تس ہکل ایڑ ئس

عرفان بلوچ

تس ہکل ایڑ ئس لوفری ئٹ ہچ مفک
دژمن آتو تول و بش وا نوکری ئٹ ہچ مفک

کپہ تینے جوڑ غدار جافر و صادق نا وڑ
تینپہ تینا جنگ و جیڑہ وا خری ئٹ ہچ مفک

کپہ پیہن خنتے تینا غیرے جی جی کپہ نی
تینے کپہ مونا کچکول ہفتدری ئٹ ہچ مفک

دا ڈیھ و دھرتی نا و ایلم دانا وارث جوڑمہ نی
پاپہ تینے و نا بزغر بزغری ئٹ ہچ مفک

مر نی گوری تینا خاک آ خلپہ چک عرفان پدی
الے گم کر دلبری ئٹ ہچ مفک

بلوچستان نا ضلع پنجگور ئٹ بیگواہ بندغ نا جون خننگانے۔

شابیتی حوال تا ردئٹ پنجگور نا علاقہ شاہو کہن آن اسہ بندغ ئسے نا جون خننگانے۔ ہرانا چاہنداری سبزل نا مار حیات نا پن مسنے ہرا تربت بگ نا ہندی ئسے۔

خیال ئٹ مرے پن کروک بندغ ءِ پاکستانی لشکر 3 جولائی 2024 آ تربت آن دزگیر کریسہ بیگواہ کریسس۔

یاتی مرے حیات بلوچ نا زوراکی ئٹ بیگواہی نا برخلاف خاہوت نا پارہ غان ڈی سی آفس نا مونا تولوک برانز ہم کننگاسس و ہمو وخت ڈپٹی کمشنر تون گپ تران و باوری ترفنگ آن پد تولوک برانز ایسر کننگاسس۔

اینو ننے دے دیگر ءِ

نوشتکار: جعفر قمبرانی

دی بلوچستان پوسٹ

بھاز آ گڑاک ایہن زوت بدل مفسہ۔ او گڑا خوشی مرے یا ڈکھیائی، غلامی مرے یا آجوئی نا دیک۔
غلامی مس تو اوڑکن کیہی کرن آک لگرہ کہ قوم اس آجو مرے۔ انگریز نا دور اٹ ریکی نا دا مروک آ شاعری اینو ہم یک پہ ٹک ءِ۔ یعنی بلوچستان داسکان دیگری ٹی ءِ۔

اے تم کہ انگریز کراچی ڈیرہ جات سیستان و ہلمند اسکان کہ بلوچستان ءِ پرغانے شیشپہ کرینے تو دا شاعریک ودی مسنو کہ

”اینو ننے دے دیگر ءِ”

دا تو پک ءِ کہ اینو ہم ننے پگہ متنے، اینو ہم ننے وار ملتنے داسکان۔

آؤ، اینو ہم بلوچستان اٹی دیگری، شام غریباں نا وخت ءِ کہ بندغ تپک کہ دا تارمئی ہننگ ءِ یا کُٹنگ ءِ۔ ننا ڈیہہ آ اینو ہم دے کہی ہلنگ ءِ۔ اینو ہم ننا حالیت ہمودے۔ اینو ہم کوپہ غاک شل و ٹھپی ءُ۔ اینو ہم نر انگا تا مون آ دژمن نا جاگہ غا تیناک سلوک ءُ۔ بھلو لشکر اس اینو ہم بلوچ قوم ءِ بشخ کرسا پرغسا و چس ہلسا کننگ ءِ۔ زبان نا پن اٹ و علاقہ غاتا جتائی نا سوب آن اینو ہم بلوچ قوم ءِ شیشپہ کروک ءُ ارے۔ تین تون سُم مرے مف، بھاز آک اینو ہم دژمن نا سُم ءِ تینا جند انا ایلم نا سینہ ٹی خلنگ ءُ۔ اینو ہم ننا بولیک (براہوئی بلوچی و دائے) مرک انا باٹی ءُ۔ اینو ہم ننا تعلیم نا حالیت نزور ءِ۔

