بلوچستان نا علاقہ کیچ، تمپ ئٹ پاکستانی لشکر نا آپریشن نا وختا بلوچ آجوئی خواہوک سلاء بند جنگول تیتون جھڑپ ئٹ اِرا جنگول تون اوار مُسہ بندغ کسکر۔
جھڑپ تمپ نا علاقہ مزنبند ئٹ مس ہراڑے ملخدو پاکستانی لشکر آپریشن نا بناء کرے، آپریشن ئٹ زمینی لشکر ءِ جنگی گراب آتا کمک دوئی ئس۔
علاقائی مخلوق نا ردئٹ بھلو کچ اسیٹی پاکستانی لشکر مزنبند نا مش تیا تالان علاقہ گومازی، شاہ آپ، بومن، کلبر و ایب کیب ئٹ پیہا، علاقہ تے گیڑ کریسہ جتا ہند آتیا لشکر کشی کننگا و دا نیامٹ جنگی گراب آک شیلنگ کریسہ کریر۔
بلوچستان لبریشن فرنٹ نا ترجمان میجر گہرام بلوچ بیان اسیٹی دا بابت پارے کہ مزبند نا جنگ ئٹ شہید مروک شہید عرفان و شہید نور خان ءِ دروت پانہ۔
او پارے کہ ضلع کیچ ئٹ پاکستانی لشکر تون دشت مزنبند نا مَشی لٹ ئٹ دژمن فوج تون دلیری تون جنگ تریسہ کونشکلات آن تعلقدار کیپٹن عرفان پن کروک امداد مار شہید غلام مصطفیٰ نا، خیر آباد آن تعلقدار سیکنڈ لیفٹینٹ نور خان پن کروک برمش مار نور بخش نا شہید مسر۔
میجر گہرام مُستی پارے کہ مزنبند نا مش تیٹی پاکستانی زمینی لشکر تون اوار جنگی گراب آک آپریشن کریر و ایس ایس جی کمانڈو دڑیفنگا، شہید سرمچار آک سیدان پیر و گندھادر نا علاقہ تیٹ دژمن تون دلیری اٹ جنگ تریسہ پاکستانی لشکر نا پانزدہ آن زیات کارندہ ءِ مرگ نا گواچی کریر و بھاز آتے ٹپی کریر و جند آک تا شہد مسر۔
ترجمان پارے کہ شہید کیپٹن عرفان و شہید نور خان جنگی محاذ آ دژمن لشکر ءِ بھاز وار بے سہب کریر، اوفتا شہادت آ اوفتے دروت پانہ و سوغند کینہ کہ شہید آتا دتر نا مٹ آجو بلوچستان مرو۔
ایلو پارہ غان پاکستانی فوج نا شعبہ حوالکاری آئی ایس پی آر پارینے کہ انٹیلی جینس نا بنماس آ مروک آپریشن ئٹ بلوچ سلاء بند تنظیم نا اِرا باسک خلکنون ہرافک فورسز آتیا جلہو تیٹ اوار مسونو۔
آئی ایس پی آر نا پاننگے کہ خلنگوک بندغ آتیان سلاء و حوالکاری گڑاتا بھلو کچ اس دوئی مسونے۔
مُستی حوال تا ردئٹ جھڑپ ئٹ پاکستانی لشکر نا علاقائی کمکار ئسے نا کہنگ ہم پک مسونے۔
علاقائی حوال تا ردئٹ تمپ آن تعلقدار ڈیتھ اسکواڈ نا باسک منیر احمد مار عبدالرشید نا، جنگ نا وختا ٹپی مسوسس ہرا دراخ متئو و کسک۔
یاتی مرے بلوچ سیاسی و چاگردی مخلوق نا پاننگے کہ تیوی بلوچستان ئٹ پاکستانی لشکر و ڈھکوک ادارہ غاک بلوچ آجوئی خواہوک آتا برخلاف ڈیتھ اسکواڈ ٹہیفینو و دا ٹولی تا زر ئنا بست و بند کن اوفتے داڑیلی، نشہ بہا کننگ و گاڑی تیان زوراکی ئٹ زر ہلنگ نا موکل تننگانے۔