بندغی حق آتیکن کاریم کروک بلوچ راہشون ڈاکٹر ماہ رنگ بلوچ نوبل امن داد اکن پِن کننگانے، دا داد اکن تیوہ جہان آن 338 بندغ و ادارہ پِن کننگانو ہرافتیٹ 244 بندغ و 94 ادارہ اوار ءُ۔

بلوچ صحافی کیّا بلوچ نا ردئٹ ڈاکٹر ماہ رنگ بلوچ ءِ بلوچستان ئٹ برجاء بندغی حق آتا لتاڑنگ نا برخلاف گچین جہد ئنا سوب آن پِن کننگانے۔

یاتی مرے ڈاکٹر ماہ رنگ بلوچ، بلوچ یکجہتی کمیٹی نا سروکی کریسہ، بلوچ حق آتیکن و زوراکی نا بیگواہی تا برخلاف توار بڑز کننگ ءِ اونا سروکی ٹی کیہی برانز و لانگ مارچ کننگانے، ہرافک جہانی تلہ غا بلوچ الس نا ویل آتے پاش کرینو۔

داڑان مُست اودے بی بی سی جہان نا زہم تخوک سد زالبول آتیتون اوار جہانی میگزین ٹائمز نا پارہ غان 100 پوسکن مونی بروک آ راہشون تا دروشم ئٹ منّنگاسس، ہراڑے پدان اودے نیویارک ئٹ ٹائمز میگزین نا مجلس ئٹ اوار مننگ کن ہِننگ وخت آ کراچی ایئرپورٹ آ پاکستانی کوالخواک توریسر۔

وخت آ ساڑی مروک پولیس برانزی تے خڑک مروک اسرائیل نواز برانزی تا اسہ چنکو ٹولی ئسے آن جتا کننگ نا کوشست کرے، واہم ہڑتوم آ برانز آک اسہ ناخوش ءُ تدینی ئسے آن بیدس پورہ مسر۔

نیویارک نا کولمبیا یونیورسٹی نا پیشن آ سئے شمبے آ اِرا سد آن بُڑز فلسطین منوک برانزیک مسکوہی وزیراعظم نفتالی بینیٹ نا برخلاف برانز کریر، ہرا اوڑے اسہ ترانی ہند اسیکن ساڑی ئس۔

7 اکتوبر 2023 آن پد غزہ غا اسرائیلی لشکر کشی نا برخلاف و اسرائیل نا منوک آتا نیام ئٹ یونیورسٹی ٹی اسہ سال سے آن برجا برانز نا پدندارہ ئٹی، اسرائیل نا راستیکو دو ئنا مسکوہی راہشون نا ساڑی مننگ آ ردعمل نا اومیت ئس۔

فرانسیسی حوالکاری ایجنسی اے ایف پی نا ردئٹ کولمبیا فلسطین سولیڈیریٹی کولیشن نا ترجمان تینا بیان ئٹ پارے کہ ‘اندن ءُ بندغ ئسے دعوت تننگ نا فیصلہ کرے ہرا نا ریکارڈ پاش لشکر کشی و امتیازی رویہ آ تالان ءِ، دا ہیت نا اشارہ ءِ کہ یونیورسٹی چندی توار آتے ایلوفتا ترجیح ایتک’۔

برانز ئٹ اوار برانزی تیان اسٹ اس ہم اے ایف پی نا صحافی تیتون ہیت کننگ آ منتوس۔

وخت آ ساڑی پولیس برانزی تے خڑک ئنا اسرائیل نواز نا برانزی تا اسہ چنکو ٹولی ئسے آن جتا کننگ نا کوشست کرے، واہم ہڑتوم آ برانز آک بیدس ناخوش تدینی ئسے آن بیدس پورا مسر۔

دا برانز اندنو وخت اسیٹ مس ہراتم امریکی صدر ڈونلڈ ٹرمپ نا انتظامیہ کولمبیا یونیورسٹی نا وفاقی فنڈنگ ءِ ایسر کننگ نا دھمکی تسس۔

ٹرمپ سئے شمبے آ تینا پلیٹ فارم ‘ٹروتھ سوشل’ آ لکھا: ‘ہرا ہم کالج، اسکول یا یونیورسٹی ہرا غیر قانودی برانز آتیکن اجازت ترو، اونا تیوہ وفاقی فنڈنگ بند کننگو’۔

او مستی پاریسس کہ ‘مخلوق ءِ بش تروک آتے جیل آ دننگو یا ساندئی وڑ ئٹ اوفتا ہنکینی خلق آتیا دوارہ گدریفنگو۔ امریکہ نا خوانندہ غاتے ساندئی وڑ ئٹ کشنگو، یا ڈوہ ئنا حالیت نا ردئٹ دزگیر کننگو’.

