بلوچ صحافی ساجد حسین سویڈن آن بیگواہ

الّمی خوانبو

پنی آ بلوچ صحافی ساجد حسین 2 مارچ 2020 آن سویڈن آن بیگواہ ءِ۔

ساجد حسین بھازا پنی آ پاکستانی حال تاک آتیٹ صحافی نا دروشم اٹ کاریم کرینے و 2017 آن باہوٹی سویڈن آ ہنپ کریسس۔

سویڈن اٹ او اسہ انگریزی آن لائن میڈیا ادارہ بلوچستان ٹائمز نا بناءِ کرے۔ او بلوچستان ٹائمز نا چیف ایڈیٹر ءِ۔

ہیومن رائٹس کونسل آف بلوچستان نا پاننگ ءِ کہ ساجد حسین سویڈن نا دارالحکومت اسٹاک ہوم اٹ ہندی ئس، واہم او تینا خواننگ و روزگار کن دو مارچ آ اسہ پین شار ’اپسلا‘ آ ہنپ کرے۔ اپسلا سرمننگان گڈ او دے ئنا دو بجہ اسکان تینا خاہوت و سنگت آتون حوال اٹ ئس۔ اوکان گڈ اونا نمبر بند مس، ہراڑان گڈ اونا سیال و سنگتاک اوڑتون حوال کننگ کپسہ۔

دا بابت سویڈش پولیس ئٹ رپورٹ کننگانے، ساجد حسین نا پِن 5 مارچ آن بیگواہ بندغ تا لڑ اٹ اوار کننگاسس۔ واہم ساجد حسین نا پٹ وپول ئٹ نزوری آ بے جاراتی نا درشانی کننگانے۔

جمعہ نا دے بلوچستان ٹائمز نا ایڈیٹوریل بورڈ اسہ بیان اس تریسہ پارینے کہ پولیس ساجد حسین نا پٹ و پول نا بابت اونا سیال و سنگت آتے ہچس پاننگ اَف۔ نن سویڈش کوالخواہ تیان خواست کینہ کہ او دا ویل آ دمدستی تون گام ارفر۔

ایچ آر سی بی ہم سویڈش کوالخواہ تیان خواست کرینے کہ او ساجد حسین نا ناگمان آ بیگواہی آ ترند و گام ارفر و ساجد حسین نا بابت معلومداری ایتر۔

بلوچستان نا بھاز آ صحافیک بلوچستان نا حالیت آتیا نوشتہ کننگ نا سوب آن گمانی وڑٹ پاکستانی فوج نا دو آن زوراکی تون بیگواہ و مرگ ئنا گواچی مریسہ مسونو، واہم داسہ اسہ بھلو بلوچ صحافی ئسے نا اسہ یورپی ملک ئسے آن ناگمان آن بیگواہی بھاز آ خلیس آتا ودشت ءِ کننگے۔

دی بلوچستان پوسٹ ایڈیٹوریل کمیٹی دا ویل آ تینا بے جاراتی نا درشانی کریسہ بلوچستان ٹائمز تون دا سخت آ ساہت آ ہمکوپئی نا درشانی کیک۔

بلوچ نیشنل موومنٹ نا سیکریٹری جنرل ڈاکٹر مراد بلوچ دا بابت پارینے کہ سویڈش حکومت، صحافیک و بندغی حق آتا جہانی ادارہ غاک ساجد حسین نا یلہ کریفنگ کن تینا کڑدار ءِ مونا ہتیر۔

او پارے کہ ساجد حسین بلوچستان نا پنی ءُ صحافی ئسے۔ او پاکستان نا پنی انگریزی حال تاک ’دی نیوز انٹرنیشنل‘ و ’ڈیلی ٹائمز‘ اٹ کمکار نیوز ایڈیٹر و ڈپٹی سٹی ایڈیٹر کاریم کرینے۔ ساجد حسین‘ بلوچ نیشنل موؤمنٹ نا سرکماش شہید چیئرمین غلام محمد بلوچ نا خوارزادہ ءِ۔ بلوچستان اٹ سیاسی راہشون و جہد کار آتا سیال آتے ہمیش ریاستی بے دادی تون مون تروئی مسونے۔ بی این ایم دادے ”اجتماعی سزا“ نا پِن ایتک۔

مراد بلوچ نا پاننگے کہ ساجد حسین بلوچستان ٹائمز اٹ انگریزی و بلوچی اٹ تینٹ نوشتہ کننگ ئس و ایلو نوشت آتے شینک کننگ ئس۔ داڑان بیدس دا ادارہ اسہ ریڈیو چینل اس ہم چلیفنگ ءِ و بلوچ قوم نا شیف خلوک آ توار ءِ مونا ہتنگ ءِ۔ اونا ناگمان آن بیگواہی ننے است ہسونی نا گواچی کرینے نن دا خلیس ئٹی ان کہ ساجد حسین نا بیگواہی اٹ آئی ایس آئی نا دُو مَف۔

پُوسکنا حوالک

بلوچ راجی مچی نا بشخ مرِسہ جہان ءِ نشان ایتبو کہ نن زندہ و شرفدار ءُ راج ئسے اُن۔ ماہ رنگ بلوچ

بلوچ راج 28 جولائی نا دے گوادر ئٹ سرمریر و جہان ئے کلہو ایتر کہ نن زندہ و خوددار...