عبداللہ جان جمالدینی نا کتاب ”لٹ خانہ“ ءِ براہوئی ٹی مٹ و بدل کریسہ چھاپ و شینگ کننگا۔
دا مٹ و بدل ءِ براہوئی بولی و ادب نا پنی آ ادیب، شاعر غمخوار حیات کرینے۔
پنی آ زانت کار عبداللہ جان جمالدینی نا یاداشت آک ہرافتے او 2002 ٹی لٹ خانہ نا پنٹ چھاپ و شینک کرے۔ اندن دا کتاب ءِ داسہ براہوئی زبان نا پنی ادیب و شاعر غمخوار حیات براہوئی ٹی مٹ و بدل کرینے ہرادے آماچ ادبی دیوان مستونگ چھاپ و شینک کرینے۔
لٹ خانہ بلوچستان نا ترقی پسند و روشن خیال ادیب آتا ہمو تحریک نا پن ءِ ہرا نا بنشت ءِ 1950 ٹی عبداللہ جان جمالدینی، سائین کمال خان شیرانی و ایلوفک تخار۔ ہرا بنیاتی وڑٹ اسے سرکل ئسے آن بندات مس اندن مونی ہنیسہ دادے اسے تحریک اسینا پن تننگا۔
لٹ خانہ نا دا تحریک عبداللہ خان جمالدینی نا کذیت آن پد ام برجاء کننگا، اینو ام دا اندن برجاء۔
کتاب ءِ براہوئی مٹ کروک غمخوار حیات براہوئی زبان و ادب نا اسے پنی ءُ ادیب و شاعر ئسے۔ دا وختا او گورنمنٹ بوائز انٹر کالج بروری روڑ کوئٹہ ٹی براہوئی زبان نا لیکچرار نا حیثیت ٹی براہوئی خوانفنگے۔ اندن بلوچستان یونیورسٹی آن براہوئی ٹی ایم فل ام کننگ ءِ۔
غمخوار حیات دا وختا براہوئی زبان ٹی کہی کتاب آتے لکھانے۔ اونا غٹ چھاپ و شینک مروکا کتاب آک 12 نا کچ ءُ۔ چار کتاب شاعری نا ءُ۔ ایلو کتاب آک تا نثر ٹی ءُ ہرافتیٹی 2 کتاب مٹ و بدل ءُ۔ اندن او گدرینگوک آ سال حمزہ رسول نا پنی آ ناول ءِ “کنا داغستان“ نا پنٹ براہوئی ٹی مٹ و بدل کرینے۔