سنگت پارے ڈگری ہلبو، ڈپٹی ہلبو، تینا ٹوپ ءِ اِرا دو اٹ توبو، چپ تولبو۔ پاہک کہ شعور دوئی کننگ نا وخت اس اف، فکر و مخلصی بکار بفسہ، قوم قوم پرستی سٹی ءُ۔

وخ۔۔۔۔ سائنس دان، فلسفی، فکرو جوزہ نا چیدہ غان بیزار کہ نن داسکان علم اکن ملاس ءُ بندغ ہم ودی کتنن۔ قوم اکن سوچوک ءُ لباڑ ہم رُدفتنُن۔ اینو ہم ننا سوچ یکہ تینا جند انا سِر، جیب و است خواہی تیٹی سخت ءِ۔ یعنی جندی شونداری نا بے سہبی تے و قومی زوال پزیری نا زوال آتا درک ننے لگتنے داسکان۔

ننے اینو ہم ڈیہہ اکن بوڈ کنپک، نن بلوچستان نا بزگی ءِ داسکان پہہ مننگ افن۔ گمان ہندن ءِ کہ لمہ ہیڑ تا آسڑدہ غاتے داسکان ملنڈ تکنہ نن۔ خڑینک نا پد اٹ فکر ءِ داسکان پہہ مفنہ۔ شونداری نا دود آتیان داسکان تو واخب ہم متنن نن۔ کسر شون و دژمن اٹی فرق کننگ ہیل کتنن۔ راہشون تا قدر آن واخبی ہلتنن۔ تینا ایڑھ لمہ نا پلو نا رکھ انا وڑ تے پہہ متنن۔ نوروزی آ جیرت تینے ٹی ودی کتنن۔ گڑا جائی نن ڈیہہ انا دڑد آتیان واخب افن۔ داسکان ہُسون انگا است آتے دُراخی نا درمان سر کتنن۔ ملاسی و لنگڑی نا گرج ءِ داسکان تپنہ۔ پند و خواری تیان پیش تموک آ خید آتے کشتنن۔

ہُرن تو نن فکر، شعور، علم، تعلیم، فکر، جوزہ، دڑد مہر عشق، ڈیہہ، ایلمی و سنگتی نا حد آتیان بھاز مُر اُن۔ راست پارینو کہ:

”اینو ننے دے دیگر ءِ
پگہ نوا وار اس برے“

سما اف ننا پگہ چوخت برو….؟

دا تو پک ءِ کہ اسہ قوم اسے نا سرسہبی نا ویدن اونا گام گیج آتیٹی ءِ۔ ہمو قوم آک سرسہب مریرہ ہرا تینا سرسہبی کن تینا حالیت ءِ تینٹ بدل کننگ نا سوچ خلیر۔ نن تینا پد ریچ ءِ سوچ خلنگ ہم ہیل تتنن، شونداری نا سوچ ودی کتنن۔ داسکان دے نن کن دیگری ءِ۔ پک، اینو ننے دے دیگر ءِ

خضدار نا بھیم بش کروک تدینی

ٹی بی پی سرگپ

بلوچستان ئٹ ہر تدوکا دے ئتون اوار بھیم بش کروک تدینی مریسہ ءُ۔ دنو دے کم گدرینگرہ ہراتم زوراکی نا بیگواہی و ریاستی تادی تا برخلاف بلوچستان ئٹ اسہ علاقہ اسیٹ برانز مف، انتیکہ ریاست بلوچ آجوئی نا جنگ ءِ ایسر کننگ کن اندنو پالیسی جوڑ کرینے ہرافتا زہم آتیان تیوہ بلوچ چاگڑد ءِ زہمی مریسہ ءِ۔

