نظم
مزدک مہر
دسکانے روح تفوکے
کوٹی تیٹی تہار آ
ٹنگوکو چِٹ اسیٹی
اُست و جغر ملی دا
جالی کرینے سیلہ
بادامی آ دا خن تے
دسکا تراشک ءِ خرّن
اے آہنی کڑی ٹی
دسکانے سینہ غاتیا
سگریٹ نا نشاں کو
پَست آ سلوکو دسکا
بیگانہ سینا رندآک
دسکا کَننگ ء بزّگ
ہر ہر گِدان آ پیری
دسکانے دا ملاسی
ایسر مننگ اٹ افّک
دسکانے وخت انا بین
سیری ٹی اِچ بننگ اف
دسکانے بے مرادیک
باپِست خلنگ اٹ افّس
دسکانے خواری آ زِند
خنتے ملِنگے داڑے
دسکانے نت شپادیک
دا نت تا شین اٹی ھو
دسکانے بے گڈر ای
خیسن تا گلزمین آ
دسکا تُرند آ گوریچ
گوہی کُننگے باغ اٹ
دسکا ہُشنگے آھڑ
ہر ہر نہال ے کوورا
گہوش آتا آف سِرک تا
دھرتی آ اِچ درک اف
اڑسانے خولُمی آ
رنگ آتے خیسنی ٹی
ناپیدے داڑے دسکا
مہر آتا ہیت مجلسک
شکّل شلّی آ دیوانک
اِچ دو بننگ اٹ افّس
سہوت سخا تا سیخاک
اودیم اریر خنتیان
دسکانے غمک بانکُر
شونق اٹ ننے کرینو
دسکانے مودہ ماتمک
ننتون ہلکنو اُست
دسکانے اے پراد آک
چرخی کَننگو خف تیئٹ
دسکانے رَنج الم تے
پین یار اچ رسینگتؤ
آڑسندہ و خسِکّہ
تورینو زور اسیٹی
ارمان تا شاخ داسہ
دون پن پن مسک
امیت انا درخت ء
ارّہ کریر گُڈّار
ٹکُر کریر تغ تا
آدینک ے زیبلنگا
ویدن تا جؤرک آتے
خلکر تڑیر دشمنک
نا یار آ مزدک آتے
ارفیر دریر دشمنک
دسکانے بےگواہ ای
تینا دغار آ تینئٹ
دسکانے لمہ کنکے
روڈ آ ارے وداری
دسکانے گودل آ ایڑ
پھل آتتونے چاری
زھیری نا کمب اسیٹی
زنک آک اریر ملاسی
دسکانے سیاسر آتا
اے خنک اریر اناری
دیدہ تو غُلغُلو آ
باوہ مخنگے تینتو
دسکانے سنگت آک کل
راہی کہلئو کننگو
دسکانے ای کہلئوتے
نہ کے خننگ اٹی ہوٹ
پیغام ے دلبر آتا
خف تیئٹ نہ ای بننگوٹ
دسکا اریر دا برجا
جی او اریر دا جاری
جاری مرور اگر دا!
جاری مرو بغاوت
جاری ءِ گر بغاوت!
زندہ ارے مزاحمت
زندہ ءِ گر مزاحمت!
زندہ سلو نا خلقت
زندہ سلو نا خلقت.