خوانندہ نا پن محمد حیات نا پنٹ چائنگ مس ۔
بلوچستان نا ضلع کیچ تربت نا علاقہ آبسر ٹی پاکستان پیرا ملٹری فورس فرنٹیئر کور نا سم کاری آن تربت ٹی ہندی و کراچی یونیورسٹی نا اسے نودربر اس محمد حیات بلوچ بیران مس ۔
احوال آتا ردٹ تربت نا علاقہ آبسر ٹی فورسز نا قافلہ آ نادرست آ بندغ آک تراک اس کریر۔ اندا تراک آن پد فورسز تینا مون سم کاری کرے۔ اندن خڑک تینا مَچ آتیا کاریم کروک محمد حیات ءِ فورسز ئنا کارندہ آک دزگیر کریر و لٹ کٹ آن گڈ اونا لمہ و ہیڑ نا مون آ سم کاری کریر، ہراڑان او جاگہ غا کذیت کرے۔
علاقائی بندغ آتا پاننگے کہ محمد حیات کراچی یونیورسٹی نا اسے نودربر اسے۔
یاتی مرے بلوچستان ٹی گدرینگوک بیست سال آن برجاء جنگ اٹ بلوچ آزادی پسند مسلح تنظیم آک پاکستانی سیکیورٹی فورسز ءِ ٹک کیرہ۔ اوفتا ٹک کننگ آن پد پاکستانی فورسز آ دا دوبہ لگک کہ او دا ٹک کننگ آن پد داپار ایپار نا علاقہ غاتیٹی بے گناہ اُلس ءِ سم نا گواچی کیرہ، ظلم و بیدادی کیرہ، کئی بندغ آتے بیگواہ ام کرینے کئی بندغ آک سم نا گواچی مرسٹ بیران ام مسونو۔
یاتی مرے دا تدینی آن پد چاگردی حوالکاری نا سائٹ فیس بک و ٹوئٹر آ اُلس دا تدینی آ توار چست کننگ و محمد حیات کن انصاف نا ہیت کننگ ءُ۔ دا تون اوار اوار پاکستانی سیکیورٹی فورسز ءِ ام بد رد کننگ ءُ۔
ہیومن رائٹس کونسل آف بلوچستان نا پارہ دا تدینی نا مذمت کرسٹ پارینو کہ محمد حیات ءِ اونا خاہوت نا مون آ سیکیورٹی فورسز سم کاری کرسٹ کسفین ءِ۔
پشتون قوم پرست و مستکوئی سینیٹر افراسیاب خٹک ٹوئٹ کرسٹ پارینے کہ تربت ٹی محمد حیات پنی آ بلوچ خوانندہ اس خلننگانے دانا نوٹس ارفنگے و بلوچستان ٹی ہرا خون ریزی مننگے اونا خلاف توار چست کین۔ آخر ٹی دا ام پارے بلوچ آتا زند ام معنی تخک۔
The murder of Hayat Baloch, a young student in Turbat today must not go unnoticed. We must raise our voices for stopping the ongoing bloodshed in Balochistan. Baloch lives matter.#JusticeForHayatBaloch #FCKilledHayatBaloch https://t.co/1pUsgFeTRT
— Afrasiab Khattak (@a_siab) August 13, 2020
پاکستان پیپلز پارٹی نا بنجائی زمہ وار بلاول بھٹو نا ترجمان و مستکوئی سینیٹر فرحت اللہ بابر ٹویٹ اس کرسٹ دا تدینی نا مذمت کرسٹ پارے کہ دا تدینی نا جوڈیشل انکوائری کننگ مرے ۔ و ملزم آتے سزا تننگ مرے ۔ ظلم و بیدادی زور و زبر دستی ٹی بیگواہ کننگ ء ایسر مروئی ء ۔
پی ٹی ایم نا گلالئی اسماعیل تینا ٹویٹ ٹی پاکستان نا وزیر اعظم عمران ء مینشن کرسٹ پارے کہ پی ٹی ایم نا نعرہ کہ ننا ورناتے انتکہ کسفنگ مننگے ۔ دا امرو آزاتی ئسے ۔انتکہ سیکورٹی فورسز نا پارہ غان شارتی تے ٹک کننگ مننگے ۔
اندن دا وختا دا تدینی نا خلاف ٹویٹر آ #JusticeForHayatBaloch ٹاپ ٹرینڈ ٹی ء ۔ اوڑتون اوار #FCKilledHayatBalochُ نا ام ایش ٹیگ استعمال مننگے ۔