خضدار آن بی بی اسمہ جتک نا ریاستی سروکی ٹی کاریم کروک ڈیتھ اسکواڈ آتا دو آن برمتہ مننگ بلوچستان ئٹ دن انگا اولیکو تدینی اف۔ بلوچستان نا جتا علاقہ تیٹ آجوئی دوست آتا برخلاف فوج اکن کاریم کننگ آ ڈیتھ اسکواڈ آتے دُزی، برمتہ و خون ئنا تیوہ آزاتی تننگانے، ہرادے بلوچستان اسمبلی نا باسک آک تینا تران تیٹ کیہی وار پک کرینو۔

خدو بارکھان ئٹ سردار عبدالرحمن کیتھران مری علاقہ آن زالبول و چنا تے برمتہ کریسہ تینا ذاتی جیل ئٹ بندی کرے۔ میڈیا و سول سوسائٹی نا برانز نا سوب او دزگیر کننگا، واہم زالبول نا برمتہ و خون ئنا شاہدی تیان پد ہم مقتدر طاغت آتیتون خڑکی نا سوب اودے یلہ کننگا، و پدان گچین کاری کھٹفنگ آن پد اودے بلوچستان نا متنازعہ حکومت نا وزیر جوڑ کننگا۔

بلوچستان ئٹ ریاستی ادارہ غاک انصاف تننگ ئٹ بے سہب مسنو، و آئینی و قانودی ادارہ تیان اُست کٹہ مننگ آن پد بندغ آتیتون برانز آن بیدس پین ہچو کسر سلتنے۔ بلوچستان ئٹ داسہ نا سیاسی جہد آن پد بندغ آک سیاسی مزاحمت ءِ حق دوئی کننگ نا اسٹ انگا وسیلہ تکنگ بناء کرینو، و خضدار ئٹ بی بی اسمہ جتک نا آجوئی اندا خاطران مننگ کرے انتیکہ ڈیتھ اسکواڈ آتا دو آن اونا برمتہ مننگ نا برخلاف اونا خاہوت و بلوچ راج ترند برانز نا کسر ءِ ہلکر۔

بلوچستان نا حالیت آتا ردئٹ اُوننگہ گڑا اُرے اف کہ بروکا وخت ئٹ ہم دن انگا تدینیک مریسہ کیر، ولے بلوچ راج ئٹ دا یخین سوگو مننگ ءِ کہ سوگو برانز نا ذریعت ئٹ دن انگا تدینی تا توننگ مننگ کیم، و سیاسی مزاحمت نا ذریعت ئٹ راج آ برجاء تادی تا لڑ ایسر مننگ کیک۔

جنگ ئٹ غُٹ آن بھلا قربانی انت مرو؟

نوشتکار: کوہ دل بلوچ

دی بلوچستان پوسٹ

دیگر نا پاس ئٹ گہوش خف تیٹ سرگوشی کرسہ تینا پدینی نا خوند و چس ءِ تالان کریکہ۔ چھار مہ کنڈ مش تا پلویڑ ئٹ چکل ئسے نا دیر مش آن شیفی برسہ تینا ہنین آ توار نا ساز ئٹ روح ءِ ناچ تسکہ۔ بڑز آزمان تیبہ بدن ئٹ پینگن آ جمر تا شال ءِ اندن پیڑاسس کس پئے چلہ نا سو کپ کروکا روہو ءِ۔ جمرک دے ئنا روشناہی ءِ تینا پِڈ ئٹ ڈھکاسر۔ جٹ ئسیٹ قبلئی مشک تینٹ دے ءِ رخصت کننگ ئسر۔ دے ہم دیٹک آن پد گوہی کرسہ تینا گڈی مزل آ سر مسسس۔ دے ٹکی کیب ئٹ گؤن ئنا درخت اس وڑ وڑ ئنا چُک آتے تینا دلبند آ تولفیسس و توار آن تا چس ہلنگ اس۔ گواچنی دا چُک آتا توار کنا ملی ٹی ہم سرونزی آ ساز آتا وڑ ڈک لگاکہ۔ دا ایب کیب ئٹ ہر گڑا ہندن جارات بشخنگ اس کہ بندغ گڑتی تے ٹی ڈم ہلکہ کہ۔ کنے ہم بس جٹ اس مسکہ کہ سنگت آتیان زرس تینے پاناد کرسہ بسٹ اندا ہند آ۔ چپی و کراری وڑ وڑ ئنا خیال بٹنگا کہ۔ جاٹہ کوپہ تے چڑیفیسُس۔ کلاش نا نَل زان ئٹ آزمان ءِ سیل کریکہ و کُنداخ ڈغارے بُک ہلکہ کہ۔ داسہ سنگت ئس نا سوج مڈول ءِ کونڈسہ ئس “سنگت! جنگ ئٹ غٹ آن بھلا قربانی انت ئنا قربانی ءِ؟”

