کیچ نا علاقہ دشت شے زنگی ٹی پاکستانی لشکر نا گاڑی ءِ بمب جلہو ٹی ٹک کننگانے ۔
بمب تراک استو تربت بنجائی کسر آ پاکستانی لشکر نا کارندہ آتیا مس ۔ ہندی ذرائع نا ردئٹ تراک ٹی کارندہ آتے جانی و مالی نسخان تون مون تروئی تمانے ۔
جلہو آن گڈ لشکری کارندہ آتا بھلو کچ ئس علاقہ ءِ گھیرہ کریسہ لشکر کشی ءِ بناء کرے اندن جلہو نا ذمہ واری ءِ دائسکان کس ارفتنے ۔
نظم: راجی مچی بیست پنچ جنوری (دالبندین)
مزدک
سال انا دا جنوری نا بیست و پَنچ آ دے اکے
دالبندین نا دغار آ سر مرینَک ڈیھ اکے
لُمّہ غاتا آہ تیان گُھٹ آک بارُن مسّونو
کوپہ سیکے ایڑ اسینا خَنک خیسُن مسّونو
سیاسر آتا انتظار ئٹ خُشک پیہُن مسّونو
چوچہ غاتا باوہ کے دڑد آک پَینگُن مسّونو
گُمگار آتیکے مَش کُلبر مرینَک ڈیھ اکے
بھاز مَسّک خِسکہ اوغنگ پَنجہ جَلِّنگ بھاز مس
درپدَر رُلِّنگ پین تا نَت تیا تَمِّنگ بھاز مس
مون اٹی تادی تا مُستی جوڑتا مُوغِنگ بھاز مس
حق انا آزان آ خَف ٹی پَمبہ تِنِّنگ بھاز مس
جوژ ایتن داتے بہ گوھَر مرینک ڈیھ اکے
اٹ و مٹ پین لَنگڑی و بینگُنی نا زندگی
اٹ و مٹ پین خَن لُڑونجی پا سلے شرمندگی
اٹ و مٹ پین ہَست اٹی دا نیستی دا بیوسی
اٹ و مٹ پین بُت پرستی بےحِسی بےبندَغی
دا بلا تا مون آ یک سنگَر مرینَک ڈیھ اکے
یاد بر کین گُلگُلآب آتے ہرا مسُّر ندَر
دا چمن نا او ہتم کے تِسُّرَک گُھٹ آن دتَر
مُخلصی کننگے داتا مُخلصی آ چٹ گھمَر
دا امو شاہزادہ غاکو دائمی مسُّر امَر
دِلرُبا دِلدار دُن دِلبَر مرینَک ڈیھ اکے
بر نشاں سیال آتے ایتن داسکا نن زندہ ھون
زندہ ھون ہر گُگ تہار آتیٹی پھل تابندہ ھون
بھاز حیرانے امر نن دڑد اٹی بشخندہ ھون
او بروکا دؤر اٹی دا راج انا آئندہ ھون
راج ئکے بادوفر و رہبر مرینَک ڈیھ اکے
ہَرف جَت بَت نا نی بیرَک حق انا دو ٹی الَم
جُنز انا دا بشخ مر نا باغ تیبہ کے وسَم
زُلم انا زَالم نا مظلوم آتِکے کر سرقلَم
سی و نو ہفتاد چِل و ہشت نا ٹپ ءِ کر ملَم
بر مرید گہرام چئے چاکَر مرینَک ڈیھ اکے
ہلبو سر نُم اُستمان نا او حقیقی حق اکے
چُست چَسپان گامے ہرفبو گُلزمین نا رَک اکے
شُور شال بولان کہکان مکّران سیندَک اکے
ڈیھ انا دیوانہ غا مَستانہ غا مزدَک اکے
زمغ او بولان ئنا اِسپَر مرینَک ڈیھ اکے
تربت ئٹ استو پاکستانی لشکر اُرا تیا چھاپہ نا وخت آ اِرا بندغ ءِ زوراکی ئٹ بیگواہ کرے، زہمی مروک خاہوت آتا ردئٹ فورسز آک اِرا گھنٹہ آن زیات زالبول و چنا تیا بیدادی کریر۔
بلوچستان ئٹ زوراکی نا بیگواہی تا لڑ دائسکان برجاء ءِ ہراڑے دا تدینی تا برخلاف سوراب و تربت ئٹ مُسہ جتا ہند آتیا تولوک برانز مریسہ ءِ۔
