بلوچستان نا مال و مڈیک براہوئی ادب نا رنگ اٹ
نوشت: محبوب شاہ
اولیکو بشخ
دی بلوچستان پوسٹ
بلوچستان تہہ و پیشن نا خواجہ غاتیکن جنت نا پری تیان کم اف، بلوچستان نا جغرافیہ، اونا ڈغار نا اہمیت نا بارو اٹ نن دا پاننگ کینہ بروکا وخت اٹ مُست آن زیات جہانی و ملکی معیشت و سیاست اٹ اسے اندنو حیثیت اس تخک ہرات کے ہچ او ملک اس، ہچ سامراجی طاقت اس خن تیان اودیم کننگ کپک، جہان ٹی دا اسے اندنو پرکشش ءُ خطہ سے ہرانا روح اٹ روحانیت، ہرانا بالاد نا زیبائی، ہرانا وہوکا ہنین آدیرک ہرانا پدین چرک آک، رنگی و اُست کش آ ندارہ غاک، اونا گچین آ زباد آب کوثر نا رنگ اٹ صفا انگا جوک، پٹ و بیوان تا زیبائی، مش تا بڑز و زیبا غا دروشم، پِر و برسات اٹ بی بی نا گندار نا رنگ آک، براہوئی و بلوچی شاعر آکے لوز آتا خزانہ غان لال انا کڑو اٹ خُلنگ آ بے وس کیک۔
دا حالیت، دا کیفیت ہراڑے کے بلوچستان نا اہمیت ءِ پاش کیک ہموڑے بلوچستان اٹ بروکا وخت مخلوق نا شون و شرحالی نا دے ٹک تننگ نا پڑو ہم کیک، داڑان بیدس بلوچستان اٹ جہانی استعماری قوت آتا نیام اٹ تینا اہمیت ءِ سامراج آتا خواہشات آکے تینا پلو آ نوشت اٹ بھلو چک اوتاڑ معاشی و دفاعی ڈوک لگنگ، عکس کشی نا جنگ ءِ آدینک آمبار پاش کیک۔ دا ندارہ غاک دا احساس آک بلوچستان نا مزاحمتی شاعر آتیکن علم و دانش نا مدام وہوکا چکل آتا چٹ ہلوکا دیر تیٹ اُست آتا تہٹی لگوکا خاکر نا زراب ءِ اٹ پدین کننگک ہرانا اثرات آک ہراتم علاقائی او جہانی ادب تون اوار بلوچستان نا معیشت سیاست و راجے ہم تینا پلویڑ اٹ ہلکونے۔ہمو تم براہوئی مزاحمتی شاعر آک تینا برانز دسوکا شاعری ٹی وخت و حالیت آکے مدام برانز تسونو۔ وطن نا مہر انا گواچی مروکا شہے مرید آتا ٹپی آ اُست آ تا درمان ءِ مزاحمتی شاعری نا دارو اٹ کرینو۔
تینا قوم ءِ شاعری ٹی تغ آن بش کریسہ کوک و توار اٹ ہمت تسونو، بش مبو غلام آک خواجہ غاکے نم دا خاطران پزور خنیرے کہ نم وخت آسیان سجدہ ٹی تموک اُرے، ہراسٹ ءِ غلامی نا عادت مریک او مدام تینا طاقت آن بے سما مریک۔
قوم و وطن ءِ ہراتم ویل اس ہلکونے ہمو ویل ءِ ایسر کننگ کن براہوئی مزاحمتی ادب، معیشت آن ہلیس سیاست اسکان گچین و کرد اسیٹی مون آ بسونے، انتیکہ بلوچستان وسائل آتا ہمو خطہ ءِ ہرانا ہر پلو خیسن دسک ولے اونا سینہ، اونا اُست پوغ آمبار اشنگک، انتیکے وسائل آک اونا خن و مون آن دیر آمبار وہیرہ، اونا خزانہ غاک بے پایان او اونا کڈو او بینٹ آک خیسن پیہن اٹ شپ او سیندک مرے یا ریکوڈک اونا گیس مرے یا کہ تیل، اونا حسن و زیبائی بیدس بیرفنگ آن زیباءِ۔ اگہ اونا پلو آ تالان کشیدہ کروکا گوادر نا ہیت ءِ کیس یا اونا گد آ قدرت نا خرن آ ساہل نا سفت او ثناء کیو تو سما تمک کہ دا ہمو جل پری ءِ کہ دانا حسن و زیبائی نا تاوے ہر ملک ہر بدر آ قوم ہتنگ کپک۔ گوادر تینا زیبائی ٹی مست ءِ دات اگہ کس خمب کروئے تو ضرور اونا تعلق شئے مرید نا خاہںوت آن مروئے۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک