تربت ئٹ استو پاکستانی لشکر اُرا تیا چھاپہ نا وخت آ اِرا بندغ ءِ زوراکی ئٹ بیگواہ کرے، زہمی مروک خاہوت آتا ردئٹ فورسز آک اِرا گھنٹہ آن زیات زالبول و چنا تیا بیدادی کریر۔
بلوچستان ئٹ زوراکی نا بیگواہی تا لڑ دائسکان برجاء ءِ ہراڑے دا تدینی تا برخلاف سوراب و تربت ئٹ مُسہ جتا ہند آتیا تولوک برانز مریسہ ءِ۔
ضلع کیچ نا بنجاہی شار تربت آن استو پاکستانی لشکر پین اِرا بندغ ءِ زوراکی ئٹ بیگواہ کرے۔
علاقائی حوالکار تا ردئٹ استو کم و ود 2 بجہ غا تربت نا علاقہ نیو بہمن ڈھنک ئٹ پاکستانی لشکر فرنٹیئر کور جاوید کریم بلوچ و ہمسایہ تا اُرا تیا چھاپہ خلک، دا وخت آ جاوید کریم بلوچ نا ایڑ ئنا مار بلال بلوچ ولد حیدر علی و ہمسایہ اسماعیل ولد حیر محمد ءِ دزگیر کریسہ نادرست ہند آ درے۔
حوال تا ردئٹ فورسز آک اِرا گھنٹہ آن زیات اُرا تے پٹار و زالبول و چنا تیتون اوار ایلو بندغ آتیا بیدادی کریر۔
پن کروک ہڑتوم آ بندغ آتا بابت دائسکان ہچ وڑ نا معلومداری رسینگتنے۔ ضلعی کوالخواک دائسکان دا بابت ہچو ہیت اس مونا ہتنو۔