ضلع کیچ نا بنجاہی شار تربت آن استو پاکستانی لشکر پین اِرا بندغ ءِ زوراکی ئٹ بیگواہ کرے۔
علاقائی حوالکار تا ردئٹ استو کم و ود 2 بجہ غا تربت نا علاقہ نیو بہمن ڈھنک ئٹ پاکستانی لشکر فرنٹیئر کور جاوید کریم بلوچ و ہمسایہ تا اُرا تیا چھاپہ خلک، دا وخت آ جاوید کریم بلوچ نا ایڑ ئنا مار بلال بلوچ ولد حیدر علی و ہمسایہ اسماعیل ولد حیر محمد ءِ دزگیر کریسہ نادرست ہند آ درے۔
حوال تا ردئٹ فورسز آک اِرا گھنٹہ آن زیات اُرا تے پٹار و زالبول و چنا تیتون اوار ایلو بندغ آتیا بیدادی کریر۔
پن کروک ہڑتوم آ بندغ آتا بابت دائسکان ہچ وڑ نا معلومداری رسینگتنے۔ ضلعی کوالخواک دائسکان دا بابت ہچو ہیت اس مونا ہتنو۔
بلوچستان نا ضلع کوہلو آن پاکستانی لشکر چار بندغ ءِ زوراکی ئٹ بیگواہ کرے ۔
احوال آتا ردئٹ پاکستانی لشکر بالاچ لوہانی ءِ تینا کیمپ ئٹ خوائفیسہ زوراکی ئٹ بیگواہ کرے ۔
علاقائی ذرائع نا ردئٹ بالاچ لوہانی نا ارا مار ءِ ارا تُو مالو پاکستانی لشکر زوراکی بیگواہ کرے، کوالخواک بالاچ لوہانی ءِ مار تا آجوئی نا بابت ئٹ کیمپ آ خوائفیسہ اودے ہم بیگواہ کریر ۔
داڑان بیدس مسہ دے مالو یار خان جلمبانی ءِ اونا اراغان دزگیر کریسہ بیگواہ کننگا اندن مسہ دے مالو کوڈے ولد میشدار لوہارانی و جمعہ شاہیجو ءِ کسر آن دزگیر کریسہ زوراکی ئٹ بیگواہ کننگا ۔
بلوچستان ٹی زوراکی ئٹ بیگواہی تا تدینیک دے پہ دے ئنا بنیات آ مونا بننگو ۔
ہنوکا دے خضدار نا تحصیل زہری آن 12، ڈیرہ بگٹی آن 9، خاران آن 2 و نوشکی آن 2 بندغ ءِ زوراکی ئٹ بیگواہ کننگا ۔
زوراکی ئٹ بیگواہی تا برخلاف سوراب نا ہند سی پیک روٹ آ ارا دے اسکان تولوک برانز کننگا اندن تربت ٹی ہم برانز نا لڑ برجاء ءِ ۔
بلوچستان نا علاقہ خضدار و کیچ آن ارا بندغ نا جونک خننگانو ۔
جونک خضدار نا علاقہ زہری و کیچ نا علاقہ مند آن دوئی مسونو ۔
ذرائع نا ردئٹ زہری مشک بازار کسر آ کشمی نا ہند آ درست بندغ ئسے نا جون دوئی مس ہرادے سم خلیسہ کسفنگانے ۔
ایلو پارہ غان ضلع کیچ نا علاقہ مند کھنک آن احوال آک ءُ کہ درے نن مسہ بجہ غا نا درست بندغ آک اراٹی پترنگیسہ محمد ولد رضائی ءِ بیگواہ کریر ہرانا اینو سہب تون جون دوئی مسونے ۔
واہم ہڑتمکا تدینی تا سوب آک دائسکان سما تمتنو ۔
زہری و اونا خڑک ئنا علاقہ تیٹ زوراکی نا بیگواہی تا و اسہ ورنا ئسے نا بیدس عدالت کسفنگ نا برخلاف السی برانز آک ترند مسنو ہندی حوالکار تا ردئٹ زہری ٹی فورسز آتا کارروائی تا وخت آ پاکستانی لشکر 12 بندغ ءِ زوراکی ئٹ بیگواہ اندن اسہ ورنا ئسے کسفینے۔