کنا مغز دا سوج ئتون اشتافی ئٹ سنگت ءِ ورندی تس کہ بندغ نا تینا جند ءِ قربان کننگ غٹ آن بھلا قربانی ءِ، ولے سنگت تینا رعب دار آ کاٹم ءِ “آخہ” ئٹ سرفے گڑا دا گڑا داسہ کنا است ءِ تلوسئی کننگ ئس۔ ای ہم داڑے گہوش آتا چَس ئٹ رغ تے پرفسہ ہندا گڑتی ٹی پیڑوک اسٹ کہ جنگ ئٹ غٹ آن بڑز انگا قربانی انت مرو؟ اُرا ءِ ہلنگ مرو؟ خلق و آلم ءِ بلکہ ہلنگ؟ تینا خوشی و مراد آتے کَڈ کننگ ہم بھلو قربانی ئسے۔ گَل ئنا کار و کاریم آک مرور؟ دیر و پاٹ ڈوہنگ مرو؟ پند و خواریک مرور؟ ہول و بھیم ءِ تل تل کننگ مرو؟ دیچہ کنے ہچ اس دنو سُجنگ ہلو ہرا کنے امنا کروسس کہ جاہی دا گڑا غُٹ آن بھلا قربانی ءِ، کسہ گونڈ دا کہ وڑ وڑ ئنا سوج جوڑ کرسہ تُڑفسہ کریٹ ولے بے سہب و دَم اس سینہ آن کشسہ بش مسٹ۔

دا سوچ آتا گِڑگیس آن پیشتمسا ہراٹ کہ تہاری ہم پرّہ غاتے یلہ کرینے۔ جمرک ہم پڑی پڑی بٹسہ اسر۔ خیری ءِ کوپہ ٹی لڑونج کریٹ سر ہلکٹ ولدا۔ ہناٹ کہ سنگت آک مؤن آ چاہ ئنا شَڑُو تے کش کننگ اسر، دا سنگت ہم کرٓار نا کتاب “بالاد “ ءِ کُٹ ئٹ تخاسس، بلوچی آ ٹوپ کاٹم ئٹ نازان ئس، او باسن آ چاہ ئنا گُلم خلسہ ئس۔ ثوابی ءُ سلام ئس تننگ تون توسٹ۔

اینو نا گہوش آک مش تیان پدینی بَڈ کرسہ بئے و بوچ آتا گَند ءِ بغل ٹی چرخ تسرہ۔ سنگت کنکن ہم کوپ ءِ با اسکان پُر کرے، ای ہم ڈغار آ تخنگ آن مُست کوپ ءِ سنگت نا دو آن ہلکٹ بورہ نا چاشنی تون سنگت آن سوج کریٹ سنگت غٹ آن بھلا قربانی جنگ ئٹ انت ءِ گڑا؟ سنگت پیشانی آ بشخندہ ئس تالان کرسہ خلکن و ہنین آ توار ئٹ ساہت ئسے نا چپی ءِ تل کرسہ ورندی تس “تینا مرضی ءِ ندر کننگ غُٹ آن بھلا قربانی ءِ”۔

