کوئٹہ پریس کلب آ پولیس نا جلہو – ٹی بی پی سرگپ
یک مارچ نا سہب اکن، ڈپٹی کمشنر سعد بن اسد نا سروکی ٹی پولیس کوئٹہ پریس کلب آ چھاپہ خلیسہ صحافی تا بے شرفی کرے و پریس کانفرنس کن ساڑی سردار بہادر خان یونیورسٹی نا استاد آتے دزگیر کرے۔ یاتی مرے داڑان مالو، مارچ 2024 ئٹ، بلوچ یکجہتی کمیٹی نا سیمینار نا وخت آ، کوئٹہ پولیس پریس کلب ءِ کلف خلیسہ بند کریسس، اندن ریاستی تادی تا برخلاف برانز آتے کوریج تننگ آ ڈپٹی کمشنر چرجوئی ئٹ صحافی و پریس کلب نا بست و بند ءِ بھیم نا گواچی کننگ ءِ۔
بلوچستان ئٹ صحافت آ بیدس پڑو رکھ خلوک ءِ، و کیہی صحافیک تینا ذمہ واری تے سر تننگ نا بدل ئٹی زوراکی ئٹ بیگواہ و کسفنگانو۔ پاکستان نا مقتدر کڑدہ تا بیانیہ ءِ تالان کننگ آن نمن مننگ و آزادی صحافت تون گنڈوک صحافیک ریاستی زوراکی نا گواچی ءُ۔ راجی سیاست نا کسرک بلوچستان ئٹ مالو آن بند کننگانو، و داسہ پریس کلب نا در آتے ہم تینا حق اکن توار ارفوکا تیکن بند کننگسہ ءُ۔
پیکا قانود و صحافت آ رکھ خلنگ نا ذریعت ئٹ گواچنی تے مخلوق اسکان سر مننگ آن توننگ ئٹ بے سہبی آن پد، بلوچستان ئٹ مقتدر کڑدہ تا نمائندہ حکومت اندن انگا چم آتیٹ صحافی و حق آتیکن جہد کروک آتے بھیم نا گواچی کننگ ءِ۔ بلوچستان ئٹ ریاستی تادی تا برخلاف ہر وخت و ہڑدے نا بنیات آ برانز مریسہ ءِ، ولے بھلا ویل آتے ایسر کننگ نا جاگہ غا ریاستی ادارہ غاک صحافی تیا زور شاغنگ ءُ، ہراڑان ویل آتا ایسری مننگ کپک۔
جہان ئٹ صحافی تا رکھ اکن جوڑ کروک ادارہ غاک بلوچستان ءِ صحافت کن جہان نا بھیم بش کروک ڈیہہ تیٹ حساب کیرہ، و بلوچستان نا گواچن حالیت آتے جہان نا مونا پاش کننگ و راستکی نا ہیت ءِ کننگ نا سوب ریاستی ادارہ غاک دائسکان 42 صحافی کسفینو۔ بیست و یکمیکو صدی ٹی صحافی تے بھیم نا گواچی کریسہ و رکھ خلیسہ گواچنی تے ڈھکنگ مننگ کپک۔ ریاستی ادارہ غاک، صحافتی ادارہ تیا زور شاغنگ نا جاگہ غا بلوچستان نا بھلا ویل آتے ایسر کننگ آ پام کیر۔