اپریل 2024 ئٹ ہم امریکہ نا کیہی یونیورسٹی تیٹی فلسطینی خوانندہ آتا حق ئٹ برانز کروک و کوالخواہ تا نیام ئٹ شرہ بھاز مسوسس۔

کولمبیا یونیورسٹی ئٹ برانزی تا اسہ بھلو ٹولی اس تعلیمی ادارہ آتا ہویل ئٹ ‘غزہ یکجہتی کیمپ’ اس جوڑاسس، ہرا ییل و ایم آئی ٹی تون اوار ایلو کیمپ آتیٹ تالان مسوسس۔

کولمبیا یونیورسٹی ئٹی 100 آن بُڑز خوانندہ آتا دزگیری آن پد کیمپ آتیٹی تیوہ سیمسٹر آتیکن کلاس آتے بند کننگاسس۔

یورپی یونین نا صدر اُرزولا فان ڈیئر لائن پارے کہ یورپ نا رکھوک انڈسٹری ءِ سوگوْ کننگ کن و فوجی لائخی تیٹی ودُکی کننگ کن یورپی یونین نا پوسکنا ڈٹ بندی ئٹی 800 بلین یورو اسکان خلنگ مننگ کیک۔

پریس کانفرنس آن تران کریسہ اود پارے کہ یورپ رکھ ئکن پین خرچہ کننگ کن تیار ءِ ۔

اونا مستی پاننگ ئس کہ یورپی یونین باسک آک ڈیہہ تا رکھنگ نا خرچہ آتیٹی مالیاتی کمک ئٹی پین شابیت تننگ نا سلہ ءِ ترو۔

دا ہم پاننگانے کہ 150 بلین یورو نا وام ہم دا رد ئٹ تننگو۔

اونا پاننگ ئس کہ نن دوارہ سلہہ بند مننگ نا وخت ئٹی اُن، یورپ تینا رکھ ءِ بھلو کچ اسیٹ ودفنگ کن تیار ءِ۔ اونا مثیل ءِ تریسہ او پارے کہ چنک وخت ئٹی اندنکہ یوکرین نا کمک کن و مرغُنو وخت اس گُرج اندنکہ یورپ تینٹ تینا رکھ ءِ کننگ نا زمہ واری ءِ ارفنگ کن تیار ءِ۔

پاکستانی لشکر ضلع آواران نا تحصیل مشکے ٹی چار بندغ کسفنگانو۔ علاقائی حوالکار تا ردئٹ چار انگا بندغ آک پاکستانی لشکر نا دزگیر ئٹی ئسر۔

کسفنگوک بندغ تا چاہنداری کامران علیم، معراج، مومن اسلم و حفیظ نا پن تیٹ مسنے۔

یاتی مرے پن کروک بندغ آتے 28 فروری نا نن آواران نا تحصیل مشکے آن فورسز آک پین پنچ بندغ تون اوار زوراکی ئٹ بیگواہ کریسر اندن ایلو پنچ بندغ نا بابت دائسکان ہچو حوال اس مونا بتنے۔

اندن بلوچ یکجہتی کمیٹی پن کروک بندغ آتا کسفنگ نا ردعمل ئٹ بیان اس شینک کریسہ پارینے کہ بلوچستان نا ضلع آواران نا علاقہ مشکے ئٹ پاکستانی لشکر زوراکی ئٹ بیگواہی نا گواچی چار بلوچ ورنا کامران علیم، معراج، مومن اسلم و حفیظ بلوچ ءِ بیدس عدالت کسفینے۔

