بلوچستان نا دارالحکومت کوئٹہ ٹی حکومت نا گچین آ لاک ڈاؤن ءِ سوداگر آک بُھس کریر۔ صوبائی مذاکراتی کمیٹی نا سرکماش انجمن تاجران بلوچستان نا صدر تون حوال کرے، حکومت نا خلیس نا پاریسہ معاہدہ نا پاسداری نہ کننگ آ اسیکہ وا لاک ڈان خلنگ نا فیصلہ کرے۔
ریسنگوک حوال تا رد ئٹ تدوکا دے حکومتی مذکراتی کمیٹی و سوداگر تنظیم آتیٹ گچین لاک ڈاون آ امنائی مسوسس کہ و دکاندار آک ایس او پیز آ عمل کریسہ تینا کاروبار ءِ کرور، لاک ڈاون آن چپ ہنوک آتیا کارروائی کننگو ولے لاک ڈاؤن ٹی کمبوتی نا اولیکو دے آ گچین آ لاک ڈاؤن ءِ سوداگر آک بُھس کریر۔ بازار آتیٹ بے کچ مچی دکان و مارکیٹ آتیٹ ماسک و سینٹائزر آک کاریم ئٹ اتنگتور۔
ٹریفک نا بست و بند تینا مون مس حکومت و عسکری ادارہ تا بڑز کوالخواک ترندی تون سوختئی نا درشانی کریسہ اسیکہ وا لاک ڈاون خلنگ نا فیصلہ کرینو۔ دا رد ئٹ حکومتی کمیٹی مذکراتی کمیٹی نا راہشونی صوبائی وزیر سلیم کھوسہ، انجمن سوداگر بلوچستان نا صدر رحیم آغا تون حوال کرے۔ حکومت نا خلیس نا اودے پارے ہراڑا انجمن سوداگر تا راہشون اودے باور تریسہ پارے کہ ننے وار ئس تیر کہ نن سوداگر آتیٹ چاہنداری کن کمپین نا بناء کرون ۔
ریسنگوک حوال تا رد ئٹ بازار و مارکیٹ تیٹ دن انگا ایس او پیز آ عمل کننگ کن حکومتی و عسکری ادارہ غاک خلیس نا درشانی کریسہ گچین آ لاک ڈاؤن پالیسی آ اسیکہ وا چمشانک اس شاغنگ نا بناء کریر و اِرا دے آن گُڈ حالیت ءِ اُریسہ ترند لاک ڈاؤن کننگ و کرفیو خلینگ نا صلہ غاتیا خوڑتی ئٹ اوننگو-