داسہ دو ءِ زنوُ آ تخسہ سوچ اسٹی ہناٹ دا امر؟ مرضی انت ئسے؟ مرضی امر قربان مریک؟ جٹ ئس چُپ سَر گڑدانی ءُ سوچ ئسے ٹی پیہاٹ، جاہی یار بندغ جنگ ئٹ تینا مرضی ءِ ندر کننگ کپک۔بندغ کن غُٹ آن گیشتر آ کاٹم خلْ تینا مرضی و منشا ءِ تنظیم نا مرضی کن ہلنگ ءِ۔ دا ہیت اگہ ننا کاٹم ئٹی توس گڑا تنظیم مستی بھلو گام خلیک۔ تینا خوائش و مرضی بندغ ءِ نزور و جان بڈ کیک۔ جنگ ئنا راہبند و وڑ ئٹ ہننگ آن سرسہبی نا گند بریک۔ جنگ ننا مرضی آخہ بلکہ ننے جنگ ئنا مرضی ئٹ ہنوئی تمک۔ جنگ ئنا تینا لوٹ و خواست ہندادے کہ اونا تروکا راہبند و وڑ ئٹ بندغ تینے مٹ و بدل کیک۔ جنگ تینا تہٹی ننا مرضی ءِ پُلِک و دا گپ خل ئنا لیک ءِ۔ ہر جنگول آ ورنا کن تینا مرضی، خواست و سواد آتے سُم خلسہ جنگ ئنا مرضی ئٹ بیرفوکا سُم ءِ لِخ ئٹ ٹنگوئی تمک۔ دا راستی ءِ کس رد کپک کہ جنگ ئنا گڑاس خواست خرین مریرہ ولے گپ ہمو ناجوڑی و درمان نا خرینی نا ءِ ہرا نا اینو خرین پگہ شفا ءِ۔ جنز، راج و ڈیہہ ئنا سرسہبی اندا لوز آتیٹ گوفوک ءِ “جنگ ئٹ تینا مرضی ءِ ندر کننگ۔“ دِلو نا چائند، زاویہ ءِ دید و فلسفی آ فکر ئٹ ہر گپ سنگت آتا کسرشونی و چاہنداری کن قربانی نا جغر کش آ کسر ئٹ چیدہ ئس اس۔ کنے ہم یار باش آ دِلو نا ہر گپ فکر و گڑتی تیٹ ڈُبی تسکہ۔۔۔

جنگ ئنا کُٹ آن ودی مروکا سپاہی، سفر خان

نوشت: ثناء ثانی
براہوئی مٹ: سالار میرو

دی بلوچستان پوسٹ

شہید سفر خان بلوچ نا قصہ دا ڈغار نا کُٹ آن شون الک ہرانا رغ تیٹی آجوئی نا ارمان و جوزہ ساندہ مسنے۔ بلوچستان نا ڈغار، ہرا نا تاریخ نا ہر خل، مش و ہر تَھل بغاوت نا قصہ و قربانی تا داستان تے ہندی کرینے، ہمو ڈغار سفر خان نا ڈغار تون مہر و دلیری نا گواہ ءِ۔ سفر خان نا دا جہد تینا خواہش و تغ تے وتن نا پِنا کننگ نا قصہ ءِ۔ ہمو جہد کہ ہرا سفر خان نا زند ۓ مسخت ئس تس و اندا جہد ئنا کسر ئٹی سفر خان تینا گڈی ساہ اسکا اوار مننگ نا عہد کرے۔

سفر خان کون آ ورناک اینو ہر ہمو است ئٹ حیات ءُ ہرافک تینا خاک ئتو بے کچ مہر کیرہ، ہمو است آک ہرافک آجوئی کن ندر مننگ نا جوزہ تخِرہ۔ سفر خان اسہ انجینئرس اس، او اسہ خوانندہ ئس اس، ولے اونا سینہ ٹی جنگجو ئسے نا است اس۔ اوڑتون علم و زانت ئنا مڈی اس، عقل و حکمت نا ڈیوہ اس، ولے اونا است ئٹ آجوئی نا لگوکا خاخر اس۔ تینا سنگت آتا نیام ئٹ تینا کاریم تا سَوب آن او اسہ سنجیدہ ءُ بندغ ئس چائنگاکہ، ولے آجوئی نا ارمان اونا خن تیٹی گروشک و اونا توار ئٹ سوگوی ئس ودی کریکہ۔

