بلوچستان نا ضلع کیچ نا علاقہ زامران ٹی پاکستانی لشکر ءِ آئی ای ڈی جہلو ئٹ ٹک کرینو ۔

احوال آتا ردئٹ اینو سہب زامران نا علاقہ پوگنزان ٹی پاکستانی لشکر نا ٹولی ٹی اوار مروک اسہ گاڑی ئسے بمب جلہو ئٹ ٹک کننگانے ہرانا سوب آن لشکری کارندہ آتے جانی نسخان تون مون تروئی تمانے ۔

علاقائی ذرائع تا ردئٹ جلہو آن گڈ علاقہ ٹی ارا ہیلی کاپٹر سر مسونو ۔

کوالخواہ تا پارہ غا تدینی ءِ پک کریسہ پاکستانی لشکر نا اِرا کارندہ سپاہی نجم شاہ و اطہرالدین تون مرگ ئنا گواچی مسونو و اسہ کارندہ اسیتون اوار اسہ کمکار اس تا خلنگانے۔

  زامران ئٹ بلوچ سلہہ بند تنظیم آک ساڑی ءُ ہرا پاکستانی لشکر ءِ جتاء وڑ ئنا جلہو آتیٹ ٹک کریسہ کریسہ کرینو۔

خدو ایسری دے تیٹ کیچ نا علاقہ گورکوپ و دشت ٹی ارا بمب تراک ئٹ پاکستانی لشکر ءِ ٹک کننگانے ہرافتیٹ جمعی وڑ ئٹ کم و ود ہشت کارندہ مرگ ئنا گواچی مسر  ۔

چاغی نوکنڈی ٹی پاکستانی لشکر نا سم کاری آن افغان شاری تیتون اوار ہندی بندغ آک بھاز ٹپی اندن اسہ چنکو چنا ئس کسکونے ۔

شابیت احوال تا ردئٹ اینو سہب ڈک نوکنڈی نا پارہ غا پاکستانی لشکر نا سم کاری آن چاغی شہسلار نا ہندی مولوی احمد تون اوار سفر کروک بندغ آک ٹپی و اسہ چنکو مسڑ ئس بیران مسونے۔

ہندی بندغ آتا پاننگ ءِ کہ ڈک نا پارہ غا بیست دے آن لشکری کارندہ غاک افغان سفر کروک آتیا سخت رکھ خلکونے کیہی ڈرائیور آک کیمپ ئٹ قید ءُ اندن اوفتا گاڑیک ہلنگانو ۔

سال 2024 ئٹ تیوہ بلوچستان ئٹ سلہہ بند کاروائی تیٹ ترندی ئٹ ودکی خننگ ئٹ بس، بلوچ ”آجوئی دوست“ تنظیم آک پاکستانی ریاست نا برخلاف تینا کارروائی تیٹ ودکی کریر۔ بلوچ لبریشن آرمی (بی ایل اے)، بلوچستان لبریشن فرنٹ (بی ایل ایف)، بلوچ راجی آجوئی سنگر (براس) و ایلو تنظیم آک فوجی کارندہ، تنصیبات و حکومتی مخ تف سلہہ بند ٹولی تے سد آ جلہو تیٹ ٹک کریر۔

جمعی وڑئٹ، دا تنظیم آک 938 جلہو کریر، ہرافتا سوب آن 1002 آن زیات بندغ مرگ ئنا گواچی، 689 ٹپی، و مالی نسخان رسینگنگ نا کم آن کم 546 تدینی رپورٹ مسر۔ اوفتا کاروائیک 25 ضلع تیٹ تالان ئسر و 327 علاقہ تیٹ مسوسر۔ داکان بیدس، دا کارروائی تا وخت آ 76 بلوچ سرمچار نا شہید مننگ نا حوال ارے۔ 2023 نا مونٹی، جلہو تا تیوہ کچ ئٹ 53 درسد ودکی مس، اندن رپورٹ مروک مرگ آتیٹ گوڑیفنگوک ڈول ئٹ 80 درسد ودکی مس، ہرا کہ شورش نا ترندی ٹی ودکی نا نشاندہی کیک۔

