بلوچستان نا علاقہ مستونگ ئٹ کشمیر دے ئنا رد ئٹ ہڈ تروکا مجلس ءِ نا درست آ بندغ آک بمب جلہو ئٹ ٹِک کریر۔

حوال آتا رد ئٹ مستونگ ڈپٹی کمشنر کمپلیکس ئٹ برجا کمشیر دے ئنا دیوان نا وخت آ چغلی بمب جلہو کننگا۔

واہم جلہو ئٹ ہچو نسخان ئسے نا باروٹ داسکان حوال بتنے۔

جلہو آن گڈ لشکر علاقہ ئٹ جتا کسر تے تفے۔ جلہو نا ذمہ واری ءِ دائسکان ہچو گل ئس ارفتنے۔

بلوچستان نا علاقہ پنجگور، کیچ و کوئٹہ غان ہفت بندغ ءِ پاکستانی لشکر دزگیر کننگ آن گڈ بیگواہ کرینے۔

بیگواہ مروکا تا چاہنداری محمود ولد محفوظ، نعمان رفیق، راحیل علی، روشن علی، آدم غلام جان، نسیم بشیر و حافظ علی نا پن تیٹ مسنو۔

اوفتیان محمود ءِ پنجگور نا علاقہ عیسی غان درو دزگیر کننگا ہراڑان گڈ او بیگواہ ءِ۔

ایلو پارہ غان تربت نا علاقہ بہمن آن تدوکا کہیی دے تیان لشکر کشی برجا ءِ استو پاکستانی لشکر اُرا تیا چھاپہ خلسہ رفیق، راحیل علی، روشن علی، آدم غلام جان، نسیم بشیر ءِ دزگیر کرینے۔

داڑے بلوچستان نا بنجاہی شار کوئٹہ غان حوال آتا رد ئٹ خاران نا ہندی حافظ علی، ہرا تینا لمہ ءِ درمان نا ردئٹ کوئٹہ غا ایسوسس اودے پاکستانی لشکر درو ننکان کوئٹہ ہوٹل آن دزگیر کرے ہراڑان گڈ او بیگواہ ءِ۔

یاتی مرے کہ حافظ علی نا ایلم مبارک ءِ ہم درو پاکستانی لشکر خاران آن دزگیر کرسہ بیگواہ کریسس، ہڑتوما ایلم تا زوراکی ئٹ بیگواہ نا برخلاف خاران ریڈ زون ئٹ خاہوت نا برانز برجا ءِ۔

بلوچستان نا علاقہ خاران آن اسہ بندغ ئس بیگواہ وختس کہ کیچ ئنا تحصیل بلیدہ آن کماش ءُ بندغ ئس یلہ مس۔

حوال آتا رد ئٹ خاران گرلز شاپنگ بازار آن پاکستانی لشکر اسہ ورنا ئسے زوراکی ئٹ دزگیر کریسہ بیگواہ کرینے۔

بیگواہ مروکا ورنا نا چاہنداری مبارک سیاپاد نا پن ئٹ مسنے ہرا کہ راسکوہ لوس ئنا ہندی ئسے ہرا اسہ درزی نا دکان ئس چلیفیکہ۔

شابیت احوال تا ردئٹ پاکستانی ڈکھوک ادارہ غاتا کارندہ غاک خاران گرلز بازار ئٹ برسہ مبارک سیاپاد ءِ ہمو وخت آ برمتہ کریر ہراتم او تینا دکان ئٹ تولوک ئس، پاکستانی ڈھکوک ادارہ غاتا کارندہ غاک مسہ گاڑی تیٹ بسر ہرا کہ سادہ انگا پچ آتیٹ ئسر۔

ایلو پارہ غان بلیدہ میناز نا ہندی 65 سالی آ کماش کھریا عبدالکریم 14 دے پاکستانی لشکر نا دو تیان بیگواہی آن گڈ اینو یلہ مریسہ اُرا ءِ سر مس۔

خوش قسمت او زہری کلّو
خنتٹ خنارک سینہ بلّو
اِستو خلق ئس کوکٹ پارے
دا شرف شالہ کُلّے ملّو