سفر خان تینا سوگوی و ہمت ئٹ دشمن ۓ ہکل تننگ تون اوار تنظیم نا شونداری کن ہر گام ۓ ارفینے۔ او ہر گڑا ۓ عمل آن مست خوڑتی ئٹ اُراکہ او تينا ہر حکمت عملی ٹی لائخ اس۔ او تنظیم ۓ پوسکونا اٹکل آتيٹی اوار کرسہ تینا کڑدار ۓ ادا کرے، او ہر سنگر آ تینا جہد نا توارے دنیا اسکا سر کننگ نا جوزہ ۓ تخاکہ۔ او سرپند اس کہ جنگ بیرہ توفک نا سم اسکا سلتنے بلکہ دا وخت ئٹ میڈیا و کلہو رسانی ہم اسہ خاصو محاذ ئسے۔ اندا خاطر او ہر موقع غا پوسکونا ٹیکنالوجی و سلاہ تا ہنر ۓ ہیل کننگ و ہیل تننگ ۓ اہمیت تسّکہ۔ او پاریکہ ٫٫دا متکونا قصہ غا کو، ننے پوسکونا محاذ آتے توروئی تمک، ننے پوسکونا کسر تے الوئی ءِ۔

سفر خان نا زند ئنا ہر ساعت ورنا تیکن اسہ کلہو، ئس ءِ، سبخ و اسہ تحریک ئس ءِ۔ او تینے اسل زند ئٹ اسہ فرد ئسے نا وڑ اُرتنے بلکہ او تینے تینا راج ئنا تحریک نا بخش ئس سرپند مسکہ۔

اوڑکن اونا زند ئنا ہچو اہمیت ئس الو اگہ اس تو بیرہ ہمو تحریک نا اس، ہمو مسخت نا اس ہراڑکن او تینا ورنائی نا ہر ساعت ۓ ندر کریسس۔ او تینا جہد ۓ اسہ جہدکار ئسے نا وڑ نہ بلکہ اسہ فکریئو راہشون ئسے نا وڑ مونا درے، ہرا تینا خیال و تینا حکمت عملی تیان تینا سنگت آتے اوار کرِسہ مستی ہِنسہ کریکہ۔

چھار نومبر نا دے بلوچستان نا مخلوق اسہ کنڈا تینا زاتی آ زند ئٹ اختہ اسکہ، ایلو کنڈا نوشکی ٹی شہید سفر خان تینا ساہ آن ہیج ارفسہ سنگر آ دژمن ۓ ہکل کریکہ کہ بلوچ ڈغار اسل غلام مننگ کپک، و نئے کہ دا نا بھاتی تا روح ۓ کس زمزیر ئٹ بندی کننگ کیک۔ نوشکی نا ہند ئٹ ہمو دے اندنو جنگ ئس تننگا ہرا بروکا وخت ئنا نسل آتیکن اسہ سبخ ئس مرو۔ سفر خان نا جون آن دتک وہارہ اونا ساہ تنکی کریکہ، ولے اونا جوزہ و ہمت ئٹ ہچو کمی ئس بتو۔ او گڈی ساعت اسکا فولادیئو دیوال ئسے نا وڑ دژمن نا مونا سلوک اس، تاکہ تینا سنگت آتے کسر ترسہ دژمن نا مون ۓ تور۔

