شہید امیر بخش عرف سگار بلوچ
نوشت: کوہ دل بلوچ
دی بلوچستان پوسٹ
ایڈوکیٹ شہید امیر بخش بلوچ 1986ء ئٹی حاجی خان محمد لانگو نا ارا ٹی خن ملا ۔ حاجی خان محمد ہمو باوہ ءِ کہ مسہ مار ئنا جون ءِ کوپہ تسنے داکان گُڈ ہم اونا کوپک چلتن نا ٹل آن بار جِک سلوک مسنو ۔ شہید امیر بخش بلوچ شال کلی اسمائیل مدرسہ گلی ٹی ورنا مس ، اونا باوہ پیرہ ئی آ خلق منگچر ءِ۔
او تینا بنائی خواننگ ءِ جامع ہائی سکول ہدہ آن دوئی کرے اوکان گُڈ یانزدہ و دوانزدہ نا ڈگری ءِ سائنس کالج کوئٹہ آن ہلک۔ پولی ٹیکنیک کالج آن انجینئرنگ نا ڈپلوما اس ہرفے، ایل ایل بی (کانود) شال لا کالج آن کرے ۔
شہید امیر بخش ورنائی آن بلوچ نا دڑد و کرب آتے مارنگ ئس۔ است ئنا تہہ آن راج ئنا سینہ نا ٹپ آتا ہسونی ءِ پو مسکہ۔ بزگی ، لنگڑی و شپادی نا احساس ءِ تینا رغ تیٹی ہندی کریسس ۔ ورنائی اسے آن راجی جوزہ و راجی سمائی نا ٹُل آ سلوک تینا راج ءِ ملوکا است و چاہندار آ خن تیٹ ہراکا۔ ۱۰ اکتوبر 1998 نا بلوچ اوغان تا جنگ ئٹ بھاز ٹپی مس ولے راج و ڈیہہ ئنا بخت و شین ئٹ ٹپ آک تہ زوت دراخ مسر ۔ بھلا مجید (مجید اول) نا بٹھو آ جند ندر جلہو ئٹ ہننگ سگار ءِ اسہ ساعت اس است کٹئی کن ہلتو ، بلکہ جوزہ ، حوصلہ و سوگوی تون مستی گام خلنگ کن کسر نا ڈس ترسہ کرے ۔ تینے ایلم نا کڑد و فکر ئٹ گنڈیسہ شہید امیر بخش تینا کاٹمے تلف آ تخنگ کن سنج ئس ۔ امیر بخش ہیت و گپ ءِ عمل آن بیدس زیان تکاکہ
شہید امیر بخش نا بنداوی تربیت نا سوب بابا خیر بخش مری نا “حق توار دیوان” تا تولنگ و سیاسی سنگت آتا ہمراداری پاننگک ، اونا استاد آتیٹ مجید ثانی نا پن ہم نشخ ءِ۔ شہید امیر بخش بلوچ راج ئنا نیامٹ اسہ سوگو ، چاہندار ، فکری و زانتکار او راہشون و مہبر اس نا پنٹ درست مریک ۔ جنگ انت ئسے؟ جنگ امر مریک؟ جنگ ئنا نفع و نسخان آک انت ءُ؟ جنگ انتہ المی ءِ؟ جنگ آن گڈ انت ئس دو بریک ؟ جنگ ئنا نیامٹ امرو حالیت بریک ؟ شہید امیر بخش جنگ ئنا ہر پہلو آن سرپد مسنے ۔ جنگ ئنا ہر زیم و نسخان آن واخب و جنگ ئنا سوب پدین آ پگہ نا ہم معلومداری تون اوار جنگ ئنا تہہ ٹی ساڑی ئس ۔ سلہہ بند جہد ئٹ نا کاریم تا وڑ و ڈول تینے تینٹ منیفینے و اینو اسکا بے مٹ و بے مثال خیال تکنگک ۔
شہید امیر بخش سلہہ بند جہد ئنا کل خواست و لوٹ آتے پورہ کریسہ اول صف ئنا راہشون تیٹ پن مسکہ۔ اسہ کوہ زاد و مشمار اس تننظیم نا راز ءِ تینا روح و بدن نا اُزبہ اس سرپند مریک ، رازداری جہد ئنا زیبائی و ہاٹی ءِ جہد ئنا آزمان ئٹ گندار نا وڑ درشان کیک ۔ جاٹہ و کلاش تون آوار ہر جہد کار مڈول ئٹ راز ئنا باریم ءِ ہم بَڈ کیک تاکہ مزل و مسخت نا کنڈا ترندی و سوگوی ئٹ رمب مرے۔ شال ئنا ہر گلی کوچہ آن ہلیس ناگاؤ، ماران و بولان نا خل خل سنگت سگار نا راز داری نا شاہدی ءِ ایتک بیرہ شاہدی آخہ بلکن ہر ورنا کہ تکڑئی ، مڑدی ، سوگوی ، و ہشاری نا پنت ہم ساڑی ءِ۔