بلوچ لبریشن آرمی (بی ایل اے)

بی ایل اے 2024 ئٹ کل آتیان زیات فعال آ تنظیم مسنے، ہرا 302 جلہو کرے ہرافتیٹ گمانی 580 آن زیات مرگ ئنا گواچی و 370 آن زیات ٹپی مسر، کم آن کم مالی نسخان رسینگنگ نا 171 تدینی رپورٹ مسر۔ تنظیم 21 ضلع تیٹ 240 علاقہ تیٹ کارروائی نا دعویٰ کرے، ہرافتیٹ شابیت ڈغار دوئی کننگ و آپریشنل لائخی تا درشانی کننگا۔ اسہ سال ئٹ اونا 52 سرمچار شہید مسر۔ ہرافتیان بھاز آتا تعلق مجید بریگیڈ آن ئس، ہرا تینا ہائی پروفائل خودکش کارروائی تیکن چائنگک۔ بی ایل اے پارے کہ مجید بریگیڈ نا 37 باسک 2024 ئٹ شش بھلو کارروائی کریر، ہرافتیٹ پاکستانی لشکر ءِ بھاز نسخان رسینگا۔

بلوچستان لبریشن فرنٹ (بی ایل ایف)

بلوچستان لبریشن فرنٹ (بی ایل ایف) 2024 ئٹ 284 جلہو کرے، ہرا ڈیہہ ئٹ کل آتیان زیات فعال تنظیم نا دروشم ئٹ تینا اہمیت ءِ برجاء تخا۔ دا جلہو تیٹ 280 آن زیات مرگ ئنا گواچی و 167+ ٹپی مسر، 90 جلہو تیٹ مالی نسخان رسینگا۔ تنظیم 15 ضلع و 189 علاقہ تیٹ کاریم سر تس، ہرافتیٹ شاری و خلقی ہڑتوم آ ہند آتے ٹک کننگا۔ دا شابیت کارروائی تیان پد ہم بی ایل ایف کم سرمچار آتا نسخان ارے، سال ئٹ اونا 16 باسک شہید مسر۔

بلوچ راجی آجوئی سنگر (براس)

براس، ”آجوئی دوست“ سلہہ بند تنظیم آتا سیوت 204 جلہو کرے ہرافتیٹ 41 آن زیات مرگ ئنا گواچی و 30 آن زیات ٹپی مسر۔ مالی نسخان رسینگنگ نا 190 تدینی رپورٹ مسر۔ براس نا کاریمک 16 ضلع و 189 علاقہ تیٹ تالان مسنو۔ تنظیم نا ردئٹ اسہ سال ئٹ بیرہ اسہ سرمچار اس شہید مسنے۔

ایلو سلہہ بند تنظیم آک

ایلو ”آجوئی دوست“ تنظیم آک بلوچ ریپبلکن گارڈز (بی آر جی)، بلوچ ریپبلکن آرمی (بی آر اے) و یونائیٹڈ بلوچ آرمی ( یو بی اے) 2024 ئٹ جمعی وڑئٹ 148 جلہو کریر۔ دا کارروائی تیٹ 101 بندغ مرگ ئنا گواچی و 122 ٹپی مسر، اندن مالی نسخان رسینگنگ نا 95 تدینی رپورٹ مسر۔ دا تنظیم آک چنکو کچ اسیٹ کاریم کریسہ، 13 ضلع و 103 علاقہ تیٹ کاریم کریر، ہرافتیٹ بنماسی ڈھانچہ و ریاستی مڈی تے ٹک کننگ آ پام تننگا۔