دا تدینی تا برخلاف زہری نا ہندیک جتا ہند آتیا تولوک برانز کننگ ءُ، ہرافتیٹ زہری شار، زہری کراس انجیرہ و زیرو پوائنٹ سوراب اوار ءُ۔
استو زہری کراس انجیرہ نا برانز کروک آک کیہی گھنٹہ تا پند آ سفر آن پد زیرو پوائنٹ سوراب ءِ سر مسر و ہموڑے برجاء تولوک برانز ئٹ اوار مسر دا برانز نا سوب کوئٹہ، کراچی بنجاہی کسر تیوہ بند ءِ، اندن برانزیک پڑو کرینو کہ تولوک برانز اوفتا بندغ آتا آجوئی اسکان برجاء مرو۔
ایلو پارہ غان ضلعی بست و بند نا پارہ غان برانزی تیتون گپ و تران نا کوشست کننگا واہم گپ و تران بے سہب مس، اندن ایلو پارہ غان زہری بازار ئٹ تیوہ شٹرڈاؤن ہڑتال برجاء ءِ، ہراڑے دکاندار آک فورسز کارروائی و زوراکی نا بیگواہی تا برخلاف دکان تے تینا بند کرینو۔
دا وخت آ بلوچ یکجہتی کمیٹی نا راہشون و شاریک و ایلو سیاسی و چاگڑدی تنظیم آتا باسک آک تولوک برانز جاہ غا بریسہ برانزی تیتون ہمکوپئی نا درشانی کریر۔
یاتی مرے تدوکا دے تیٹ بلوچ لبریشن آرمی نا زہری ٹی آپریشن آن پد پاکستانی لشکر نا پارہ غان کارروائی تا لڑ برجاء ءِ ہراڑے علاقہ ئٹ انٹرنیٹ و موبائل نیٹ ورک بند کننگانے ہراڑان بندغ آک حوالکاری ویل آتیتون مون تننگ ءُ۔
حوالکار تا ردئٹ زہری ٹی فورسز آک کیہی اُرا تیا چھاپہ خلکر و کیہی ورنا تے دزگیر کریر، ہرافتیٹ اسہ خاہوت ئسے نا کیہی بندغ آک اوار ءُ۔
سوراب برانزی تا پاننگ ءِ کہ یخ انگا مُد آن پد ہم زالبول، چنا و پیر انگا تیتون اوار مخلوق نا بھلو کچ اس تولوک برانز ئٹ اوار ءِ و اوفتا خواست ءِ کہ زوراکی ئٹ بیگواہ بندغ آتے آجو کننگہ۔
بلوچستان نا علاقہ تربت ئٹ پاکستانی لشکر دروغ نا بمب تراک ئٹی مالو آن بیگواہ بندغ ئسے کسفے۔
شابیتی حوال تا ردئٹ استو تربت نا علاقہ جوسک نا ہند آ اسہ تراک اسیٹی تربت پولیس منظور نا مار اتفاق پنی ءُ بندغ ئسے آ بمب کڈ کننگ وخت آ تینٹ تراک ئٹ کہنگ نا دوبہ خلکسر۔
خاہوت پولیس نا پارہ غان خلوک دوبہ تے رد کریسہ پارے کہ اتفاق منظور ءِ 10 ستمبر 2024 آ پاکستانی لشکر دزگیر کریسہ بیگواہ کریسس ہراتم او فورسز آتا دزگیر ئٹ ئس ہمو وخت فورسز آک اودے تینٹ بمب تراک نا ذریعت ئٹ کسفیر۔
خیال ئٹ مرے کہ اونا خاہوت خدو سال نا ایسر ئٹ اسہ پریس کانفرنس اسیٹی اتفاق منظور و اونا پین اِرا ایلم نا سکیورٹی ادارہ تا دو آن زوراکی ئٹ بیگواہی نا بابت میڈیا تون ہیت کریسر واہم اتفاق منظور نا ہڑتوم آ ایلم تے پدان یلہ کننگا ولے اودے استو اسہ تراک اسیٹی کسفنگا۔
لمئی بولی تا جہانی دے ئنا بابت عبدالکریم شورش و عبدالعزیز کرد ئنا یات ئٹ مستونگ ئٹ پروگرام اس اڈ تننگو۔