اوتا ندرٹ شارا بسور
بڈس خوشی ننکن ایسُر
دژمن حیران ماندہ مسور
اوتا مونا گوڈا توسُر

بمب و توفک جنگی موسم
اینو شیفو گواڑخ بلسم
غیرے خلکر اندن سٹّار
دنکے روتک بزغر خولم

بسّک الکک بیرے تینا
چٹتس خلکا مہرے تینا
اوتو داسہ تینٹ چارہ
دیرس غیرے دیرے تینا

داسہ مستی مریک دمچر
بریک ھیروف اتیک خاخر
دڑور شیفی وطن نا مارُوک
خڑکا مریک زالان دلبر

زالان بلوچ

بلوچستان ئٹی برجاء سال ئنا جنوری ٹی 1,831 روڈ شکست رپورٹ مسنو۔ ہرافتیٹی 39 بندغ بیران و 2,409 ٹپی مسنو۔

میڈیکل ایمرجنسی ریسپانس سینٹرز (MERC) 1122 نا شنگ کروک رپورٹ نا رد ئٹ، بلوچستان نا جتا علاقہ اندن کہ لک پاس، مستونگ، قلات، لسبیلہ، چمن، قلعہ سیف اللہ، ژوب، سبی، لورالائی، جعفر آباد، کیچ، پنجگور و خضدار ئٹی دا تدینیک مسنو۔

السی حلقہ غاک تیبہ بلوچستان ئٹی ودوکا کچ آ فریشانی نا درشانی کرسا کسر تا حالیت ءِ جوان کننگ و ٹریفک قانود آتیا جوانی ئٹ عمل کننگ نا خواست کرینے۔

او پارینے کہ کسر تا خراب حالیت و ٹریفک قانود آتیان چپ ہننگ دا تدینی تا اہم سوب ءُ۔

خدو، 2024 ئٹ بلوچستان ئٹی روڈ شکست آتیٹ 402 نہادیئو ساہ زیان مسوسر و 30,000 آن زیات ٹپی مسوسر۔

دا کچ و حساب آن پھاش مریک کہ روڈ شکست آتے توننگ کن دمدستی گھام ہرفنگ نا گرج ء، ہرافتیٹ روڈ آتے جوڑ کننگ، ٹریفک قانود آتیا سختی ئٹ عمل کننگ و ڈرائیور آتا تربیت اوار ء۔

بلوچستان نا ضلع پنجگور ٹی نا درست سلہہ بند گاڑی تیا مروک سم کاری کریسہ اسہ بندغ ئسے کسفیر۔

شابیتی احوال تا ردئٹ پنجگور نا بنجائی علاقہ چتکان تار آفیس نا ہند آ گاڑی ٹی سوار نادرست سلہہ بند بندغ آک سم کاری کریسہ اسہ بندغ ئسے کسفیر ہرانا چاہنداری عبدالرحمن ولد شوکت نا پن آن مسونے ۔

پولیس نا ردئٹ پنجگور نا علاقہ چتکان تار آفس ٹی نادرست سلہہ بند گاڑی آ مروک سم کاری کریسہ اسہ بندغ ئسے کسفینو ہرادے ٹیچنگ ہسپتال پنجگور آ دننگا ۔

پولیس نا پاننگ ءِ کہ پن کروک بندغ لینڈ کروزر گاڑی ٹی ئس ہراد چتکان تار آفیس نا ہند گاڑی آ مروک خاہوت کن دکان آن گِڑا ہلنگ کن دھڑنگاسس کہ اودے سلہہ بند بندغ آک سم کاری کریسہ ٹک کریر ۔

واہم تدینی نا سوب آک دائسکان سما متنو ۔

وطن نا دا مہرے ای استٹ تخانٹ
اے سنگت نا دیدے ای خنتٹ تخانٹ۔

دڑانس نی داسہ کنا روح اٹی دن
اے اسلم نا عہدے ای سوچٹ تخانٹ.

