

ڈسٹرکٹ ہیلتھ آفیسر (ڈی ایچ او) ڈیرہ بگٹی تینٹ منّانے کہ ضلع نا سرکاری اسپتال ئٹ اسہ گائنالوجسٹ یا زالبول ڈاکٹر اس ساڑی اف۔

بلوچستان نا علاقہ بولان ئٹ اینو مسٹمیکو دے ہم پاکستان نا لشکر کشی برجاء ءِ۔ علاقہ ئٹ ہیلی کاپٹر آتا ہن و بر ہم خننگانے۔

علاقائی حوالکار تا ردئٹ بولان نا علاقہ بارڑی و ایب کیب ئٹ پاکستانی لشکر نا لشکر کشی مسٹمیکو دے ہم برجاء ءِ۔

لشکر کشی نا بنا اِرا دے مالو کننگا ہراڑے لشکر کشی ٹی اختہ پاکستانی لشکر ءِ جانی نسخان تیتون مون تروئی تما، جلہو تیٹ مُسہ کارندہ نا مرگ ئنا گواچی مننگ پک مسنے۔

لشکر کشی ٹی گن شپ ہیلی کاپٹر آتیتون اوار ڈرون طیارہ غاک ہم کاریم ئٹ ہتنگنگ ءُ۔

جوزہ نا دیک منٹ ءُ فکری آ گہوش ءِ بلّن
آجوئی نا سفر  ٹی پنداک  باز مرغن

لاڈی ؤ نخرہ ئی آ سمُّل کہ تینے گڈّر
پانے کفنک خیسُن لپ لپ دتر ٹی پالُن

باریم بڈا تینا یاراک اٹ امٹ کیر
دے ئس تو پیہن آ خنک الّم مرور خیسُن

کپّیِ تے دڑوک انگا ماڑی ٹی مٹ کرونکا
خوائش تے کُو ئسے ٹی نن بے دڑک بٹِنگن

لونڈنگا کاٹم اٹ او دُوتے خلو ء تینا
تف نت ء آ کرو ء بوز اٹ کنو ءِ اندن

خاخر ٹی مٹ مرو ء لگو کا اے پلیتہ
گر فصل ءِ کلّری آ کینک دتر ٹی خرّن

نن آسرات ءُ زند ئس تینا خنون اموتم
گر مخسہ اراتم بشونِ مَشتا الکن

ورنا طلحہ

داتو مجیدی لشکرے چلتن نا دا ولاتٹی
تینے عجب سنگت امر بولانٹی خلانٹک

زندہ کنے پاوہ عجب کلو نا دا دکٹ کریر
ای تو عجب تینے گڑا مارانٹی الانٹک

ای پر خما رٹ بن گڑا اے کا فرا دژمن کنا
تینے پدا ای تو گڑا ایمانٹی سلانٹک

ھیرو فی کسہ بنگنُس یابنتنُس سنگت گڑا
دیچا کہ انت یادو منٹ شاشانٹی گنڈانٹک

راجی ء ار ارٹپ ئنا درما ن بس سریا ب مس
دژمن ناار ار اٹکل اے جولانٹی اڑسانٹک

داسہ اسل وارہ ٹی اف نا دا غلامی بن ذرس
دا زند ء غا ارمان تا ای دیوانٹی سنسانٹک

او باسدی تینے مگہ تینا دتر تیٹ سلسہ
وا پاسہ نی مخلوق ئنا ارمانٹی پنانٹک

باسط ہکلی

بلوچستان نا ضلع خضدار نا علاقہ اورناچ ئٹ نادرست سلہہ بند بندغاک جلہو کریسہ پولیس و لیویز فورس تھانہ غاتے بُن تسر۔

اورناچ ئٹ پولیس نا اسہ کارندہ اس احوالکار آتون ہیت کریسہ پارے کہ ہفتہ نا بیگہ غا سلہہ بند بندغ آتا اسہ بھلو کچ اس شار ئٹ پیہاسس و اوفک پولیس و لیویز فورس نا کارندہ غاتے بندی کریر و اوکان گڈ ہڑتوما تھانہ غاتے بُن تسر۔

پولیس کارندہ نا رِدئٹ سلہہ بند بندغاک ہنیسہ پولیس و لیویز فورس نا کارندہ غاتیان سلہہ تے ہم تینا کوزہ ئٹ ہلکر۔

سرکاری کوالخواہ تا رِدئٹ دا جلہو ئٹ ہچو جانی نسخان اس متنے و رکھ ئنا حالیت ءِ ٹہیفنگ کن فورس کارندہ غاتا بھلو کچ اس اورناچ رادہ کننگانے۔