بی وائی سی نا ردئٹ پن کروک بندغ آک 28 فروری نا نن پاکستانی لشکر نا دو آن پین پنچ بندغ تون اوار زوراکی ئٹ بیگواہ کننگاسر، ایلو پنچ بندغ دائسکان پاکستانی لشکر نا بے قانونی دزگیر ئٹی ءُ ہرافتا زند ہم بھیم ئٹی ءِ۔

بیان ئٹ پاننگانے کہ بلوچستان دا وخت زوراکی نا بیگواہی و بیدس عدالت خون و بلوچ زنک ایسری نا اسہ بھیم بش کروک وخت ئسے آن تدینگ ءِ پاکستانی لشکر و ڈھکوک ادارہ غاک سوگو پالیسی تا ردئٹ بلوچ راج ئنا پجار ءِ بنیات جوڑ کریسہ سوگو زنک ایسری اسیٹی اختہ ءُ زوراکی نا بیگواہی، دزگیر ئٹ کسفنگ و دروغ نا مونتس تیٹ بلوچ ورنا تا کسفنگ ہڑدے نا کاریم اس جوڑ مسنے ہرا بلوچستان ءِ اسہ بھلو بندغی نیستی ئسے نا گواچی کرینے۔

بلوچ یکجہتی کمیٹی پارینے کہ ریاستی دہشتگری نا کل آتیان است ءِ سریفوک بیدس عدالت کسفنگ ءِ ہراڑے اول بندغ آتے زوراکی ئٹ بیگواہ کننگک اوفتے بھاز جسمانی و ذہنی بیدادی نا گواچی کننگک و پدا دروغ نا مونتس تیٹ کسفسہ اوفتے دہشت گرد پِن کننگک۔

تنظیم نا ردئٹ برجاء سال نا بیرہ اِرا توہ ئٹ درزن آ بلوچ ورنا تے بیدس عدالت کسفنگانے ہرا دا تادی نا بھلنی ءِ پاش کیک۔

او پارے کہ بلوچستان ئٹ زوراکی نا بیگواہی تا کل آتیان بھیم بش کروک پالو دادے کہ بیگواہ کننگوک بندغ آتیان بھاز آک اسُل پدا بفسہ ہرا خوش بخت ءُ او یا تو جسمانی و ذہنی بیدادی آن پد اسہ گیاوان علاقہ اسیٹی یلہ کننگرہ یا گڑا اوفتا جشوک جونک خسنگرہ۔

تنظیم جہانی برادری و بندغی حق آتا تنظیم آتیان خواست کرینے کہ اوفک بلوچ زنک ایسری آ تینا ڈوہدار آ چھپی ءِ پرغر و دا ظلم آتا برخلاف توار بڑز کیر، اگہ دا سوگو زنک ایسری توننگ متو گڑا دا نہ بیرہ بلوچ راج بلکن تیوہ خطہ کن بھس کار نتیجہ تا سوب مننگ کیک۔

کوئٹہ پریس کلب آ پولیس نا جلہو – ٹی بی پی سرگپ

یک مارچ نا سہب اکن، ڈپٹی کمشنر سعد بن اسد نا سروکی ٹی پولیس کوئٹہ پریس کلب آ چھاپہ خلیسہ صحافی تا بے شرفی کرے و پریس کانفرنس کن ساڑی سردار بہادر خان یونیورسٹی نا استاد آتے دزگیر کرے۔ یاتی مرے داڑان مالو، مارچ 2024 ئٹ، بلوچ یکجہتی کمیٹی نا سیمینار نا وخت آ، کوئٹہ پولیس پریس کلب ءِ کلف خلیسہ بند کریسس، اندن ریاستی تادی تا برخلاف برانز آتے کوریج تننگ آ ڈپٹی کمشنر چرجوئی ئٹ صحافی و پریس کلب نا بست و بند ءِ بھیم نا گواچی کننگ ءِ۔

بلوچستان ئٹ صحافت آ بیدس پڑو رکھ خلوک ءِ، و کیہی صحافیک تینا ذمہ واری تے سر تننگ نا بدل ئٹی زوراکی ئٹ بیگواہ و کسفنگانو۔ پاکستان نا مقتدر کڑدہ تا بیانیہ ءِ تالان کننگ آن نمن مننگ و آزادی صحافت تون گنڈوک صحافیک ریاستی زوراکی نا گواچی ءُ۔ راجی سیاست نا کسرک بلوچستان ئٹ مالو آن بند کننگانو، و داسہ پریس کلب نا در آتے ہم تینا حق اکن توار ارفوکا تیکن بند کننگسہ ءُ۔