بلوچ ڈغار نا زی آ ودی مروکا ورنا ءِ ہچبر دا کاریم ءِ گڈیکو سرپد مروئی اف بلکن ہر عمل و کاریم ئٹ ہڑدے و تُو و سال ئنا حساب ئٹ جوان، گچین و سوگو کننگ نا گمان ہرفوئی و کوشست کروئی ءِ – چیئرمین شبیر بلوچ
بلوچ اسٹوڈنٹس ایکشن کمیٹی نا چارمیکو بنجائی کمیٹی نا دیوان کماش شبیر بلوچ نا کماشی ٹی اِرا دے ئٹ اڈ تننگا۔ ارا دے ئی دیوان نا ٹِک آتیٹی گل ئنا مسکوہی احوال، نغدکاری، تنظیمی امور، ہندی و جہانی سیاسی حالیت و بروکا گامگیج اوار ئسر۔ دیوان ئٹ کل آ ٹِک آتا زی آ اسٹ اسٹ آ گپ و تران آن گڈ بروکا گامگیج کن جتاء ءُ فیصلہ ہرفنگانے۔
دیوان نا اولیکو دے ئنا بناء کماش شبیر بلوچ نا موکل ئٹ کننگا، اولیکو ٹِک گل ئنا مسکوہی احوال ئس ہرادے دیوان نا مون آ پیش کننگا، ہراٹی بھلا کارگشاد نا احوال، گل ئنا کل کمیٹی تا احوال ہرافتیٹی لٹریچر، احوالکاری کمیٹی، فائنانس، بلوچ لٹریسی کیمپئین و بلوچستان کتاب کاروان کمیٹی نا احوال آک اوار ئسر۔ کمیٹی تا احوال آتیتون اوار گل ئنا کل آ ہنکین آتا زی آ خوڑتی ئٹ چمشانک و صباء لٹریری فیسٹیول نا دیوان آتا احوال و ایلو چنکا و بھلا احوال آک دیوان نا مون آ تخنگار۔
دیوان نا ارٹمیکو ٹِک نغدکاری ٹی سنگتاک گل ئنا چُنکا و بھلا کل نزوری تا زی آ اسٹ اسٹ آ گپ و تران کریر و اوفتے ایسر کننگ کن سَلاہ تسر۔ سنگتاک سیاست و سیاسی گل آتیٹی نغد ئنا زی آ شرہ کریسہ پاریر کہ نغد ہمو سیڑھی ءِ ہراڑان گدرینگسہ جہدکار اس ہر وڑ ئنا رد انقلابی رویہ تیان پاک و صاف مریسہ کیک و نہ بیرہ تینا سیاسی مسخت آ سر مریک بلکن پورہ ءُ انقلابی اس مریک و پیشتمک۔ جہان نا ہر راج یا کہ سیاسی گل آک نغد ئنا چاگڑد ئتون سفر کرینو، اوفک اینو بھاز آ مصنوعی کرائسز آتیان پاک تینا دیمروی نا سفر ئٹ سوگوی تون گام خلیسہ ءُ، دانا بھلا سوب آتیان اسٹ دادے کہ اوفک تینا سیاسی عمل نا جوان و گچین کننگ کن نغد کرینو و راجی سواد آتے رکھانو۔ اندا وڑ ننے تینا راجی سواد آتے ہُروئی ءِ و ہر رد انگا عمل ہرا راج ئکن نسخان ئسے اودے نغد ئنا گواچن آ عمل ئٹ جوان کروئی ءِ اندا خاطران نغد ئنا چاگڑد ئسے نا ودی کننگ کن الّمی ءِ کہ نغد کروکا و نغد بِنوکا ہڑتوم آتے سگ ئنا ہمت مرے۔ برداشت و سگ ئٹ نہ بیرہ نغد ئتون تفوکو انقلابی چاگڑد اس ودی مریک بلکن جہد ئٹ ہر وڑ ئنا رد انگا عمل و رویہ غاک توننگ و جوان کننگرہ۔