جلہو نا بابت کوالخواک انت پاریر؟

اورناچ پولیس نا اسہ کارندہ اس پِن ءِ ڈھکنگ نا شرط آ پارے کہ ہفتہ نا بیگہ شش بجہ و بیست و پنچ منٹ آ سلہہ بند بندغ آتا بھلو کچ اس اورناچ ئٹ پیہاسس۔

کارندہ نا ردئٹ سلہہ بند بندغ آتا کچ شست آن زیات ئس ہرافک بننگ تون جتا ہند آتیا سنگر ہلکر۔ ‘سلہہ بند بندغ آک شار ئٹ پولیس و لیویز فورس نا تھانہ غاتے گھیڑ ئٹ ہلیسہ اوفتا کارندہ غاتے بندی کریر۔’

پولیس کارندہ نا پاننگ ئس کہ سلہہ بند بندغ آک پولیس و لیویز فورس نا تھانہ غاتیان سلہہ و ایلو فوجی مڈی تے تینا کوزہ ئٹ ہلنگ تون تھانہ غاتے خاخر تننگ تون لیویز فورس نا اِرا گاڑی ءِ ہم بُن تسر۔

پولیس کارندہ نا رِدئٹ سلہہ بند بندغ آک اوڑے نیم گھنٹہ آن زیات ساڑی مسر و ہنیسہ پولیس نا اسہ گاڑی ئسے ہم تینتون دریر۔

محکمہ داخلہ بلوچستان نا اسہ بڑزکو کوالخواہ اس دا رِدئٹ پائک کہ سلہہ بند بندغ آک پولیس تھانہ آن دئے ئنا کچ توفک دریر، و لیویز فوس نا کارندہ غاتیان کوزہ ئٹ ہلوک سلہہ تا کچ اِرٹ ئس۔

اوفک پاریر کہ دا جلہو ئٹ ہچو جانی نسخان اس متنے و جلہو آن گڈ جلہوکار آک مش تا پارہ غا ہنار۔

خضدار ئٹ اسہ بڑزکو کوالخواہ ئس پارے کہ اورناچ ئٹ رکھ حالیت کن فورس ئنا بھلو کچ ئٹ رادہ کننگانے۔

اورناچ ہرادکن ءِ؟

اورناچ ضلع خضدار نا سب ڈویژن ءِ و دا سہ سخت ءُ مَشی علاقہ ئسے۔ اورناچ خضدار شار آن کم و وَد 130 کلومیٹر مُری آ جاندومی دے کیہی پارہ غاٹی ءِ۔

اورناچ نا آباتی جتا بلوچ قبیلہ غاتیا تالان ءِ۔ ہراڑے ضلع خضدار بلوچستان نا ہمو علاقہ غاتیٹ پِن کننگ ہرا جنگ آن زیات زیمی ءُ ہموڑے اونا علاقہ اورناچ ضلع آواران آن ہم خڑک ءِ، ہرانا پِن ہم جنگ آن زیات زیمی علاقہ غاتیٹ ہلنگک۔

ضلع خضدار ئٹ دننگا ارٹمیکو تدینی

اورناچ ئٹ سلہہ بند بندغ آتا بھلو کچ ئسے نا بننگ و اوڑے پولیس و لیویز فورس نا تھانہ غاتے خاخر تننگ دا ڈول ئنا اولیکو تدینی اف۔

داڑان مُست برجا سال جنوری نا بناء ٹی ضلع خضدار نا شار زہری ئٹ ہفتاد آن زیات سلہہ بند بندغ آک پیہاسر۔

زہری شار ئٹ سلہہ بند بندغ آک لیویز فورس نا تھانہ، نادرا نا دفتر، بینک و میونسپل کمیٹی نا دفتر آتے خاخر تسوسر و لیویز فورس نا تھانہ غان سلہہ تیتون اسہ گاڑی و موٹر سائیکل آتے ہم دریسر۔

اورناچ ئٹ مروک جلہو نا ذمہ واری ءِ دائسکان کس ارفتنے، و زہری ئٹ مروک جلہو نا ذمہ واری ءِ بلوچ سلہہ بند گل بلوچ لبریشن آرمی ارفیسس۔

زہری ئٹ مروک جلہو آن گڈ 31 جنوری و یکم فروری نا ننکان سلہہ بند بندغ آتا بھلو کچ اس ضلع خضدار نا کیب ئٹ ضلع قلات نا تحصیل منگچر نا ہیڈکوارٹر منگچر شار و اوڑے کوئٹہ کراچی بھلا کسر ءِ تینا دوٹی ہلکوسر۔

دا وخت آ سلہہ بند بندغ آتا جلہو ئٹ پاکستانی فوج نا 18 کارندہ مرگ ئنا گواچی مسر۔