پیکا قانود و صحافت آ رکھ خلنگ نا ذریعت ئٹ گواچنی تے مخلوق اسکان سر مننگ آن توننگ ئٹ بے سہبی آن پد، بلوچستان ئٹ مقتدر کڑدہ تا نمائندہ حکومت اندن انگا چم آتیٹ صحافی و حق آتیکن جہد کروک آتے بھیم نا گواچی کننگ ءِ۔ بلوچستان ئٹ ریاستی تادی تا برخلاف ہر وخت و ہڑدے نا بنیات آ برانز مریسہ ءِ، ولے بھلا ویل آتے ایسر کننگ نا جاگہ غا ریاستی ادارہ غاک صحافی تیا زور شاغنگ ءُ، ہراڑان ویل آتا ایسری مننگ کپک۔

جہان ئٹ صحافی تا رکھ اکن جوڑ کروک ادارہ غاک بلوچستان ءِ صحافت کن جہان نا بھیم بش کروک ڈیہہ تیٹ حساب کیرہ، و بلوچستان نا گواچن حالیت آتے جہان نا مونا پاش کننگ و راستکی نا ہیت ءِ کننگ نا سوب ریاستی ادارہ غاک دائسکان 42 صحافی کسفینو۔ بیست و یکمیکو صدی ٹی صحافی تے بھیم نا گواچی کریسہ و رکھ خلیسہ گواچنی تے ڈھکنگ مننگ کپک۔ ریاستی ادارہ غاک، صحافتی ادارہ تیا زور شاغنگ نا جاگہ غا بلوچستان نا بھلا ویل آتے ایسر کننگ آ پام کیر۔

بلوچستان ئٹ روچہ نا اولیکو دے ءِ، پاکستانی لشکر نا دو آن بیگواہ مروک بندغ آتا خاہوت آک اولیکو روچہ ءِ روڈ آتیا ملار۔ زوراکی ئٹ بیگواہ بندغ آتا خاہوت آک کیہی دے تیان تینا بندغ آتا یلہ مننگ کن بلوچستان نا اہم بنجائی کوئٹہ، کراچی، کوئٹہ تفتان بھلا کسر تے آ برانز آتا سوب اینو چارمیکو دے بھلا کسرک مُسہ جتا انگا ہند آن بند ءُ۔

شابیتی حوال تا رد ئٹ سوراب نا ہند آ زوراکی ئٹ بیگواہ مروک بندغ آتا خاہوت و بلوچ یکجہتی کمیٹی نا باسک آتا برانز کوئٹہ، کراچی، بھلا کسر آ مُسٹمی دے ہم برجا ءِ، پین اِرا زہمی مروک خاہوت برانز ئٹ اوار مسر۔

یاتی مرے درو کالخواہ خاہوت آتے اِرا بندغ نا یلہ مننگ نا باور کرفیسس واہم خاہوت نا پاننگ ءِ کہ زوراکی ئٹ بیگواہ مروک تیوہ 9 بندغ آتے یلہ کننگے۔

اِرٹمی پارہ غان حب ئٹ زوراکی ئٹ بیگواہی تا برخلاف ہم برانز چارمی دے برجا ءِ، ہراڑے اینو سہب ئنا پولیس برانز کروک زالبول و چنا تیا ظاغت ءِ کارم ئٹ ہیس۔

پولیس برانز کروک آتیا سم کاریم تون اوار لٹ کُٹ کرے و بیگواہ مروک بندغ آتا خاہوت و بلوچ یکجہتی کمیٹی نا باسک آتے دزگیر کننگا۔

برانز کروک آتا پاننگ ءِ کہ پیر انگا زالبول آتون اوار 9 بندغ ءِ پولیس دزگیر کریسہ نادرست ہند آ درینے۔ پولیس نا بیدادی آن گڈ ہم خاہوت آتا برانز برجا ءِ۔