دیوان اولیکو دے نا ایسری آن پد ارٹمیکو دے آ کماش نا موکل ئٹ بناء کننگا و مسٹمیکو ٹِک تنظیمی امور ئٹ سنگتاک تنظیمی امور نا زی آ نوشتہ کروکا تینا ڈرافٹ آتے خوانار ہرافتیٹی دا نیام ئٹ مروکا کاریم و مون آ کاریم تا جوانی و پوسکن آ کاریم تا کنڈا ہننگ نا زی آ گپ و سَلاک اوار ئسرہ۔ سنگتاک گل کاری نا زی آ ہیت کریسہ پاریر کہ تدوکا سال و کپ ئٹ گل تینے کم و ود تیوہ غا بلوچستان ئٹ نہ بیرہ سر کرینے بلکن بلوچ ورنا تیکن شعوری و چاہنداری چاگڑد ودی کننگ آ ہم اسہ حد ئسے اسکان سرسہب مسنے۔ دا گل ئنا مہکمی و سنگت آتا ہمت و جوزہ نا بدولت ءِ کہ ادارہ نا کاریم و پالیسیک دے پہ دے آ جوان و گچین مریسہ ءُ، ولے بلوچ ڈغار نا زی آ ودی مروکا ورنا ءِ ہچ ہم دا کاریم تے ایسری و گڈیکو سرپد مروئی اف بلکن ہر عمل و کاریم ئٹ ہڑدے و تُو و سال ئنا حساب ئٹ جوان، گچین و سوگو کننگ نا گمان ہرفوئی و کوشست کروئی ءِ۔ بلوچ ورنا ئسے کن تینا ہر عمل ءِ راجی جہد ئکن اسہ چنکو بشخ اس سرپد مروئی ءِ، مدام گیشتر و گچین آن گچین نا نیت تون سوگو آ فکر ئتون سیاسی عمل ءِ مون آ دروئی ءِ تانکہ او ساڑی آ ہر وڑ ئنا چیلنج آتا مون ءِ توننگ کیر۔ بلوچ ورنا تے تینے فکری بابت اندن سوگو کروئی ءِ کہ اونا ہر سیاسی عمل اسہ اُست جم ءُ مستقبل اس تننگ تون اوار او ہر وڑ ئنا کُبینی و ہڑاند آتا مون آ مُر ہننگ تون سلیر۔ فکری حوالہ ئٹ سوگو و تینا عمل نا زی آ یقین توروکا جہدکار ہچ ہم پد سلپک بلکن مدام ہڑاند آتا مون آ سوگوی تون سلیک و اوفتے ایسر کننگ نا کوشست ءِ کیک۔ دا سوگوی ورنا تے تینا بلوچ ڈغار نا بزگی نا گواچنی و ایلو جہانی چاہنداری نا چائنگ و پوہ مننگ آن بریک اندا خاطران ہر عمل ءِ چاہنداری و شعور نا عینک تون راجی سواد آتیکن کاریم ئٹ ہتوئی ءِ۔ دنکہ اینو بلوچستان کتاب کاروان نا وسیلہ ئٹ بلوچ ورنا و مخلوق ئٹی خواننگ و چاہنداری نا ماحول ودی کننگ مرے یا کہ بی ایل سی نا وسیلہ ئٹ بلوچستان نا خواننگی ادارہ غاتا زوالی نا برخلاف توار بڑز کننگ و اوفتا جوان کننگ نا عملی کوشست مرے، گل خوانندہ گل ئسے نا حیثیت ئٹ بلوچ راج کن دا کاریم تا عملی دروشم ئٹ کوشست ئس کننگ ءِ و گل اینو سوگوی نا کسر ئٹ تینے اوار کرینے۔
دیوان نا گڈیکو ٹِک بروکا گامگیج ئٹ سنگت آتا تروکا سَلاہ تیان گیشتر کاریم و کاریم تے گچین آن گچین تر کننگ کن پوسکنو فیصلہ ہرفنگا: بروکا وخت ئٹ صباء لٹریری فیسٹیول ملیر و ڈی جی خان ئٹ اڈ تننگو، لمئی بولی تا جہانی دے ئنا بابت عبدالکریم شورش و عبدالعزیز کرد ئنا یات ئٹ مستونگ ئٹ مجلس اس اڈ تننگو، بلوچستان کتاب کاروان ءِ سوگو کریسہ پوسکنا سال ئنا بابت تیوہ غا بلوچستان ئٹ کتاب مُچی تا مہم اس چلفنگو، و ایسر ئٹ سیمینار اس اڈ تننگو، بلوچ خوانندہ سیاست نا زی آ شال و اوتھل ئٹ سیمینار