خنانٹ نے اخس ای بڑزا خنانٹ
ای زیباغا شالءکہ دیدٹ تخانٹ

وطن آسراتی تے نیکن ای الاٹ
وطن کہ ای سائے وامہراٹ تخانٹ

خنانٹ دا ورنا تے سائے فداکیر
امو دے آن باسط نےشعراٹ تخانٹ

باسط ہکلی

استو بلوچستان نا جتاء علاقہ سبی، قلات و چمن ئٹ تراک و سم کاری نا تدینیک مسر۔

حوال آتا رد ئٹ قلات شار ٹی پولیس لائن نا ہائی اسکول نا امتحان ہال ئنا پارہ غان ٹہیفوک پاکستانی فورسز نا چوکی آ بمب جلہو اس مس واہم تراک ئٹ نسخان آتا جوانیکا سما تمتو۔

ایڑے سبی ٹی نادرست آ بندغ آک تراک اس کریر۔

پولیس حوالی تا رد ئٹ کریکر تراک ئٹ ہچو نسخان ئس متنے، پولیس ہمو ہند آ سر مریسہ پٹ و پول ءِ بنا کرینے۔

ایلو پارہ غان چمن ماسٹر پلان نا خڑک آ دیگر آن گڈ نا درست آ بندغ آک سم کاری کریسہ ایف سی کارندہ عبد الحکیم ولد امیر محمد قوم عشیزئی پڈو کاریز نا ہندی مرگ ئنا گواچی مس۔

خیبرپختونخوا نا علاقہ ڈیرہ اسماعیل خان نا علاقہ درابن ٹی مروک اسہ بمب تراک اسیٹ بلوچستان نا لیویز فورس نا چار کارندہ تون اوار پنچ بندغ مرگ ئنا گواچی مسونو ۔

لیویز فورس نا ردئٹ ضلع پشین آن تعلق تخوک پنچ بندغ درابن نا علاقہ ٹی بمب تراک ئٹ ٹک کننگانو ۔

ذرائع نا ردئٹ منہ دے مالو ضلع پشین نا علاقہ خانوزئی آن اسہ ٹرک ئس دُزنگاسس ہرادے ڈیرہ اسماعیل خان آن دوئی کننگاسس ۔

ضلع پشین آن خانوزئی تھانہ نا نائب رسالدار نور احمد نا قیادت ٹی گیشتر مسہ کارندہ و ٹرک ڈرائیور ءِ دوئی کننگ و ڈوہدار تے دزگیر کننگ کن ڈیرہ اسماعیل خان آ ہناسر ۔

ڈیرہ اسماعیل خان آ رسینگنگ آن مالو درابن نا علاقہ لیویز فورس نا کارندہ آتا گاڑی بمب تراک ئٹ ٹک کننگا و پنچ بندغ مرگ ئنا گواچی مسر ۔

ہرافتا چاہنداری نور احمد نائب رسالدار، رشید زمان سپاہی، داٶد خان سپاہی و بلال احمد سپاہی نا پن آن مسونے ۔

شہید امیر بخش عرف سگار بلوچ

نوشت: کوہ دل بلوچ

دی بلوچستان پوسٹ

ایڈوکیٹ شہید امیر بخش بلوچ 1986ء ئٹی حاجی خان محمد لانگو نا ارا ٹی خن ملا ۔ حاجی خان محمد ہمو باوہ ءِ کہ مسہ مار ئنا جون ءِ کوپہ تسنے داکان گُڈ ہم اونا کوپک چلتن نا ٹل آن بار جِک سلوک مسنو ۔ شہید امیر بخش بلوچ شال کلی اسمائیل مدرسہ گلی ٹی ورنا مس ، اونا باوہ پیرہ ئی آ خلق منگچر ءِ۔

او تینا بنائی خواننگ ءِ جامع ہائی سکول ہدہ آن دوئی کرے اوکان گُڈ یانزدہ و دوانزدہ نا ڈگری ءِ سائنس کالج کوئٹہ آن ہلک۔ پولی ٹیکنیک کالج آن انجینئرنگ نا ڈپلوما اس ہرفے، ایل ایل بی (کانود) شال لا کالج آن کرے ۔

