نصیر کبدانی لبزانکی دیوان خاران نا پارہ غان اسے بیان اس تریسہ پاننگانے کہ تنظیم نا سر کماش ثناء سیاپاد ہرادے 11 مئی 2020 آ خاران آن بیگواہ کننگا دائسکان اونا بازیاب مفرننگ نا سوب آن تنظیم نا سنگت آتے اونا بابت فریشانی پلویڑ کرینے۔
مونی پاریر کہ ثناء سیاپاد اسے خوانندہ و ادب دوست ءُ بندغ ئسے۔ او علامہ اقبال اوپن یونیورسٹی آن بلوچی ٹی ایم فل ام کننگ ئس۔ علاقائی سیاست ٹی بلوچستان نیشنل پارٹی تون تفوک ئس۔ ثناء سیاپاد مدامی قلم و کتاب تون سنگتی کرینے اونا بیگواہ مننگ آن اونا اُرا والا تون اوار اوار نصیر کبدانی لبزانکی دیوان خاران نا سنگت آک فریشان ءُ۔
مون مستی پاریر کہ ثناء سیاپاد ءِ بندغی ہمدردی نا بنیات آ عئید آن مست یلہ کننگے۔ غٹ بندغ دوست، علم و ادب دوست آ اُلس آن خواست کریسہ اوفک پاریر کہ ثناء سیاپاد کن توار ارفر کہ او زوت آن زوت یلہ کننگے۔
یاتی دا وختا بلوچستان آن بھاز آ ورناک، خوانندہ غاک بیگواہ کننگانو ہرافتیٹی بھاز آ ادیب، شاعر، علم دوست و سیاسی باسک آک اوار ءُ۔
سوشل میڈیا غا دا رداٹ وختس بیگواہ مروکا بندغ آتیکن توار ارفنگک۔ اندن ثناء سیاپاد کن اینو ام سوشل میڈیا ٹی کمپئین کننگا داڑان مست ام اوڑکن کمپئین کننگا۔