2023 ئتون جانچ

2023 نا کچ آ 2024 ئٹ بلوچستان ئٹی سلہہ بند کارروائی تیٹ پاش ودکی مس۔ جلہو تا کچ 2023 ئٹ 612 آن ودیسہ 2024 ئٹ 938 مس، اندن مرگ آک 557+ آن ودیسہ 1002 اسکان سر مسر۔ ٹپی آتیٹ ہم ترندی ئٹ ودکی مس ہرا 423+ آن ودیسہ 689 اسکان سر مسر اندن مالی نسخانک 340 تدینی آن ودیسہ 546 مسر۔ زہمی مروک علاقہ غاک ہم شابیت مسر ہرا 26 ضلع تیٹ 134 ہند آتیان 25 ضلع و 327 ہند مسر۔ دا کچ و حساب پاکستانی ریاست نا پارہ غان چرجوئی ئٹ بغاوت ءِ ایسر کننگ نا کوشست آتیان پد ہم بلوچ ”آجوئی دوست“ سلہہ بند تنظیم آتا ترندی و آپریشنل لائخی تے پاش کیک۔

بلوچستان ئٹ سلہہ بند کارروائی تیٹ 2024 ئٹی کم مننگ نا ہچو آثار خننگتو، ”آجوئی دوست“ تنظیم آک تینا کارروائی تے ودفنگ و علاقائی زہم ءِ ودفنگ برجاء تخار۔ دا تنظیم آتا پارہ غان ہرا لچک و موافقت نا درشانی کننگانے او پاکستانی سکیورٹی فورسز آتیکن اہم چیلنج نا سوب ئسے۔ دنکہ رجحان آک پارہ، بروکا سال تیٹ تنازعہ ٹی گیشتر ترندی بننگ نا گمان ارے، ہرا بلوچ شورش نا سوگو و غنجل حالیت ءِ پاش کیک۔

تربت ئٹ بلوچ لبریشن آرمی مجید برگیڈ نا جلہو ٹی ٹک کننگوک پاکستانی لشکر نا کہوک و ٹپی کارندہ آتے ملٹری ہسپتال آ دننگانے ۔

ڈسٹرکٹ ہیڈ کوارٹر ہستپال تربت نا میڈیکل سپرانٹنڈنٹ ڈاکٹر احمد بلوچ فون آ بی بی سی ءِ پارے کہ ہسپتال ٹی بمب تراک ئٹ کہوک آ اسہ ہم بندغ ئسے نا جون ءِ دننگتو ۔ اوفتا پاننگ ئس کہ ہسپتال ٹی تراک نا بیرہ 11 ٹپی آتے جانجوڑی کمک تننگ کن دریر ۔

اوفتا پاننگ ئس کہ ہمو ٹپی مروک آتیٹ ایس ایس پی سیریس کرائمز انویسٹیگیشن ونگ کوئٹہ زوہیب محسن ، اونا ایلم ، چار چنا و ڈرائیور اوار ئسر ۔

علاقائی ذرائع نا ردئٹ ٹپی مروک و مرگ ئنا گواچی غٹ کارندہ آتے تربت ایف سی ہیڈکوارٹر آ درینو ۔

خن خنوک شاید آتا پاننگ ءِ کہ تراک آن گڈ فورسز علاقہ ءِ تیوہ گھیرہ کرے اندن ایمبولینس آتون اوار ایلو گاڑی تا ہن و بر برجاء مس۔

یات مرے کہ درو بیگہ نا تربت شار آن ہشت کلومیٹر نا مُری آ بہمن نا علاقہ ٹی پاکستانی لشکر نا کارندہ آتا ٹولی نا دروشم ئٹ ہنوکا بس ءِ ” جند ندر “ جلہو ئٹ ٹک کننگا ۔ ٹک ئٹ بروک بس تیوہ بھس مس اندن تراک ٹی اوفتا رکھ ءِ کروک کارندہ آتا گاڑی تے ہم نسخان رسینگا۔

بلوچ لبریشن آرمی تربت جلہو نا ذمہ واری ءِ ارفے ۔

بی ایل اے نا ترجمان جیئند بلوچ میڈیا ءِ تروک اسہ چنکو بیان ئسیٹ پارے کہ تنظیم نا جند ندر یونٹ مجید بریگیڈ نا قابض پاکستانی لشکر نا ٹولی آ خود کش جلہو کننگا ، ہرانا سوب ئٹ منہ لشکری کارندہ مرگ ئنا گواچی مسنو ۔