اندا وخت کردگاپ ئٹ ہم اِرٹمی دے زوراکی ئٹ بیگواہی تا برخلاف کوئٹہ تفتان آ برانز برجا ءِ۔ برانز ئٹ اوار مروک آتا پاننگ ءِ کہ ننا علاقہ نا دہ آن زیات بندغ پاکستانی نا لشکر نا دو آن جتا انگا علاقہ آتیان زوراکی ئٹ بیگواہی نا گواچی مسنو ہرافتا یلہ مننگ کن علاقہ آتا اُلس روڈ آتیا برانز کریسہ ءُ۔

ایڑے خضدار ئٹ حب برانز آ فورسز کریک ڈاؤن نا برخلاف ہم برانز نا سوب بھلا کسر ءِ بند کننگانے۔

خاہوت آک دی بلوچستان پوسٹ ءِ پاریر کہ ننا بندغ آتان بیدس ننا خوشیک و زند تہاری ٹی تمانے۔ رمضان المبارک نا پاک انگا تو ئٹ بے اسلامی ملک ئٹ ہم مسلمان آتے کمک تننگک، ولے پاکستان ئٹ بلوچ آتون گندہ ظلم کریسہ ءُ، چنا و زالبول آتیا روچہ مننگ نا حالیت ئٹ بیدادی مریسہ ءِ۔

خاہوت آک بلوچستان نا مخلوق آن خواست کرینو کہ او دا زوراکی نا برخلاف ننتون اوار مریسہ بندغی نا فرض ءِ سر ایتبو۔

پاکستانی لشکر نا دو آن زوراکی ئٹ بیگواہ مروک یاسر بلوچ نا خاہوت ملیر نیشنل ہائی وے آ برانز کننگ ءِ و خاہوت نا پاننگ ءِ کہ اسکان یاسر بلوچ ءِ یلہ کپسہ، روڈ ءِ بلاک کریسہ برانز برجا مرو، برانز ئٹ بی وائی سی نا راہشون ڈاکٹر صبیحہ بلوچ ہم اوار مسونے۔

یاتی مرے کراچی ملیر نا ہندی خوانندہ یاسر بلوچ 24 و 25 فروری 2024 نا نن گلشن اقبال ئٹ تینا سنگت آتون اوڑدئی آن گڈ نن ئنا 10:30 نا خڑک دوارہ تینا اُراغا ہنیسہ ئس کہ کسر آن ریاستی ادارہ غاتا دو آن قانود آن چھپ دزگیر کننگ آن گڈ زوراکی ئٹ بیگواہ کننگاسس۔

شابیتی حوال تا رد ئٹ یاسر علی ولد سبزل علی، ہندی جمعہ گوٹھ ملیر کراچی، ہرا کہ بینظیر بھٹو یونیورسٹی ئٹ میڈیا سائنسز نا خوانندہ ئسے۔

کراچی: پریڈی تھانہ ءِ چغلی بمب ئٹ جلہو کننگانے ہرانا سوب آن 3 پولیس کارندہ ٹپی مسنو۔

کراچی نا علاقہ صدر ئٹ پریڈی تھانہ غا نادرست آ بندغ آک چغلی بمب ئٹ جلہو کریر ہرانا سوب 3 پولیس کارندہ ٹپی مسر ہرافتے جان جوڑی کن جناح اسپتال آ دننگا۔

دا باروٹ ایس ایس پی ساؤتھ میڈیا ءِ پارے کہ ارا کارندہ مچٹ ٹپی ءُ و اسہ کارندہ ئسے نا خن آ چرہ اس لگانے ہرانا حالیت بد ءِ۔

پولیس کالخواہ تا رد ئٹ نا درست آ بندغ آتا پارہ غان چغل تروکا بمب پریڈی تھانہ نا کیب آ تما، تراک آن بنجاہی درغ نا خڑک سلیفوک گاڑی تا شیشہ غاک پنار۔

کریکر تراک آن تھانہ نا دیوال آک زیمیمسر۔ تدینی آن گڈ بمب ڈسپوزل اسکواڈ ءِ خوائفنگا، کرائم سین یونٹ ہمو ہند آ سر مریسہ شایدی مچ کننگ ءِ بناء کرے۔