شہید امیر بخش ورنائی آن بلوچ نا دڑد و کرب آتے مارنگ ئس۔ است ئنا تہہ آن راج ئنا سینہ نا ٹپ آتا ہسونی ءِ پو مسکہ۔ بزگی ، لنگڑی و شپادی نا احساس ءِ تینا رغ تیٹی ہندی کریسس ۔ ورنائی اسے آن راجی جوزہ و راجی سمائی نا ٹُل آ سلوک تینا راج ءِ ملوکا است و چاہندار آ خن تیٹ ہراکا۔ ۱۰ اکتوبر 1998 نا بلوچ اوغان تا جنگ ئٹ بھاز ٹپی مس ولے راج و ڈیہہ ئنا بخت و شین ئٹ ٹپ آک تہ زوت دراخ مسر ۔ بھلا مجید (مجید اول) نا بٹھو آ جند ندر جلہو ئٹ ہننگ سگار ءِ اسہ ساعت اس است کٹئی کن ہلتو ، بلکہ جوزہ ، حوصلہ و سوگوی تون مستی گام خلنگ کن کسر نا ڈس ترسہ کرے ۔ تینے ایلم نا کڑد و فکر ئٹ گنڈیسہ شہید امیر بخش تینا کاٹمے تلف آ تخنگ کن سنج ئس ۔ امیر بخش ہیت و گپ ءِ عمل آن بیدس زیان تکاکہ

شہید امیر بخش نا بنداوی تربیت نا سوب بابا خیر بخش مری نا “حق توار دیوان” تا تولنگ و سیاسی سنگت آتا ہمراداری پاننگک ، اونا استاد آتیٹ مجید ثانی نا پن ہم نشخ ءِ۔ شہید امیر بخش بلوچ راج ئنا نیامٹ اسہ سوگو ، چاہندار ، فکری و زانتکار او راہشون و مہبر اس نا پنٹ درست مریک ۔ جنگ انت ئسے؟ جنگ امر مریک؟ جنگ ئنا نفع و نسخان آک انت ءُ؟ جنگ انتہ المی ءِ؟ جنگ آن گڈ انت ئس دو بریک ؟ جنگ ئنا نیامٹ امرو حالیت بریک ؟ شہید امیر بخش جنگ ئنا ہر پہلو آن سرپد مسنے ۔ جنگ ئنا ہر زیم و نسخان آن واخب و جنگ ئنا سوب پدین آ پگہ نا ہم معلومداری تون اوار جنگ ئنا تہہ ٹی ساڑی ئس ۔ سلہہ بند جہد ئٹ نا کاریم تا وڑ و ڈول تینے تینٹ منیفینے و اینو اسکا بے مٹ و بے مثال خیال تکنگک ۔

شہید امیر بخش سلہہ بند جہد ئنا کل خواست و لوٹ آتے پورہ کریسہ اول صف ئنا راہشون تیٹ پن مسکہ۔ اسہ کوہ زاد و مشمار اس تننظیم نا راز ءِ تینا روح و بدن نا اُزبہ اس سرپند مریک ، رازداری جہد ئنا زیبائی و ہاٹی ءِ جہد ئنا آزمان ئٹ گندار نا وڑ درشان کیک ۔ جاٹہ و کلاش تون آوار ہر جہد کار مڈول ئٹ راز ئنا باریم ءِ ہم بَڈ کیک تاکہ مزل و مسخت نا کنڈا ترندی و سوگوی ئٹ رمب مرے۔ شال ئنا ہر گلی کوچہ آن ہلیس ناگاؤ، ماران و بولان نا خل خل سنگت سگار نا راز داری نا شاہدی ءِ ایتک بیرہ شاہدی آخہ بلکن ہر ورنا کہ تکڑئی ، مڑدی ، سوگوی ، و ہشاری نا پنت ہم ساڑی ءِ۔

شہید سگار نا باروٹ پاننگک کہ او راز داری ءِ اسہ جہدکار و سرمچار اسیکن بدن ئٹ روح ئنا وڑ سرپند مسکہ ، سنگت تا خیالداری، جہد ئٹ پوسکنو وڑ و ڈول تے ہتنگ، کتاب خواننگ، جنگ ئنا تہہ ئنا سختی و سوری تیان پو، مہر و راہشونی نا اسہ چیدہ اس ئس و داسکان ہمو چیدہ تخوک ءِ ہر ورنا نا کسر شونی کن۔ ہمو چیدہ کہ اینو پہ دے اسکا جہد کار آ ورنا تا سگ ئنا چیدہ ، جوزہ نا چیدہ ، دلیری و ہمت نا چیدہ ءِ۔