تربت بمب تراک ئٹ سینیئر سپرنٹنڈنٹ آف پولیس ( ایس ایس پی ) زوھیب محسن ہم ٹپی مسونے۔

بلوچستان حکومت نا ترجمان شاہد رند پک کرے کہ ایس ایس پی محسن ءِ چنکو ٹپ بسونے و خڑک ئنا اسپتال آ دارو و درمان کن دننگانے ۔

یات مرے کہ بلوچ لبریشن آرمی تربت جلہو نا زمہ واری ءِ ارفے ، بی ایل اے نا ترجمان جیئند بلوچ میڈیا غا تروک اسہ مختصر ءُ بیان ئسیٹ پارے کہ تنظیم نا فدائی یونٹ مجید بریگیڈ قابض پاکستانی لشکر نا ٹولی ئسے آ جند ندر کرے ، ہرانا سوب ئٹ منہ لشکری کارندہ مرگ ئنا گواچی مسونو ۔

بلوچستان نا ضلع کیچ نا بنجاہی علاقہ تربت نا خڑک ئنا ہند نیو بہمن ئٹ شاہ زئی ہوٹل نا مونا کسر پاکستانی لشکر نا اسہ قافلہ ئسے تراک ئٹ ٹک کننگانے۔ پن کروک جلہو نا ذمہ واری ءِ بی ایل اے ارفینے۔

بنائی حوال تا ردئٹ بس و ایلو گاڑی تیا تالان پاکستانی لشکر نا اسہ قافلہ اس گدرینگ ئس کہ ٹک کننگا، خن خنوک شاہدی تا ردئٹ تراک فورسز آتا قافلہ نا گدرینگ نا وخت آ مس اندن سم کاری نا توار ہم بِننگا۔

دائسکان نا حوال تا ردئٹ قافلہ ئٹ اوار اِرا بس آتیتون اوار ایلو گاڑیک ہم تراک نا دک ئٹ بسنو ہرانا سوب بھلو کچ ئسے آ جانی نسخان تا حوال ارے۔

علاقائی حوالکار تا ردئٹ ترند حالیت نا تراک نا توار کیہی کلو میٹر مُر اسکان بِننگا۔

فورسز آک ہمو جاگہ تون اوار تیوہ علاقہ ءِ پلویڑ کریسہ کسر آ ہن و بر ءِ بند کرینو۔

پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفسہ پارے کہ تنظیم نا جند ندر کڑدہ مجید بریگیڈ اینو تربت ئٹ کوزہ گیر پاکستانی لشکر نا اسہ قافلہ ئسے آ جند ندری جلہو کریسہ کیہی فوجی کارندہ تے مرگ ئنا گواچی کرے۔ دا جلہو نا ذمہ واری ءِ ننا تنظیم ارفک۔ شابیتی حوال زوت میڈیا غا شینک کننگو۔

گُڈی کلہو

دیدن بلوچ

مفک گنوک نا رخصار ئکن ائے سیاہ زلفے پابو
کپیس ودار دا مشمار ئکن ائے سیاہ زلفے پابو

مورچہ ٹی تولوک چاری ء دژمن تیکن دا ورنا
کروف واتر کِہ نا توار ئکن ائے سیاہ زلفے پابو

پند خلسہ مشتا نیامٹ ہنا خاہوت خلتے کرے
بدر مس تیناس نا شار ئکن ائے سیاہ زلفے پابو

بشخندہ ٹی بیرکس خناس بولان نا مشتا زی آ
لئے لڈو لاڈو پاس مشیار ئکن ائے سیاہ زلفے پابو

چلتنی خزماتے خنوس رقص ئٹی خوئشی آن
بریس دیدن نا گُڈی دیدار ئکن ائے سیاہ زلفے پابو