چنکا سن ئنا چنا خضدار آن خننگا، ہرا مسہ جاگہ بہا مسوسس، خضدار نا شاری اس 11 سال نا چنا ءِ کبین نرخ ئٹ ہلیسہ زوراکی ئٹ نکاح کرے۔
گیشتری حوال آتا رد ئٹ اسہ سال مست پنجاب نا شار ننکانہ آن 11 سال نا چنا روبینہ بنت محمد یوسف، قوم کھرڑ اسہ ٹولی اسینا دو تیان بیگواہ مس ہرا اوکان سندھ آ دننگا۔ سندھ نا علاقہ شہداد کوٹ ئٹ اونا نرخ تخنگا۔ محمد ابراہیم ولد عبدالرحیم جتک خضدار نا ہندی، ساڑی متحدہ امارات ئٹ جہی، چنا ءِ ہلیسہ خضدار آ ہیس و 11 سال نا سن ئٹ زوراکی ئٹ اوڑتون نکاح کریسہ تینا ارا رئیس آباد کھنڈ خضدار ئٹ کیز کرے۔ و منہ دے آن پد تینے ارغ پن کروکا بندغ یو اے ای آ ہنا، چنا اسہ سال اسکان اندا بندغ نا ارا ٹی ہندی مس۔
مُستی حوال تا ردئٹ اسہ سال آن پد تدوکا دے تیٹی گیگ ملسہ اُرا آن نرّا و کسر تا چاہنگ پننگ نا سوب آن او خضدار نا شار ئٹ سویل نا نیمہ ءِ ہلیسہ بانزگیر خلق اسکان ہننگ کرے ہراڑے اسہ بندغ اس اوڑان سوج کرے کہ نی دیر اُس و ہرانگ ہننگ اُس گڑا چنا تیوی احوال آتے بنیفے۔ دا بندغ اودے دا یخین و تسلی ءِ ایتسہ تینا ارا غا ہننگ کن پارے کہ ای نے نا ارا و خاہوت (لمہ و باوہ) تون ملفنگ نا بست و بند ءِ کیوہ، دائسکا مسٹمی بندغ نا نیت ہم انسانیت نا الو، دا ہم چنا نا بہا کننگ نا کوشست ءِ بناء کرے دانا نیام ئٹ چنا نا ڈھکوئی ننکانہ ٹی تینا خاہوت تون فون آ ہیت مس و تینا رہنگوکا جاگہ نا اوفتے پارے۔
اونا خاہوت پولیس ءِ حوال تسر، و پولیس ایس ایچ او عطااللہ جاموٹ نا سرکماشی ٹی اندا ارا ٹی چھاپہ خلیسہ چنا ءِ یلہ کریفیر۔