سگار ، بلوچ راج ئنا ہمو زغم اسکہ ہرا دشمن نا سینہ ءِ کپ کریسہ سرسہبی نا کلہو ءِ تسکہ ۔ سگار راج ئنا ہمو زغم ءِ ہرانا گروشک اینو ہم تہاری تے مات ایتسہ مستی جم جوش ئٹ پند خلنگ ءِ۔ سگار بلوچ اسہ سر جم ءُ شاری گوریلا اسیتون اوار اوار اسہ ٹیکنیکل ءُ جہد کار اس ئس۔ شار ئٹی دژمن کن ہر گام آ اسہ دام ئس ، اسہ زار ئس ، اسہ مرگ ئس کڈ کریسس اینو اسکا دژمن ہمو زار، دام و مرگ ئنا گواچی ڈونڈ و جون تے مچ کننگ ءِ، دژمن جارات نا دم ہلنگ کن سِکا کہ ۔ سگار دژمن نا تغ تے حرام کروکو شاری جہد کار اس ئس۔

 27 جنوری 2010 نا نن ، ناگاؤ نا پتن و گشاد آ سینہ کن زراب ئس مس ، بولان نا گٹ و تلار تیکن وے ایسر و پرات ئس مس ، خیسن آ جہد ئکن یتیمی نا آسڑد ئس مس ، بے شین آ راج و ڈیہہ ئکن امیت نا ٹکر ٹکر مروکو شیشہ ئسے نا مثیل مس ۔ یخین ئٹ ہندا شام بڑز آزمانی آ شک آک ساعت اس گمر آن تینا سینہ ءِ مونی کش ایتسہ کاٹم ءِ زرس پین بڑز کرور ولے غم آن تہٹی موڷ کرور پیچ و تاب کنور ۔ انتیکہ سگار دا مش تے تینا کڑدار آن بڑز توروکو تمبہ اس نا وڑ ئس ۔ ولے ہندا شام ہمو شام ئس کہ سگار تینا دترتیٹ دیہاڑی آ کاغذ ءِ خیسن کرے ۔

مستونگ نا ایب کیب ئٹ مش تا بوچ آک مستاہی ہلیسہ تینا گُنگ آ دوی تون ہر مش زاد ءِ پاننگ نا بے سہب و جہد اس کرور کہ سگار نمے آن جتا مس ولے بیرہ جون تہ ۔ فکر و نظریہ ، جوزہ ، ہمت و دلیری تہ نم تون تُد مرو ، نما کسر شونی ء کرو نمے مزل اسکا سر کرو۔ دا ہمو شام ئس کہ بلوچ راج اسہ استاد ، ہستی ، راہشون و سرخیل اسے آن محروم مس ۔ ولے ہر بلوچ ئٹ اینو شہید سگار نا فکر ، نظریہ و قربانی نا فلسفہ روتہ خلکنے ۔ اینو نا جہد ہر ہمو جہدکار نا دتر تا توری ءِ کہ ہراک جہد ءِ کوپہ ترسہ بڑز کریر تینے دتر ئٹ اسٹ کریر ۔ دنیا جہان ن ارا ہالم ، خلق خاہوت، زند ئنا گڑتی تے شکی کرسہ تینے سم تا مونا تسر و جہد ئنا سرسہبی کن خید و دتر ئٹ چڑار۔ تظیمی کاریم اسیٹ ہننگ نا وخت امیر بخش مستونگ ئٹ کسر نا تدینی ئسے نا سوب شہیدی نا گلاس ءِ گُلم کرے ۔ دا شام ڈیہہ ئنا جغر ءِ کپ کریسہ بدن ئٹ ہندنو ٹپ ہلا ہرا اینو پہ دے اسکا درمان مننگ کتور ۔ شہید امیر بخش ء تنظیم “سگار ءِ بلوچ “ بلوچ نا زغم ئنا پن ترسہ رخصت کرے ۔