ٹپ آتا مننگ آن پد ہم سفر خان پد متو۔ اونا خن تیٹی ہمت نا گروشک سلوک اس، اونا است بغاوت نا خاخر ئٹ زراب بشخاکہ۔ او ڈغار آ تمّا ولے اونا دو آن سلاہ تمیتو۔ او گڈی ساہ اسکا دژمن ۓ دا باور کریفے کہ بلوچ کہو ولے پد مفرو۔

شہید سفر خان نا شہیدی بلوچ ورنا تہ اسہ پوسکنو فکر ئس ترو، ہرا وخت ورناک شہید سفر خان نا کڑدار ۓ سرپند مرور، اوتا کڑدار آن پوسکنو فکر ئس ودی مرو۔ اونا زند و خواری اوتہ دا سرپند کرو کہ آجو و جند خواجہی (مختاری) اوفتا بخت ءِ و اوفتیکن جنگ کننگ اوفتا فرض ءِ۔ اونا کڑدار بیرہ اسہ پن ئس نہ بلکہ مچا تحریک، گچینو سوچ و مثال ئس ءِ۔

شہید سفر خان نا شہیدی ورناتہ یات ترسہ کرو کہ غلامی نا خلاف توار ارفنگ بیرہ حق ئس اف بلکہ دا اسہ فرض ئسے۔ بلوچ تحریک نا ورناک شہید سفر خان ۓ تینا راہشون منسہ اونا رندٹ ہِننگ نا قول کیر۔

شہید سفر خان نا ہر گھام ورنا تیکن اسہ روشنو ڈیوا ئسے نا ڈول ءِ ہرا تہار آتیٹی ورنا تیکن کسر جوڑ کرو۔ اونا قصہ اوتہ دا پہہ کرو کہ آجوئی نا تغ ۓ پورو کننگ کن تینا زند ۓ ندر کروئی تمیک۔ اونا تغک، اونا خیالاک و اونا قربانیک اوتیکن اسہ سبخ ئسے کہ امرو مسخت ئس مرے اوڑکن عزم و جوزہ نا بقار مریک۔ او تینا زند ۓ اسہ مسخت ئسے ٹی اوڑدہ کرے و تینا راج ۓ اندا کلہو تس کہ اگہ اوفتا استٹی آجوئی نا دڑد ارے تو داڑکن اوفتے ہر قربانی ۓ تننگ کن تیار مروئی تمک۔

بلوچستان نا تاریخ ئٹی سفر خان نا قصہ ۓ ساندہ اسہ مثال ئسے نا وڑ یات کننگو۔ دا قصہ بیرہ اسہ بندغ ئسے نا داستان اف بلکہ دا ہمو راج ۓ درشان کیک ہرا تینا عزت، تینا ڈغار و تینا حق ئکن تینا ساہ ۓ ندر کننگ آن ہم خلپک۔ سفر خان نا پن ہمو قربانی نا چیدہ ءِ ہرادے بلوچ راج تینا حق ئکن تسنے۔ اونا شہیدی اسہ روشنو ڈیوا ئسے نا ڈول ءِ ہرا بلوچ ورنا تیکن مدام اسہ راہشون ئسے نا کڑدار نا وڑ مرو۔

اینو بلوچ ورناک ہراتم تینا تروکا قربانی تے یات کرور تو اوتے سفر خان نا قصہ ٹی تینا کسر ملو۔ دا قصہ اوتا است ئٹی جوزہ و حوصلہ ودی کرو، اوتے دا باور کرفو کہ او اسہ عظیمو راج ئسے نا بھاتی ءِ ہرا مدام ظلم ئنا برخلاف تینا توار بڑز کرینے۔ سفر خان نا قصہ اوفتے دا باور کرفسہ کرو کہ او یکہ افس۔ اوتا نت تا شیف آن اوتا خواجہ غاتا تروکا قربانی تا پکو آ ڈغار و اوتا کاٹم آ بلوچ لمہ غاتا دعا تا سیخا ء۔ سفر خان نا قصہ و جہد ہمو تیکن ہم اسہ کلہو ئسے ہرا تینا ڈغار آ ندر مننگ نا جوزہ تخرہ۔ سفر خان نا زند، اونا جوزہ و اونا شہیدی ہمو تیکن ہم کسر تا ڈیوا ءِ ہرا تینا حق کن جہد کننگ ءُ۔ اونا قربانی دا گڑا ۓ پک کرے کہ اسہ بندغ ئس کہنگ کیک، ولے اونا خیال آک، اونا تغک، و اونا جہد ساندہ زندہ سلیک۔ بلوچ راج ئنا استٹی سفر خان مدام زندہ سلو، اونا قربانی مدام اوتیکن اسہ پاکو فرض ئسے نا وڑ مرو، و اونا قصہ بلوچ دیہاڑ نا ہمو باب مرو ہرادے اسل استان دپرور۔

شہید سفر خان نا یات دا مش تا توار ئٹ پنک، دا ڈغار نا گند ئٹ بریک، و بلوچ ورنا تا خن تیٹی گروشک ایتک۔ او اسہ تغ ئس اس ہرا راست مس، او اسہ عہد ئس اسک ہرا ساندہ سلیس، و او اسہ چراغ ئس اس ہرا نا رژن ہچبر سلپرو۔ اونا قربانی بلوچ راج ۓ اسہ پوسکنو کسر ئس بشخا اسہ پوسکنو جوزہ ئس تس۔

شہید سفر خان نا داستان مدام بلوچستان نا ورنا تے دا یات ترو کہ اوفتتو ہم اندا جوزہ و ہمت ارے ہرا اوفتا باوہ پیرہ تے اس ہرا اسہ مظلومو راج ئسے آن اسہ آجو ءُ راج ئسے ٹی بدل کرے۔

دا داستان ہمو کلہو نا ونڈ ءِ ہرا بلوچستان نا ورنا تے دا یات ترسہ کرو کہ آجوئی نا کسر ئٹ بروکا سختیک، جوزہ و حوصلہ ئٹ ایسر مریرہ۔ بلوچستان نا ڈغار نا ہر بلوچ ورنا تینے سفر خان نا قصہ ٹی اوڑدہ کے۔ دا قصہ اوفتے دا پہہ کرو کہ او تینا خنوکا تغ تے راست کننگ کیرہ، او تینا حق ئکن جنگ کننگ کیرہ، او تینا ڈغار کن ہچو قربانی ئسے آن پد مفرور۔

بلوچستان نا تاریخ ئٹ شہید سفر خان نا پن ئے مدام اسہ بھلو کڑدار ئسے نا وڑ یات کرور۔ دا قصہ ہمو تیکن کلہو ئسے ہرافک آجوئی کن ہینار و، ہرافک ظلم ئنا خلاف توار ارفیرہ، و ہمو تیکن ہرافک تینا حق ئکن تینا ساہ آن ہیج ارفینو۔ شہید سفر خان نا دتر، اونا جوزہ، اونا مہر بلوچ راج ئنا استٹی مدام زندہ سلوئ۔ او اسہ تغ ئسے نا تعبیر ئسے، او اسہ عہد ئسے نا چیدہ ء، او اسہ رژن ئسے ہرا بلوچستان نا تاریخ ئٹی مدام روشن سلو۔

بلوچستان نا علاقہ مستونگ ئٹ کشمیر دے ئنا رد ئٹ ہڈ تروکا مجلس ءِ نا درست آ بندغ آک بمب جلہو ئٹ ٹِک کریر۔

حوال آتا رد ئٹ مستونگ ڈپٹی کمشنر کمپلیکس ئٹ برجا کمشیر دے ئنا دیوان نا وخت آ چغلی بمب جلہو کننگا۔

واہم جلہو ئٹ ہچو نسخان ئسے نا باروٹ داسکان حوال بتنے۔

جلہو آن گڈ لشکر علاقہ ئٹ جتا کسر تے تفے۔ جلہو نا ذمہ واری ءِ دائسکان ہچو گل ئس ارفتنے۔