بلوچستان ٹی کرونا وائرس نا آماچ مروکا بندغ آتیٹی ودکی بس، گدرینگوک آ 24 گھنٹہ ٹی ہفت ضلع آن 88 ناجوڑ مونا بسونو ۔
اندن دا 88 کیس تون اوار بلوچستان ٹی کرونا وائرس نا آماچ مروکا بندغ آک 12 ہزار آن ودینگار ۔ دا وختا بلوچستان ٹی کرونا وائرس نا آماچ مروکا 1448 ناجوڑ نا علاج مننگے ۔
محکمہ جانجوڑی بلوچستان نا پارہ غان شینک مروکا رپورٹ سینا ردٹ چار شنمبے نا دے 786 بندغ نا کرونا وائرس نا ٹیسٹ کننگانے ۔ اندا وختا ہفت ضلع آن 88 ناجوڑ نا مون آ بننگ آن پد بلوچستان ٹی کرونا وائرس آن آماچ مروکا ناجوڑ آتا حساب 12044 آ سر مس ۔
رپورٹ ٹی دا ام پاننگانے کہ گدرینگوک آ 24 گھنٹہ ٹی 17 ناجوڑ نا جان جوڑی آن دا وختسکان بلوچستان ٹی جان جوڑ آتا کچ 10458 آن زیات مس ۔
اندن 1448 ناجوڑ آتا علاج مرسٹ ءُ ۔ 255 بندغ نا کرونا وائرس ٹیسٹ آتا رپورٹ لیبارٹری ٹی ءُ، دائسکان بتنو ۔
یاتی مرے کرونا وائرس آن بلوچستان ٹی بیران مروکا بندغ آک 138 ءُ ۔
یاتی مرے گدرینگوک آ ہفتہ ٹی پاکستان تون اوار بلوچستان ٹی کرونا وائرس نا بابت است جمعی نا درشانی کرسٹ وفاقی حکومت نا پاننگ آن پد غٹ جاگہ سمارٹ لاک ڈاؤن ءِ ایسر کننگا۔