چین نا دورہ و بلوچستان ئٹ سکیورٹی سختیک – ٹی بی پی سرگپ
پاکستان نا صدر آصف علی زرداری پنچ دے ئی دورہ غا چین ئٹی ءِ، ہراڑے او صدر شی جن پنگ و کمیونسٹ حکومت نا بڑزکو کوالخواہ تیتون اوڑدہی کریسہ بلوچستان ئٹ چین نا اقتصادی و عسکری ڈٹ بندی تا رکھ ئنا بابت خُلیس تے مُر کننگ نا کوشست کریسہ ءِ۔
چین نا انجینئرز و سرمایہ کار آتیا کراچی و بلوچستان ئٹی چرجوئی ئٹ جلہو تا سوب چین نا زرگزرانی ڈٹ بندیک سلنگ نا گواچی ءُ۔ کراچی بالی پٹ آ چینی سرمایہ کار آتیا بھلا جلہو تیان پد چین نا کمیونسٹ حکومت دا ڈٹ آتے برجاء تخنگ کن بھلو سکیورٹی گامگیج نا خواست کننگ ءِ و پاکستان آ زور شاغنگ ءِ کہ عسکری و معاشی ڈٹ بندی تا رکھ اکن چین نا ذاتی سکیورٹی ادارہ تے کاریم کننگ نا موکل تننگہ۔ واہم، پاکستان نا معیشت نا دارومدار دے کہی ڈیہہ تیا ءِ و او وام اکن آئی ایم ایف آ اُریک، ہرانا سوب آن پاکستان چینی سکیورٹی کمپنی تے موکل تننگ اف۔
آصف علی زرداری و شی جن پنگ نا اوڑدہی آن پد پاکستان، کابل نا طالبان حکومت آ زور شاغنگ ءِ کہ اوفک چین ئنا مخالف طاغت آتے افغانستان ئٹ باہوٹ تفس۔ واہم، بلوچ تحریک آ پام کروک تجزیہ کار آک بھاز وار درشانی کرینو کہ بلوچ راجی ویل ءِ ایسر کننگ آن بیدس بلوچستان ئٹ چین نا ڈٹ بندی تیا جلہو آتا ایسر مننگ خننگپک۔ بیرہ ایلو ڈیہہ تیا زور شاغنگ آن چین نا سکیورٹی ویل آک ایسر مروفس، بلکن بلوچستان ئٹ ڈٹ بندی تے رکھنگ کن بلوچ راج ئنا خُلیس آتے مُر کننگ مرو۔
بلوچستان ئٹ راجی حق آتا جہد ئتون تفوک ادارہ غاک چین نا ڈٹ بندی تے بلوچ راجی مفاد آتا برخلاف پاریسہ بسنو و اوفک آجوئی نا حق ئتون اوار راجی حق دوئی کننگ آن بیدس بلوچ راجی جنگ ءِ پین ترندی ئٹ برجاء تخنگ نا اشارہ تننگ ءُ۔ دا حالیت نا سوب آن بلوچستان ئٹ چین نا معاشی و عسکری ڈٹ بندی تا ایسری گیشتر سختی تا گواچی مسنے۔
چین نا رکھ ئنا خُلیس آتیا پاکستان نا باوری ترفنگ آک بلوچستان نا زمینی گواچنی تیان چپ ءُ، و بلوچ راج ئنا خُلیس آتے مُر کننگ آن بیدس دا باوری ترفنگ آک بلوچستان نا جنگ زدہ حالیت آتیا بھلو وخت ئسے اسکان ہچو زہم اس شاغنگ کپرور۔