شہید سگار نا باروٹ پاننگک کہ او راز داری ءِ اسہ جہدکار و سرمچار اسیکن بدن ئٹ روح ئنا وڑ سرپند مسکہ ، سنگت تا خیالداری، جہد ئٹ پوسکنو وڑ و ڈول تے ہتنگ، کتاب خواننگ، جنگ ئنا تہہ ئنا سختی و سوری تیان پو، مہر و راہشونی نا اسہ چیدہ اس ئس و داسکان ہمو چیدہ تخوک ءِ ہر ورنا نا کسر شونی کن۔ ہمو چیدہ کہ اینو پہ دے اسکا جہد کار آ ورنا تا سگ ئنا چیدہ ، جوزہ نا چیدہ ، دلیری و ہمت نا چیدہ ءِ۔
سگار ، بلوچ راج ئنا ہمو زغم اسکہ ہرا دشمن نا سینہ ءِ کپ کریسہ سرسہبی نا کلہو ءِ تسکہ ۔ سگار راج ئنا ہمو زغم ءِ ہرانا گروشک اینو ہم تہاری تے مات ایتسہ مستی جم جوش ئٹ پند خلنگ ءِ۔ سگار بلوچ اسہ سر جم ءُ شاری گوریلا اسیتون اوار اوار اسہ ٹیکنیکل ءُ جہد کار اس ئس۔ شار ئٹی دژمن کن ہر گام آ اسہ دام ئس ، اسہ زار ئس ، اسہ مرگ ئس کڈ کریسس اینو اسکا دژمن ہمو زار، دام و مرگ ئنا گواچی ڈونڈ و جون تے مچ کننگ ءِ، دژمن جارات نا دم ہلنگ کن سِکا کہ ۔ سگار دژمن نا تغ تے حرام کروکو شاری جہد کار اس ئس۔
27 جنوری 2010 نا نن ، ناگاؤ نا پتن و گشاد آ سینہ کن زراب ئس مس ، بولان نا گٹ و تلار تیکن وے ایسر و پرات ئس مس ، خیسن آ جہد ئکن یتیمی نا آسڑد ئس مس ، بے شین آ راج و ڈیہہ ئکن امیت نا ٹکر ٹکر مروکو شیشہ ئسے نا مثیل مس ۔ یخین ئٹ ہندا شام بڑز آزمانی آ شک آک ساعت اس گمر آن تینا سینہ ءِ مونی کش ایتسہ کاٹم ءِ زرس پین بڑز کرور ولے غم آن تہٹی موڷ کرور پیچ و تاب کنور ۔ انتیکہ سگار دا مش تے تینا کڑدار آن بڑز توروکو تمبہ اس نا وڑ ئس ۔ ولے ہندا شام ہمو شام ئس کہ سگار تینا دترتیٹ دیہاڑی آ کاغذ ءِ خیسن کرے ۔
مستونگ نا ایب کیب ئٹ مش تا بوچ آک مستاہی ہلیسہ تینا گُنگ آ دوی تون ہر مش زاد ءِ پاننگ نا بے سہب و جہد اس کرور کہ سگار نمے آن جتا مس ولے بیرہ جون تہ ۔ فکر و نظریہ ، جوزہ ، ہمت و دلیری تہ نم تون تُد مرو ، نما کسر شونی ء کرو نمے مزل اسکا سر کرو۔ دا ہمو شام ئس کہ بلوچ راج اسہ استاد ، ہستی ، راہشون و سرخیل اسے آن محروم مس ۔ ولے ہر بلوچ ئٹ اینو شہید سگار نا فکر ، نظریہ و قربانی نا فلسفہ روتہ خلکنے ۔ اینو نا جہد ہر ہمو جہدکار نا دتر تا توری ءِ کہ ہراک جہد ءِ کوپہ ترسہ بڑز کریر تینے دتر ئٹ اسٹ کریر ۔ دنیا جہان ن ارا ہالم ، خلق خاہوت، زند ئنا گڑتی تے شکی کرسہ تینے سم تا مونا تسر و جہد ئنا سرسہبی کن خید و دتر ئٹ چڑار۔ تظیمی کاریم اسیٹ ہننگ نا وخت امیر بخش مستونگ ئٹ کسر نا تدینی ئسے نا سوب شہیدی نا گلاس ءِ گُلم کرے ۔ دا شام ڈیہہ ئنا جغر ءِ کپ کریسہ بدن ئٹ ہندنو ٹپ ہلا ہرا اینو پہ دے اسکا درمان مننگ کتور ۔ شہید امیر بخش ء تنظیم “سگار ءِ بلوچ “ بلوچ نا زغم ئنا پن ترسہ رخصت کرے ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