پریڈی تھانہ غا کریکر جلہو نا سی سی ٹی وی ئٹ خننگ مریک کہ پریڈی تھانہ غا نا درست آ بندغ آک کریکر خسار، موٹر سائیکل آ تولوک بندغ آک کریکر چغل ترسہ نرار ہرا تھانہ ٹی ڈیوٹی افسر نا کوٹی نا پیشن آ تما، ٹپی آ بندغ آتا چاہنداری ارشد، عامر و ریاض نا پن تیٹ مسنے۔

ایس ایس پی ساوتھ مہزور علی احوالکار تے پارے کہ استو سوا دوانزدہ غا تھانہ نا تہٹی اسہ چغلی بمب اس خسنگا۔

او پارے کہ جلہو ئٹ ننا مسہ کارندہ ٹپی مسنو، آر جی ڈی 5 گرنیڈ ئٹ تھانہ غا جلہو کننگانے، مسٹ انگا سپاہیک او وخت آ ہمو ہند آ ئسر ہرا ٹپی مسر۔

ایس ایس پی ساؤتھ نا رد ئٹ دائسکان ہچو گل ئس ذمہ واری ءِ ارفتنے، کیمرہ غاتا فوٹیج آتا کمک ئٹ جلہو کار آتے اسکان سر مرون، تدینی تون گنڈوک پین حوال مچ کننگ اُن۔

بلوچستان نا ضلع کوہلو ٹی پاکستانی لشکر کشی برجاء ءِ۔

حوال آتا رد ئٹ پاکستانی لشکر نوئے شم، بالا ڈھاکہ و دامون ایمون ئٹ لشکر کشی ٹی اختہ ءِ۔

تدوکا اسہ ہفتہ غان پاکستانی لشکر کوہلو نا علاقہ بارکھان نا جتاء ہند آتیا لشکر کشی کننگے۔ فورسز دا وخت آ شش بندغ ءِ زوراکی ئٹ بیگواہ کننگ تون اوار ہندی بندغ آتا اُرا تے خاخر تسنے۔

آپریشن ئٹ آختہ فورسز ءِ سلہہ بند بندغ آک جلہو آتیٹ ٹِک کرینو۔

ہندی حوالی تا رد ئٹ مسہ دے نا ترند جھڑپ آتیٹ فورسز ءِ بھلو کچ اسیٹی نسخان ارفوئی تمانے ہراڑے ایمبولینس آتا ہن و بر خننگ ئٹ بسنے۔

کالخواہک دائسکان دا باروٹ ہچو شابیت حوال ئس فراوان کتنو۔

امریکی صدر ٹرمپ پارینے کہ صدر زیلنسکی ہد آن زیات زور شاغنگ نا کوشست کرے و دا معاملہ ننا امیت آتیان اسُل چھپ سلیس۔

جمہ نا دے اوول دفتر ئٹ یوکرین نا صدر زیلنسکی تون مروک خرین آ شرہ آن گڈ ڈونلڈ ٹرمپ احوالکار آتیتون ہیت کریسہ دا دعویٰ ءِ اسیکہ وا کرے کہ مننگ کروک امنائی گپ تران ئٹ زیلنسکی نا دو تیٹ ‘بھاز نزور ءُ پتّہ’ ءُ۔

او مُستی پارے کہ اگہ زیلنسکی امریکہ نا صلہ تروک زمینی مڈی تا سوداگری آ دستخط کے گڑا او اسہ ‘سوگوْ’ راہشون ئسے نا سفت آتیا پورہ بننگ کرو۔

صدر ٹرمپ صدر زیلنسکی آ دوبہ خلک کہ ‘او بیرہ جنگ جنگ و جنگ خوائک، و نن دا دتر وہیفنگ نا ایسری خوانہ۔’

ہراتم اوڑان سوج کننگا کہ یوکرینی صدر ءِ امنائی گپ تران ءِ اسیکہ وا بناء کننگ کن انت کروئی تمے؟ گڑا صدر ٹرمپ ورندی تس کہ ‘اودے دا پاروئی مرو کہ او امن ٹہیفنگ خوارہ۔’

دا ہیت آتا وخت آ صدر ٹرمپ امریکی مخ تفی ءِ واپس ہلنگ نا تڑی تریسہ اسیکہ وا تریسہ پارے کہ ‘یا تو نن دا جنگ ءِ ایسر کرون یا گڑا اوفتے تنیا جنگ کروئی مرو۔’