اڈ تننگو، بلوچ لٹریسی کیمپئین نا کاروان ءِ گیشتر سوگو کریسہ بلوچستان نا بنداوی خواننگ نا ویل آتا زی آ ڈیٹا شینک کننگ تون اوار خواننگ جاہ تا پورہ کروکا ڈیٹا تا اسہ بریفنگ سیمینار اس اڈ تننگو، بلوچستان کتاب کاروان، میڈیا و کیرئیر کونسلنگ نا زی آ کتابُک (کتابچہ) و لمئی بولی نا زی آ براہوئی ٹی کتابُک اس چھاپ و شینگ کننگو- دافتیتون اوار بنجائی کمیٹی نا مُسہ سنگت شیراز بلوچ، فوزیہ بلوچ و مصدق بلوچ نا بنجائی کمیٹی نا اوغدہ غاتیان استعفٰی تننگ قبول کننگا و اوفتا اوغدہ غاتیکن خضدار ہنکین نا مسکوہی کارمستر جویریہ بلوچ، شال ہنکین نا ساڑی آ ہنکینی کارمستر فہد بلوچ و مسکوہی کارگشاد علی بلوچ بنجائی کمیٹی نا باسک گچین کننگار۔
اِرا دے ئی دیوان نا تیوہ غا بشخ آتا زی آ اسٹ اسٹ آ اُست جمی ئٹ گپ و تران آن پد بروکا گامگیج ئٹ جتاء فیصلہ ہرفنگ آن پد کماش نا موکل ئٹ دیوان ایسر کننگا۔
ہفتہ نا دے بلوچستان نا ضلع کیچ و کوہلو ٹی ارا جتاء تدینی تیٹ سرکاری مخ تف ٹولی نا ارا بندغ کسکر و مسہ بندغ ٹپی مسر ۔
پولیس نا ردئٹ ضلع کیچ نا تحصیل تمپ نا علاقہ کوھاڈ ٹی موٹر سائیکل آ مروک نا درست سلہہ بند بندغ آک سم کاری کریسہ جمیل ولد ملک داد اللہ سکنہ تمپ کوہاڈ ءِ مرگ ئنا گواچی کریر ۔
سم کاری آن معراج عارف ٹپی مس ہرادے تربت سول ہسپتال آ دننگا واہم او ہسپتال ئٹ ساہ تس ۔
علاقائی ذرائع نا ردئٹ پن کروک بندغ نا تعلق اسہ سرکاری ٹولی ئسے آن ئس ۔
ہمو وخت کوہلو ٹی نوئے شم نا علاقہ لونڈو ٹی سرکاری مخ تفی بندغ محبت خان مری نا کیمپ آ سلہہ بند بندغ آک جلہو کریر ہرانا سوب ئٹ مسہ بندغ ٹپی مسر ۔
جلہو کروک آک اوفتا جا ءِ خاخر تریسہ سلا تے تینتون دریر ۔
بلوچستان حکومت نا نابود آ کمکی بست و بند نا سوب آن کیہی دے آن پد کانڑ ئٹ گھٹ مروک دوانزدہ مزور نا جون تے کشنگا۔
کوئٹہ نا علاقہ سنجدی نا کولا کانڑ ئٹ کمکی آپریشن ایسر مس، غُٹ گھٹ مروک مزور تا جون تے کشنگانے۔
کوالخواہ تا رد ئٹ کوئٹہ نا علاقہ سنجدی نا کولا کانڑ ئٹ کمکی آپریشن ایسر مس، کمکی آپریشن مُسہ دے اسکان برجاء سلیس۔ کولا کانڑ ئٹ گھٹ مروک پین اِرا مزور نا جون تے کشنگانے۔
خیال ئٹ مرے کہ 3 دے مُست کولا کانڑ ئٹ زہری آ گیس پُر مننگ نا سوب آن کانڑ ئٹ تراک مسس۔ جونک المی کاروائی آن گڈ اوفتا باوہ پیرئی علاقہ شانگلہ غا رادہ کننگور۔
محکمہ مائنز کانڑ نا خواجہ نا برخلاف قانودی کارروائی نا فیصلہ کرینے، چیف مائنزانسپکٹر ہم ڈپٹی کمشنر ءِ مقدمہ کن چھٹی رادہ کرینے، ہراٹی پاننگانے کہ کول مائنز کمیٹی مزور تا رکھ اکن گھام ہرفتنے۔
